ភ្នំពេញ ៖ យុវជនម្នាក់ រួមទាំងបក្ខពួក២ ទៅ៣នាក់ បានទៅចូលផ្ទះគេទិញទុកចោល នៅលើទឹកព្រោះតែធ្លាក់ឆ្នាំងសាកទូរស័ព្ទនៅក្រោមផ្ទះនោះ ក៏ចុះទៅរើស បណ្តាលឲ្យផុតជើងធ្លាក់ចូលក្នុងទឹក លង់ស្លាប់មួយរំពេចនោះតែម្ដង។
ហេតុការណ៍នោះបានកើតឡើងនៅវេលាម៉ោង១២និង១០នាទី ថ្ងៃទី២៨ ខែមីនា ឆ្នាំ២០១៩ នៅចំណុចក្រោមផ្ទះលេខ៧៤សេ (ផ្ទះចាស់គេទិញទុកចោល) ផ្លូវរថភ្លើង ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
សមត្ថកិច្ចបានឲ្យដឹងថា អត្តសញ្ញាណជនរងគ្រោះ ឈ្មោះ ប៉ង ដុស ភេទប្រុស អាយុ២១ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ។ ដោយឆ្លងតាមការបំភ្លឺពី ឈ្មោះ កាក់ ហួរ ភេទប្រុស អាយុ១៨ឆ្នាំ និង ឈ្មោះ ឃ្លោក ច័ន្ទភត្រា ភេទប្រុស អាយុ១៧ឆ្នាំ បានឲ្យដឹងថា មុនពេលកើតហេតុ ជនរងគ្រោះបានមកអង្គុយលេងនៅក្នុងផ្ទះ លេខ៧៤សេ ផ្លូវរថភ្លើង ក្រុម៣៩ ភូមិ៣ សង្កាត់ស្រះចក ខណ្ឌដូនពេញ ដោយកាន់ដុំសាកថ្មទូរស័ព្ទ និងបានធ្វើឲ្យធ្លាក់ចូលក្នុងទឹកក្រោមផ្ទះ។ ពេលនោះជនរងគ្រោះបានចុះទៅខាងក្រោមផ្ទះ រើសដុំសាកថ្មទូរស័ព្ទ បណ្តាលឲ្យផុងជើងធ្លាក់ចូលក្នុងទឹក ឈ្លក់ទឹកស្លាប់តែម្តង ព្រោះទឹកនៅខាងក្រោមផ្ទះចាស់គេទុកចោលនោះមានជម្រៅប្រហែល៣ទៅ៤ម៉ែត្រឯណោះ ហើយម្យ៉ាងវិញទៀតមានដុះជិតដោយស្មៅក្រាស់ឃ្មឹក និងលាយឡំជាមួយដើមត្រាវជ្រៅយ៉ាងច្រើនផងដែរ ពេលដែលជនរងគ្រោះធ្លាក់ទៅដូចជាលិចបាត់តែម្ដង។
យោងតាមការសន្និដ្ឋាន និងការពិនិត្យរបស់ការិយាល័យជំនាញបច្ចេកទេសវិទ្យាសាស្ត្រ នៃស្នងការដ្ឋាននគរបាល រាជធានីភ្នំពេញបានឲ្យដឹងថា ជនរងគ្រោះពិតជាស្លាប់ដោយសារលង់ទឹកពិតប្រាកដមែន។
បច្ចុប្បន្ន សព បានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី នៅភូមិព្រៃឈើទាល ឃុំតាភេម ស្រុកត្រាំកក់ ខេត្តតាកែវ៕
Source: Kampuchea Thmey Daily
0 Comments