ភ្នំពេញ ៖ មជ្ឈមណ្ឌលអភិវឌ្ឍន៍កម្ពុជា កាលពីថ្ងៃទៅ០៦ ខែមីនា ឆ្នាំ២០១៩ បានចេញសេចក្តីថ្លែងការណ៍មួយអះអាងថា ដំណើរការដក EBA ពីកម្ពុជា គណៈកម្មការអឺរ៉ុប បានមើលរំលងនូវកិច្ចខិតខំប្រឹងប្រែងរបស់ខ្លួនក្នុងការចូលរួមចំណែកកសាងកម្ពុជា ដែលស្ថិតក្នុងសង្គ្រាមអស់ជាច្រើនទសវត្សរ៍ និងរងការបំផ្លិចបំផ្លាញស្ទើរតែទាំងស្រុងឲ្យប្រែក្លាយទៅជាប្រទេសដែលគេទទួលស្គាល់ទូទាំងពិភពលោក។
សេចក្តីថ្លែងការណ៍របស់មជ្ឈមណ្ឌលអភិវឌ្ឍន៍កម្ពុជាបានលើកឡើងថា ក្នុងនាមជាស្ថាប័នស្រាវជ្រាវមិនមែនរដ្ឋាភិបាល ដើម្បីការអភិវឌ្ឍប្រកបដោយចីរភាព និងសន្តិភាពនៅកម្ពុជា បានតាមដានយ៉ាងយកចិត្តទុកដាក់ និងសាទរចំពោះទំនាក់ទំនងទ្វេភាគីរវាងសហភាពអឺរ៉ុប និងរាជរដ្ឋាភិបាលកម្ពុជា ដែលបានបង្កើតទំនាក់ទំនងការទូតតាំងពីថ្ងៃទី០១ ខែមករា ឆ្នាំ១៩៩៤ ដែលទំនាក់ទំនងទ្វេភាគីនេះ បានបន្តជំរុញឲ្យមានការកើនឡើងជាលំដាប់នូវកិច្ចសហប្រតិបត្តិការរវាងភាគីទាំងពីរលើវិស័យជាច្រើន។
តាមមជ្ឈមណ្ឌលអភិវឌ្ឍន៍កម្ពុជា ទើបតែមកដល់ថ្ងៃទី០៥ ខែតុលា ឆ្នាំ២០១៨ គណៈកម្មការអឺរ៉ុប ក៏បានជូនដំណឹងស្ដីពីលទ្ធភាពនៃការដកជាបណ្ដោះអាសន្ននៃប្រព័ន្ធអនុគ្រោះពន្ធ "អ្វីៗគ្រប់យ៉ាងលើកលែងតែអាវុធ" ឬ EBA ពីព្រះរាជាណាចក្រកម្ពុជា ទើបទំនាក់ទំនងខាងលើនេះមានការប្រែប្រួល។ មជ្ឈមណ្ឌលអភិវឌ្ឍន៍កម្ពុជា បានសង្កេតមើលឃើញពីកិច្ចខិតខំប្រឹងប្រែងក្នុងការផ្ដល់កិច្ចសហប្រតិបត្តិការទាំងស្រុងឥតឈប់ឈររបស់រាជរដ្ឋាភិបាលកម្ពុជា ដើម្បីផ្ដល់ការឆ្លើយតបលើបញ្ហានេះ ដោយចុងក្រោយបង្អស់ គឺការសរសេរបញ្ជាក់ពីការផ្ញើលិខិតរបស់ក្រសួងការបរទេស អំពីការឆ្លើយតបជាលាយលក្ខណ៍អក្សរចំពោះកម្រងសំនួរស៊ើបអង្កេតទៅកាន់សហភាពអឺរ៉ុប បន្ទាប់ពីមានបេសកម្មស្វែងរកការពិតរបស់សហភាពអឺរ៉ុប នៅកម្ពុជាចាប់ពីថ្ងៃទី០៥ ដល់ទី១១ ខែកក្កដា ឆ្នាំ២០១៨។ ជាមួយនឹងការលើកឡើងខាងលើនេះ មជ្ឈមណ្ឌលអភិវឌ្ឍន៍កម្ពុជា បានសម្ដែងក្តីបារម្ភលើវិធានការណ៍បច្ចុប្បន្នរបស់សហភាពអឺរ៉ុប ដែលសំរេចចាប់ផ្តើមពិចារណានីតិវិធីជាផ្លូវការលើការដល់ប្រព័ន្ធអនុគ្រោះពន្ធពីកម្ពុជា ចាប់ពីថ្ងៃទី១១ ខែកុម្ភៈ ឆ្នាំ២០១៩។
មជ្ឈមណ្ឌលអភិវឌ្ឍន៍កម្ពុជា បានអំពាវនាវចំពោះសហចំពោះគណៈកម្មការអឺរ៉ុបធ្វើការពិនិត្យឡើងវិញដោយម៉ត់ចត់ជាទីបំផុតលើសេចក្តីសម្រេចនេះ ក្នុងឥរិយាបទស្និទ្ធស្នាល ដោយពិចារណាលើផលអវិជ្ជមានទៅលើជីវភាពរបស់ប្រជាជនកម្ពុជារាប់លាននាក់ និងការអភិវឌ្ឍជារួមរបស់កម្ពុជា ដែលជាការចូលរួមចំណែករបស់សហភាពអឺរ៉ុបអស់រយៈពេលជាង២៥ ឆ្នាំកន្លងមកនេះ។ ការនាំចេញរបស់កម្ពុជាទៅកាន់សហភាពអឺរ៉ុប បានកើនឡើងទ្វេដង ក្នុងចន្លោះឆ្នាំ២០១២ និង២០១៦ ពីជាង៣ពាន់លាន ទៅដល់ជាង៦ពាន់លានដុល្លារសហរដ្ឋអាមេរិក ហើយបានផ្ដល់ឱកាសការងារជាង៤០ ម៉ឺនកន្លែងដល់ប្រជាជនកម្ពុជា។ មជ្ឈមណ្ឌលអភិវឌ្ឍន៍កម្ពុជាយល់ឃើញថា ក្នុងដំណើរការដោយប្រព័ន្ធអនុគ្រោះពន្ធពីកម្ពុជាគណៈកម្មការអឺរ៉ុប បាននឹងកំពុងតែមើលរំលងនូវកិច្ចខិតខំប្រឹងប្រែងរបស់ខ្លួនក្នុងការចូលរួមចំណែកកសាងកម្ពុជា ដែលស្ថិតក្នុងសង្គ្រាមអស់ជាច្រើនទសវត្សរ៍ និងរងការបំផ្លិចបំផ្លាញស្ទើរតែទាំងស្រុងឲ្យប្រែក្លាយទៅជាប្រទេសដែលគេទទួលស្គាល់ទូទាំងពិភពលោក ថាជាប្រទេសមានសេដ្ឋកិច្ចរីកចម្រើនជាងគេបំផុតលំដាប់ទី៦ ជាមួយនឹងកំណើនសេដ្ឋកិច្ច៧ ភាគរយជារៀងរាល់ឆ្នាំ ក្នុងរយៈពេលជាងពីរទសវត្សរ៍ចុងក្រោយនេះ។
ការចោទប្រកាន់របស់គណៈកម្មការអឺរ៉ុបពីកម្ពុជាលើកម្ពុជាអំពីការរំលោភសិទ្ធិមនុស្សនេះ គឺពុំបានឆ្លុះបញ្ចាំងពីស្ថានភាពជាក់ស្ដែងនៅក្នុងប្រទេស ដែលភាគច្រើននៃប្រជាជនកម្ពុជាកំពុងតែសប្បាយរីករាយ និងភាពរីកចម្រើនជាបន្តបន្ទាប់លើជីវភាពប្រចាំថ្ងៃរបស់ពួកគាត់។ គណៈកម្មការអឺរ៉ុបមើលរំលងលើកិច្ចខិតខំប្រឹងប្រែង និងការវិវត្តជាវិជ្ជមានរបស់កម្ពុជា លើការដាក់ចេញវិធានការ និងការវាយតម្លៃដើម្បីឆ្លើយតបទៅនឹងស្ថានភាពសិទ្ធិមនុស្សព្រមទាំងបន្តពង្រឹងសេរីភាពក្នុងជីវិតប្រចាំថ្ងៃ និងក្នុងនយោបាយការប្ដេជ្ញាចិត្តរបស់ខ្លួនចំពោះអនុសញ្ញាស្នូលចំនួន១៥ របស់អង្គការសហប្រជាជាតិ និងអង្គការពលកម្មអន្តរជាតិ។ ខណៈដែលកំពុងដាក់សម្ពាធលើរាជរដ្ឋាភិបាលកម្ពុជា ទាក់ទងទៅនឹងបញ្ហាសិទ្ធិមនុស្ស សហភាពអឺរ៉ុបមានទំនោរទៅកាន់គណបក្សប្រឆាំង ដែលសំបូរតែវោហាស័ព្ទ និងបានបង្ហាញស្តង់ដារពីរក្នុងការប្រតិបត្តិគុណតម្លៃស្នូល នៃសិទ្ធិមនុស្ស និងលទ្ធិប្រជាធិបតេយ្យនៅពេល ដែលនិយាយអំពីផលប្រយោជន៍ និងភាពអនុគ្រោះផ្នែកពាណិជ្ជកម្ម។ នេះមានន័យយ៉ាងសាមញ្ញថា ការចោទប្រកាន់អំពីការរំលោភសិទ្ធិមនុស្សមិនមែនជាចំណុចសំខាន់នៃការចរចាលើការផ្ដល់ប្រព័ន្ធ EBA ពីកម្ពុជានោះទេ។
ដំណើរការដកប្រព័ន្ធ EBA និងមិនត្រឹមតែជះឥទ្ធិពលអវិជ្ជមានលើការអភិវឌ្ឍន៍កម្ពុជា និងកម្មករកម្មការនីប្រមាណ៧០ ម៉ឺននាក់ នៅក្នុងវិស័យកាត់ដេរសម្លៀកបំពាក់នៅកម្ពុជាប៉ុណ្ណោះទេ ប៉ុន្តែថែមទាំងប៉ះពាល់យ៉ាងធ្ងន់ធ្ងរទៅដល់ជីវភាពរស់នៅរបស់ក្រុមគ្រួសារកម្មករ កម្មការិនី រាប់ពាន់គ្រួសារ ក៏ដូចជាអ្នកផ្ដល់សេវាកម្មជាច្រើនផ្សេងទៀតក្នុងឧស្សាហកម្មកាត់ដេរ។
ជាមួយគ្នានោះ មជ្ឈមណ្ឌលអភិវឌ្ឍន៍កម្ពុជាសង្ឃឹមយ៉ាងមុតមាំថា សហភាពអឺរ៉ុបនិងគណៈកម្មការអឺរ៉ុប នឹងពិចារណាពីផលវិបាកនៃការដកប្រព័ន្ធអនុគ្រោះពន្ធនេះ ទៅលើប្រជាជនកម្ពុជានិងអំពាវនាវឲ្យសហភាពអឺរ៉ុប និងដៃគូពាក់ព័ន្ធទាំងអស់ ដែលមានបំណងចង់ឃើញសន្តិភាព ការអភិវឌ្ឍន៍វិបុលភាព និងការលើកស្ទួយសិទ្ធិមនុស្ស និងលទ្ធិប្រជាធិបតេយ្យនៅក្នុងព្រះរាជាណាចក្រកម្ពុជា បន្តពង្រីកកិច្ចសហប្រតិបត្តិការឲ្យកាន់តែស៊ីជម្រៅ និងគ្រប់ជ្រុងជ្រោយលើគ្រប់វិស័យជាមួយកម្ពុជា៕
Source: Kampuchea Thmey Daily
0 Comments