ក្លិបបាល់ទាត់បឹងកេតអែហ្វស៊ី ម្ចាស់ជើងឯកពានរង្វាន់លីគកំពូលកម្ពុជា៣សម័យកាល បានបញ្ជូនកីឡាករចំនួន៣នាក់ ទៅពិនិត្យនិងព្យាបាលរបួសនៅទីក្រុងហូជីមិញ ប្រទេសវៀតណាម នៅថ្ងៃព្រហស្បតិ៍ ទី២៨ ខែកុម្ភៈ ឆ្នាំ២០១៩ ថ្មីៗនេះ មុនពេលរដូវកាលថ្មីឆ្នាំ២០១៩ មកដល់ក្នុងពេលខាងមុខ។
យោងតាមការបញ្ជាក់នៅលើវិបសាយផ្លូវការរបស់ក្លិបបានលើកឡើងថា កីឡាករទាំង៣រូបដែលនាំទៅព្យាបាលនៅក្រៅប្រទេសនេះគឺកីឡាករម៉ាត់ នូរុណ និង ម៉ែន មុន្នីរ៉ា ត្រូវវះកាត់ព្យាបាលរបួសសរសៃជង្គង់ (ACL) ដែលរបួសនេះបានកើតឡើងអំឡុងការហ្វឹកហាត់ត្រៀមរដូវកាលថ្មីកន្លងមក។ចំណែកកីឡាករមួយរូបទៀតគឺ ពុំ បារាំង ក៏បានរួមដំណើរជាមួយដើម្បីត្រួតពិនិត្យរបួសជង្គង់របស់ខ្លួនផង ប៉ុន្តែមិនធ្ងន់ធ្ងរដូចកីឡាករ២រូបផ្សេងទៀតទេ។
យ៉ាងណាក្តីក្លិបបឹងកេត បានជូនពរដល់កីឡាករទាំងបី ឲ្យទទួលបានជោគជ័យក្នុងការព្យាបាលរបួសរបស់ខ្លួននៅឯប្រទេសវៀតណាមនេះ ដើម្បីឆាប់ជាសះស្បើយ និងត្រឡប់មកជួយក្លិបវិញនៅថ្ងៃខាងមុខ។ នេះជាវិបត្តិកីឡាករមួយរបស់ក្រុមបឹងកេត ខណៈក្រុមនេះនៅតែជាបេក្ខភាពមិនអាចមើលរំលងបានក្នុងការប្រជែងយកជើងឯកទាំងក្នុងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន នៅរដូវកាលថ្មី។
សូមរំលឹកថា ក្រុមបឹងកេត កាលពីរដូវកាលឆ្នាំ២០១៨ កន្លងទៅ បានបញ្ចប់ក្នុងចំណាត់ថ្នាក់លេខ២ Metfone Cambodian League មាន៤៩ពិន្ទុ ក្រោយឈ្នះបាន១៥ លើក ហើយស្មើគ្នាបាន៤ លើកនិង ចាញ់៣ប្រកួត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមបឹងកេត បានធ្លាក់ចេញត្រឹមវគ្គ៨ក្រុមចុងក្រោយ ក្រោយចាញ់ក្រុមណាហ្គាវើល៕
Source: Kampuchea Thmey Daily
0 Comments