សៀមរាប ៖ សមត្ថកិច្ចជំនាញរបស់ខេត្តសៀមរាប បានចុះទៅឆែកឃ្លាំងស្តុកឈើមួយកន្លែង ក្នុងភូមិសាស្ត្រស្រុកស្វាយលើ ក្រោយសង្ស័យថា គ្មានច្បាប់អនុញ្ញាតិ ហើយឃ្លាំងខាងលើមានម្ចាស់ឈ្មោះលោក ធឹង លាងស្រេង។
លោកម៉ែន វុទ្ធី នាយសង្កាត់រដ្ឋបាលព្រៃឈើស្រុកស្វាយលើ បានឲ្យដឹងនៅព្រឹកថ្ងៃទី០៧នេះថា ពិតជាមានការចុះឆែកទីតាំងស្តុកឈើ នៅភូមិអង្កាញ់ ឃុំស្វាយលើ ស្រុកស្វាយលើ កាលពីរសៀលថ្ងៃទី០៦មីនា ឆ្នាំ២០១៩នេះមែន ហើយម្ចាស់ទីតាំងឈ្មោះធឹង លាងស្រេង។ លោកបន្តថា ការឆែកនេះមានកម្លាំងកងរាជអាវុធហត្ថខេត្តស្រុក និងរដ្ឋបាលព្រៃឈើស្រុក ដោយយោងតាមការរាយការណ៍របស់អ្នកកាសែត ដល់អាវុធហត្ថផ្ទៃប្រទេស។
ទើបអាវុធហត្ថផ្ទៃប្រទេសបញ្ជាឲ្យកម្លាំងអាវុធហត្ថខេត្ត សហការជាមួយជំនាញរដ្ឋបាលព្រៃឈើចុះមកពិនិត្យ។ លោកបន្តថា ជាលទ្ធផលរកឃើញឈើសន្និធិ៥០,១០២ម៉ែត្រគូប តែជាឈើមានច្បាប់ដឹកជញ្ជូន និងសន្និធិ។ លោកបានបន្តថា តាមពិតទីតាំងខាងលើ គឺមានច្បាប់អនុញ្ញាតិទាំងដឹកជញ្ជូននិងសន្និធិ ត្រឹមត្រូវ ។ប៉ុន្តែការចុះឆែកនេះ គឺក្រោយទទួលសេចក្តីរាយការណ៍ ថាឈើខាងលើ មិនមាន ច្បាប់។ លោកបញ្ជាក់ថា ក្រោយពេលពិនិត្យទាំងឈើក្នុងទីតាំង ទាំងឈើនៅលើរថយន្ត ប្រគល់ឲ្យម្ចាស់វិញ។
ជាមួយនឹងករណីនេះដែរ សេចក្តីរាយការណ៍ពីស្រុកស្វាយលើ បានឲ្យដឹងថា លោក ធឹង លាងស្រេង ធ្លាប់ជាអ្នករកស៊ីឈើ ល្មើសច្បាប់ម្នាក់ដែលដឹកចេញពីខេត្តព្រះវិហារ ឆ្ពោះមកកាន់ខេត្តសៀមរាប។ តែបច្ចុប្បន្នល្បីថា លោក ធឹង លាងស្រេង បានរត់ការសុំច្បាប់(PC)ពីជំនាញរដ្ឋបាលព្រៃឈើ ទាំងដេប៉ូ និងការដឹកគឺមានច្បាប់ទាំងអស់។ ចឹងហើយបានជាប្រតិបត្តិការរបស់សមត្ថកិច្ចជំនាញខាងលើត្រូវបរាជ័យទៅវិញនោះ៕
Source: Kampuchea Thmey Daily
0 Comments