រតនគិរី ៖ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត បានចុះបង្ក្រាបការជួញដូរដោយខុសច្បាប់នូវសារធាតុញៀន(ប្រើវិធានញុះញង់)។
ប្រតិបត្តិការចុះបង្ក្រាបជួញដូរថ្នាំញៀនបានធ្វើឡើងកាលពីវេលាម៉ោង៤និង០០នាទីល្ងាចថ្ងៃព្រហស្បតិ៍ ៨រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែមីនា ឆ្នាំ២០១៩កន្លងទៅ ស្ថិតត្រង់ចំណុចភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី។
មន្ត្រីនគរបាលជំនាញបានឲ្យដឹងថា ដោយមានការបញ្ជាផ្ទាល់ពីលោកឧត្ដមសេនីយ៍ត្រី វ៉ាន់ សង្វាត ស្នងការរងទទួលផែនការងារប្រឆាំងគ្រឿងញៀន ឃាត់ខ្លួនជនសង្ស័យ ឈ្មោះ ឡេង កុងហួរ ភេទប្រុស អាយុ២២ឆ្នាំ ជនជាតិខ្មែរ បច្ចុប្បន្នរស់នៅភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគីរី មានស្រុកកំណើតភូមិថ្មពូន ស្រុកព្រៃឈរ ខេត្តកំពង់ចាម។
ក្នុងនោះដែរ សមត្ថកិច្ចបានដកហូតវត្ថុតាង ម្សៅក្រាមពណ៌សថ្លា សង្ស័យជាសារធាតុញៀនចំនួន២កញ្ចប់ធំ និងមួយកញ្ចប់តូច មានទម្ងន់១២,៣៨ក្រាម ទូរស័ព្ទដៃចំនួន១គ្រឿង និងជញ្ជីងថ្លឹងចំនួន១គ្រឿង។
បច្ចុប្បន្ន ជនសង្ស័យ រួមនឹងវត្ថុតាង ឃាត់ និងរក្សាទុកបណ្ដោះអាសន្ននៅការិយាល័យជំនាញ នៃស្នងការនគរបាលខេត្ត ដើម្បីកសាងសំណុំរឿងបញ្ជូនទៅអយ្យកាអមសាលាដំបូងខេត្តចាត់ការតាមនីតិវិធីច្បាប់៕
Source: Kampuchea Thmey Daily
0 Comments