ក្រុមប្រឹក្សារាជធានី និងជាប្រធានសមាគមជាតិក្រុមប្រឹក្សារាជធានី ខេត្ត ជួបពិភាក្សាការងារជាមួយសមាគមអន្តរជាតិអភិបាលក្រុងប្រើប្រាស់ភាសាបារាំង លើគម្រោង រៀបចំក្រុង

ភ្នំពេញ ៖ ក្រុមប្រឹក្សារាជធានីភ្នំពេញ និងជាប្រធានសមាគមជាតិក្រុមប្រឹក្សារាជធានី ខេត្ត បានជួបពិភាក្សាការងារជាមួយលោក ព្យែរ ប៊ៃយ៉េ អគ្គលេខាធិការសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) អំពីការចាប់ផ្តើមអនុវត្តគម្រោង "ការពង្រឹងសមត្ថភាពរដ្ឋបាលថ្នាក់ក្រោមជាតិនៅកម្ពុជា លើវិស័យរៀបចំក្រុង។

មន្ត្រីរដ្ឋបាលរាជធានីភ្នំពេញបានអោយដឹងថា នៅព្រឹកថ្ងៃទី៧ មីនា ឆ្នាំ២០១៩, លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងជាប្រធានសមាគមជាតិក្រុមប្រឹក្សារាជធានី ខេត្ត បានជួបពិភាក្សាការងារជាមួយលោក ព្យែរ ប៊ៃយ៉េ អគ្គលេខាធិការសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) អំពីការចាប់ផ្តើមអនុវត្តគម្រោង "ការពង្រឹងសមត្ថភាពរដ្ឋបាលថ្នាក់ក្រោមជាតិនៅកម្ពុជា លើវិស័យរៀបចំក្រុងប្រកបដោយនិរន្តរភាព ដើម្បីរៀបចំឡើងវិញតំបន់អនាធិបតេយ្យ និងធានានូវលទ្ធភាពទទួលបានសេវាកម្មសំខាន់ៗសម្រាប់ជនក្រីក្រ"។

ការអនុវត្តគ្រោងរយៈពេល ៣ ឆ្នាំ (២០១៩-២០២១) ទទួលបានការគាំទ្រពី EU ក្នុងថវិកាប្រមាណ ១ លានអឺរ៉ូ ធ្វើឡើងក្នុងភាពជាដៃគូសហការរវាង AIMF រដ្ឋបាលរាជធានីភ្នំពេញ សាលាក្រុងប៉ារីស សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន សមាគមជាតិក្រុមប្រឹក្សារាជធានី ខេត្ត និងប្រតិភូសហភាពអឺរ៉ុបប្រចាំព្រះរាជាណាចក្រកម្ពុជា។

គម្រោងនេះបានដៅលទ្ធផលរំពឹងទុកចំនួនបីគឺ៖ លទ្ធផលទី១ កែលំអជីវភាពរស់នៅរបស់សហគមន៍នៅតាមដងប្រឡាយស្ទឹងមានជ័យ តាមរយៈការសម្របសម្រួលជាមួយរដ្ឋបាលនានា និងការលើកកម្ពស់សមត្ថភាពរបស់រដ្ឋបាលរាជធានីភ្នំពេញ ក្នុងការធ្វើផែនការនិងការគ្រប់គ្រងទីប្រជុំជន។ លទ្ធផលទី២ កែលំអការអនុវត្តច្បាប់ និងការសម្របសម្រួលរវាងរដ្ឋបាលនៅតាមថ្នាក់នានា ដោយប្រើប្រាស់លទ្ធផលនៃគំនិតផ្តួចផ្តើមសាកល្បងនានា និងតាមរយៈយុទ្ធសាស្ត្រសម្របសម្រួលមតិ។ លទ្ធផលទី៣ ពង្រឹងតួនាទីរបស់សមាគមជាតិក្រុមប្រឹក្សារាជធានី ខេត្ត និងសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន ដើម្បីបំពេញបេសកកម្មរបស់ខ្លួនក្នុងការសម្របសម្រួលមតិ ការកសាងសមត្ថភាពសមាជិក ការផ្លាស់ប្តូរបទពិសោធន៍ និងការអនុវត្តល្អ។

បន្ទាប់ពីកិច្ចពិភាក្សារួច ភាគីទាំងពីរបានចុះហត្ថលេខាលើអនុស្សរណៈយោគយល់គ្នាដើម្បីអនុវត្តគម្រោងខាងលើនេះផងដែរ៕