ភ្នំពេញ ៖ យុវជនងុបងល់នឹងថ្នាំញៀនម្នាក់ ក្នុងចំណោមបក្ខពួក៣នាក់ ត្រូវបានសមត្ថកិច្ចចាប់ខ្លួនចោទប្រកាន់ ពីបទលួចមានស្ថានទម្ងន់ទោស បន្ទាប់ពីពួកគេធ្វើសកម្មភាពចាប់ក្រៀកជនរងគ្រោះ ច្របាច់កប្លន់យកលុយ និងទូរស័ព្ទរួចមកហើយនាំគ្នាគេចខ្លួនអស់ កាលពី៤ថ្ងៃមុនពេលឃាត់ខ្លួននៅល្ងាចថ្ងៃទី៧ ខែមីនា ឆ្នាំ២០១៩ នៅសង្កាត់ទឹកថ្លា ខណ្ឌសែនសុខ។
ជនសង្ស័យដែលត្រូវបានចាប់ខ្លួនខាងលើឈ្មោះ ម៉ៅ យ៉ាវ ភេទប្រុស អាយុ៣០ឆ្នាំគ្មានមុខរបរពិតប្រាកដ និងស្នាក់នៅចល័តតាមផ្ទះជួលក្នុងរាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យត្រូវបានចាប់ខ្លួនតាមបណ្តឹងរបស់ជនរងគ្រោះម្នាក់ឈ្មោះ រស់ រ៉ង ភេទប្រុស អាយុ១៤ឆ្នាំ មានទីលំនៅម្តុំភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ។
តាមខ្លឹមសារបណ្តឹងរបស់ជនរងគ្រោះជាដើមបណ្តឹងបានឲ្យដឹងថា នៅមុនពេលកើតហេតុខ្លួនបានកំពុងអង្គុយលេងនៅក្បែរសាលារៀនអនុវត្តដែលមានទីតាំងនៅសង្កាត់ទឹកល្អក់៣ ខណ្ឌទួលគោក។ នៅខណៈនោះស្រាប់តែជនសង្ស័យខាងលើ (ម៉ៅ យ៉ាវមហា) រួមនឹងបក្ខពួក២នាក់ផ្សេងទៀត បានចាប់ក្រៀកខ្លួនរុញឲ្យឡើងជិះរ៉ឺម៉កម៉ូតូកង់៣ ម៉ាកpass app សំដៅយកមកភូមិត្រពាំងឈូកម្តុំមុខពេទ្យលោកសង្ឃ អតីតទីផ្សារលក់ថ្នាំញៀន។ ពេលមកដល់ពួកគេបានចាប់ក្រៀក
ច្របាច់កគាត់ ហើយបក្ខពួករបស់គេ២នាក់ទៀតនាំលូកឆែកឆេរក្នុងហៅប៉ៅខោយកលុយអស់ចំនួន៤២ម៉ឺន និងទូរស័ព្ទម៉ាកអាយហ្វូនហ្វាយ ១គ្រឿង។ ក្រោយមកពួកគេបាននាំគាត់ទៅបង្ខំឲ្យជក់ថ្នាំញៀនជាមួយគ្នានៅទីនោះ រួចទើបដឹកគាត់យកមកដាក់ចោលរួចនាំគ្នាគេចខ្លួនបាត់អស់ទៅ។
ជនរងគ្រោះបានបន្តថា រយៈពេល៣ថ្ងៃក្រោយមកគឺនៅថ្ងៃទី០៧ ខែមីនា ឆ្នាំ២០១៩ វេលាម៉ោង៤រសៀល ខ្លួនបានប្រទះឃើញបក្ខពួកជនសង្ស័យម្នាក់កំពុងឈរនៅមុខមន្ទីរពហុព្យាបាល នៅភូមិត្រពាំងឈូក សង្កាត់ទឹកថ្លា ក៏ប្រាប់បងប្អូនឲ្យដឹងហើយក៏បាននាំគ្នាចាប់ខ្លួនជនសង្ស័យរូបនេះ(ឈ្មោះ ម៉ៅ យ៉ាវមហា) យកមកប្រគល់ឲ្យសមត្ថកិច្ចនគរបាលមូលដ្ឋានប៉ុស្តិ៍ទឹកថ្លាចាត់ការតាមផ្លូវច្បាប់តែម្តង។
ជនជាប់ចោទឈ្មោះ ម៉ៅ យ៉ាវមហា បានសារភាពថា នៅពេលធ្វើសកម្មភាពវាយជនរងគ្រោះគំរាមប្លន់យកលុយនិងទូរស័ព្ទនោះ ខ្លួនមានបក្ខពួក២នាក់ផ្សេងទៀតមានឈ្មោះ ប៉ុច និងឈ្មោះតាំង ជាម្ចាស់រ៉ឺម៉កម៉ូតូកង់៣ ម៉ាកផាសអាប់នោះ។
បន្ទាប់មកបានមកផ្ទះឈ្មោះ ប៊ុក ដោយយកលុយនិងទូរស័ព្ទឈ្មោះ ប៊ុក ទុកមុនពេលចែកគ្នាចាយនិងទិញថ្នាំញៀនយកមកជក់(សេព)ទាំងអស់គ្នា៕
Source: Kampuchea Thmey Daily
0 Comments