ភ្នំពេញ ៖ បុរសម្នាក់ ជាប់ចោទពីបទគំរាមកំហែងថា នឹងសម្លាប់ និងបរិហារកេរ្តិ៍ជាសាធារណៈ ក្នុងរឿងឆាតសុំស្រលាញ់ស្ត្រីរងគ្រោះតាមបណ្តាញទំនាក់ទំនងសង្គមមិនបានសម្រេច។
ជនបែកស្លុយនេះ ឈ្មោះ កន ដេត អាយុ២៩ឆ្នាំ ត្រូវបានអនុរក្សពន្ធនាគារព្រៃ.ស បញ្ជូនមកសាលាដំបូងរាជធានីភ្នំពេញ កាលពីថ្ងៃទី៤ ខែមីនា ឆ្នាំ២០១៩ ដើម្បីបើកសវនាការជំនុំជម្រះជាសាធារណៈ ។ សវនាការនោះ មានលោក តុប ឈុនហេង អនុប្រធានសាលាដំបូងរាជធានីភ្នំពេញ ជាប្រធានក្រុមប្រឹក្សានិងលោក ស៊ិន វិរៈ ជាតំណាងអយ្យការ។
ក្នុងសវនាការជនជាប់ចោទ បានសារភាពថា ខ្លួនពិតជាបានឆាតសុំស្រលាញ់ជនរងគ្រោះតាមប្រព័ន្ធបណ្តាញទំនាក់ទំនងសង្គមពិតប្រាកដមែន។ ប៉ុន្តែជនរងគ្រោះមិនព្រមឆ្លើយតប ទើបធ្វើឲ្យខ្លួនខឹងសម្បា ហើយក៏គំរាមសម្លាប់តែម្តង។
ចំណែកស្ត្រីរងគ្រោះបានបញ្ជាក់ថា ខ្លួនពុំដែលស្គាល់បុរសរូបនេះទេ ហើយខ្លួនក៏មានប្តីរួចដែរ ទើបខ្លួនមិនតបឆាតបែបផ្ដេសផ្ដាសបែបនេះ។ ប៉ុន្តែបានធ្វើឲ្យប្តីយល់ច្រឡំ រហូតចុះចេញពីផ្ទះ។ ដូច្នេះខ្លួនមានការខូចចិត្តជាខ្លាំងចំពោះទង្វើរបស់បុរសរូបនេះ ហើយខ្លួនសូមទាមទារសំណងជំងឺចិត្តចំនួន១០ម៉ឺនដុល្លារ។
គួរបញ្ជាក់ថា នាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនបុរសរូបនេះកាលពីថ្ងៃទី១៩ ខែវិច្ឆិកា ឆ្នាំ២០១៨ ដែលបាននិយាយគំរាម តាមប្រព័ន្ធបណ្តាញសង្គមប៉ុនប៉ងសម្លាប់ស្ត្រីរងគ្រោះ ព្រោះមិនអាចតាមស្រលាញ់បាន។
ពេលជនរងគ្រោះមិនបានឆ្លើយតប ជនសង្ស័យនោះ បានសរសេរសារបង្ហោះ (comment/post) និងបន្ត ផ្ញើសារ (messenger)បន្ថែមទៀត ក្នុងន័យតាមស្រឡាញ់ទៅរំខានច្រើនដង រហូតជនរងគ្រោះ បានប្លុកគណនី (Block) តាមរំខានសុំស្រឡាញ់នោះ ដែលបណ្តាលឲ្យជនសង្ស័យរូបនោះ មានការខឹងសម្បាយ៉ាងខ្លាំង ហើយបាននិយាយគំរាមថា នឹងតាមព្យាបាទជារៀងរហូត។
ជនសង្ស័យ កន ដេត បានបង្កើតគណនីជាច្រើនតាមរំខាន និងបានសរសេរអត្ថបទអសុរោះ ជេរប្រមាថបរិហារកេរ្តិ៍ជនរងគ្រោះ ក្រុមគ្រួសារ មិត្តភ័ក្ដិទាំងឡាយ និងបានផ្ញើសារជាសំឡេង គំរាមថា នឹងសម្លាប់ជនរងគ្រោះផងដែរ។ អំពើគំរាមកំហែងតាមសម្លាប់នោះ បាននាំឲ្យមានការប្តឹងទៅសមត្ថកិច្ច ដើម្បីចាត់វិធានការណ៍ រាំងស្កាត់ក្នុងការការពារសន្តិសុខផ្ទាល់ខ្លួន។
បន្ទាប់ពីបញ្ចប់ការសួរដេញដោលរួចហើយ តុលាការបានលើកពេលប្រកាសសាលក្រមរឿងក្តីនេះ ទៅរសៀលថ្ងៃទី១៨ ខែមិនា ឆ្នាំ២០១៩ ខាងមុខវិញ៕
Source: Kampuchea Thmey Daily
0 Comments