កណ្តាល ៖ នគរបាលស្រុកស្អាងបានបើកប្រតិបត្តិការបង្ក្រាបបទល្មើលគ្រឿងញៀនឃាត់ខ្លួនជនសង្ស័យម្នាក់ដកហូតបានថ្នាំញៀនចំនួន១៩កញ្ចប់កាលពីនៅថ្ងៃ អាទិត្យ ១២រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ០៣ ខែ មីនា ឆ្នាំ២០១៩ វេលាម៉ោង ១៦និង០០នាទី នៅចំណុច ផ្ទះរបស់ឈ្មោះ ស ណូ ភូមិសំរោង ឃុំក្រាំងយ៉ូវ ស្រុកស្អាង ខេត្តកណ្តាល។
លោកវរសេនីយ៍ឯក សេង សុជាតិអធិការនគរបាលស្រុកស្អាងបានឲ្យដឹងថា ជនសង្ស័យឈ្មោះ ស ណូ ភេទប្រុស អាយុ៥០ឆ្នាំ ជនជាតិខ្មែរ មុខរបរជាងជួសជុលកង់ ទីលំនៅបច្ចុប្បន្នភូមិ សំរោង ឃុំក្រាំងយ៉ូវ ស្រុកស្អាង ខេត្តកណ្តាល។ វត្ថុតាងចាប់យករួមមាន - ម្សៅក្រាមពណ៌សថ្លាសង្ស័យថា ជាសារធាតុញៀន(ម៉ាទឹកកក) ចំនួន ១៩កញ្ចប់ ក្នុងនោះ១កញ្ចប់ធំ និងតូច ១៨កញ្ចប់។
លោកអធិការបញ្ជាក់ថា ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ ។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយ កម្លាំងប៉ុស្តិ៍នគរបាលរដ្ឋបាលក្រាំងយ៉ូវ បានចុះដល់ចំណុចកើតហេតុ។
ដោយមានការចូលរួមពីលោកមេភូមិ សំរោង សមត្ថកិច្ចនគរបាល បានបន្តធ្វើការត្រួតពិនិត្យឆែកឆេរលំនៅឋានឈ្មោះ ស ណូ រកឃើញម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ១៩កញ្ចប់ ក្នុងនោះ ធំ ០១កញ្ចប់ និងតូច ១៨កញ្ចប់ រួចឃាត់ខ្លួនជនសង្ស័យ រួមនឹងវត្ថុតាង បញ្ជូនមកប៉ុស្តិ៍នគរបាលរដ្ឋបាលក្រាំងយ៉ូវ ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ស ណូ បានសារភាពថា ខ្លួនបានទិញគ្រឿងញៀន(ម៉ាទឹកកក)ចំនួន ០១កញ្ចប់ធំ តម្លៃ ៥០០,០០០៛ ពីបុរសម្នាក់មិនស្គាល់ឈ្មោះ នៅចំណុចវត្តធនមន្ត ភូមិ ទួលសូភី ឃុំព្រែកគយ ស្រុកស្អាង ខេត្តកណ្តាល ដើម្បីយកមករំលែកលក់ក្នុង ០១កញ្ចប់តូច តម្លៃ ២០,០០០៛ ទៅ ៣០,០០០៛។
បច្ចុប្បន្នជនសង្ស័យ បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវិធី៕
Source: Kampuchea Thmey Daily
0 Comments