សៀមរាប ៖ អធិការនគរបាលស្រុកជីក្រែង បានឲ្យដឹងថា មានករណីគ្រោះថ្នាក់ចរាចរណ៍មួយបានកើតឡើង ដោយសារតែងងុយដេកនៅបន្តបើករថយន្តហើយក៏ងោកមួយផាំងទៅបុកចំចំហៀងរថយន្តមួយគ្រឿងទៀត ក្នុងទិសដៅច្រាស់គ្នា បណ្តាលឲ្យបុរសម្នាក់ស្លាប់ និងម្នាក់ទៀតរងរបួស។
ហេតុការណ៍នេះ កើតឡើងនៅរំលងអធ្រាត្រឈានថ្ងៃទី៤ខែ មីនា ឆ្នាំ២០១៩ ភូមិចក ឃុំសង្វើយ ស្រុកជីក្រែង ខេត្តសៀមរាប លើផ្លូវជាតិលេខ៦។
អធិការនគរបាលស្រុកជីក្រែង គឺ លោកវរសេនីយ៍ឯក សុខ សុទ្ធាវុធ បានឲ្យដឹងនៅរសៀលថ្ងៃទី០៤នេះថា ជនរងគ្រោះទី១.ឈ្មោះ ហ៊ា សាវឿន ភេទប្រុស នៅភូមិកាច់ត្រក ឃុំលាយបូរ ស្រុកត្រាំកក់ ខេត្តតាកែវ (ស្លាប់) ជាអ្នកបើកបររថយន្តម៉ាករថយន្តហ៊ីយ៉ាន់ដាយ ពាក់ស្លាកលេខ 3A 6829 និងទី២.ឈ្មោះ គឿត សុគុណ ភេទប្រុស អាយុ២៥ឆ្នាំ នៅភូមិបឹងកន្តួត ឃុំបឹងកន្តួត ស្រុកក្រគរ ខេត្តពោធិ៍សាត់(របួសស្រាល) ជាអ្នករួមដំណើរ។
លោកបន្តថា រថយន្តទាំងពីរគ្រឿងបើកបញ្ច្រាសទិសគ្នាដល់ចំណុចកើតហេតុ រថយន្តហ៊ីយ៉ាន់ដាយបានរេចង្កូតទៅបុករថយន្ត មកពីទិសខាងលិចមិនស្គាល់ម៉ាក ហើយ រថយន្តមិនស្គាល់ម៉ាក់បានបើកគេចខ្លួនបាត់ស្រមោល។ លោកបន្តថា ករណីនេះគឺបណ្តាលមកពីអ្នកបើកបរមានភាពងងុយដេក រួចគ៏ជ្រុលទៅបុករថយន្តមួយគ្រឿងទៀត បណ្តាលឲ្យបុរសម្នាក់ស្លាប់ និងម្នាក់ទៀតរងរបួស។
ក្រោយពីពិនិត្យ និងវាស់វែងរួចសមត្ថកិច្ច បានយកវត្ថុតាងមករក្សាទុកនៅអធិការដ្ឋាននគរបាលស្រុក និងធ្វើការស្រាជ្រាវរករថយន្តម្ខាងទៀត ដើម្បីកសាងសំណុំរឿងតាមផ្លូវច្បាប់។ ចំណែកអ្នករងរបួសស្រាល បានបញ្ជូនត្រឡប់ទៅលំនៅឋានវិញ ចំពោះសាកសពកម្លាំងសមត្ថកិច្ច បានប្រគល់ជូនក្រុមគ្រួសារនៅយប់ថ្ងៃដដែល យកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments