ភ្នំពេញ ៖ សំណង់ផ្ទះល្វែងមួយកន្លែង ដែលលួចសង់រំលោភលើដីមាត់ប្រឡាយមេសម្រាប់រំដោះទឹកជំនន់ភ្លៀង ដែលត្រូវបានគេហាមឃាត់តាំងពីអតីតអភិបាលក្រុងមុនៗចំនួន៣ជំនាន់មកហើយគ្មានអ្នកណាហ៊ានប៉ះពាល់អនុញ្ញាតឲ្យសាងសង់ ឥឡូវត្រូវបានគេលួចសង់បានសម្រេច នៅត្រឹមជំនាន់លោក ឃួង ស្រេង ឡើងមកធ្វើជាអភិបាលក្រុង(ឬអភិបាលរាជធានីភ្នំពេញ)ថ្មីជំនួសយ៉ាងរំភើយ។
ទីតាំងសំណង់ខុសច្បាប់ដែលបានសង់រំលោភមកលើដីមាត់ប្រឡាយដែលត្រូវគេហាមឃាត់នោះ មានទីតាំងនៅប្រឡាយអូរអាគុជឆ្លងកាត់ផ្លូវលេខ១០១៩(ឬហៅផ្លូវហាណូយ)ស្ថិតក្នុងភូមិរោងចក្រ សង្កាត់គោកឃ្លាង ខណ្ឌសែនសុខ។
កាលពីឆ្នាំ២០១៦លោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ បានបញ្ជាឲ្យមន្ត្រីជំនាញរបស់លោកដឹកនាំកម្លាំងសមត្ថកិច្ច មករុះរើសំណង់ខុសច្បាប់នេះចេញប៉ុន្តែម្ចាស់សំណង់នេះបានសុំឲ្យផ្អាកដោយសុំទុកពេល១ខែ ដើម្បីរុះរើដោយខ្លួនឯង ប៉ុន្តែគេមិនព្រមរុះរើឡើយរហូតអស់រយៈពេលជាច្រើនឆ្នាំ។ ក្រោយមកលោក ប៉ា សុជាតិវង្ស ក៏ត្រូវបានរដ្ឋាភិបាលធ្វើការដោះដូរមុខតំណែងដកលោកចេញដាក់ជំនួសដោយលោក ឃួង ស្រេង ជំនួសវិញក៏ស្រាប់តែម្ចាស់សំណង់ល្មើសច្បាប់នោះមិនព្រមរុះរើទេ បែរជាមានច្បាប់ចេញពីសាលាក្រុងឲ្យសាងសង់បន្តយ៉ាងរំភើយទៅវិញ ធ្វើឲ្យប្រជាជនរស់នៅតំបន់នោះនាំគ្នាហួសចិត្តនិងអស់ជំនឿទៅលើច្បាប់របស់លោកចៅហ្វាយក្រុងថ្មី។
លោក ម៉ូវ ម៉ានិត អភិបាលខណ្ឌសែនសុខ មានប្រសាសន៍ថា ករណីសំណង់មួយកន្លែងនេះ គឺមានច្បាប់មកពីថ្នាក់លើខាងសាលាក្រុងឲ្យសាងសង់ ប៉ុន្តែគ្រាន់តែជាការសម្របសម្រួលគ្នាទេគឺយើងតម្រូវឲ្យគាត់រុះរើមួយល្វែងចេញខាងជាប់ប្រឡាយ ហើយការសុំសាងសង់មួយល្វែងទៀតនេះគឺថ្នាក់លើឲ្យធ្វើការសាងសង់ ប៉ុន្តែមិនធ្វើច្បាប់ឲ្យនិងចេញប្លង់ឲ្យជាផ្លូវការទេ៕
Source: Kampuchea Thmey Daily
0 Comments