ភ្នំពេញ ៖ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានមានប្រសាសន៍ថា ការជ្រៀតជ្រែកចូលកិច្ចការផ្ទៃក្នុងរបស់កម្ពុជា ការដាក់សម្ពាធយកឆន្ទៈប្រទេសធំមកបង្ខំឲ្យកម្ពុជាទទួលយក វាជាការគំរាមកំហែងដ៏ធ្ងន់ធ្ងរដល់ឯករាជ្យ អធិបតេយ្យភាព ក៏ដូចជាគំរាមកំហែងដល់សន្តិភាពនិងស្ថេរភាពកម្ពុជា។ សម្តេចមានប្រសាសន៍ថា ការការពារផលប្រយោជន៍ជាតិពិសេសការពារឯករាជ្យ និងអធិបតេយ្យជាតិ បានក្លាយជាទៅជាអាទិភាពចម្បងក្នុងការងារការទូតរបស់កម្ពុជាផងដែរ។
សម្តេចតេជោនាយករដ្ឋមន្ត្រីបានលើកឡើងបែបនេះ នៅក្នុងពិធីបិទសន្និបាតបូកសរុបការងារក្រសួងការបរទេសនិងសហប្រតិបត្តិការអន្តរជាតិឆ្នាំ២០១៨ និងលើកទិសដៅឆ្នាំ ២០១៩ នាព្រឹកថ្ងៃទី៧ ខែមិនានេះ នៅក្រសួងការបរទេស។
សម្តេចតេជោនាយករដ្ឋមន្ត្រីបានមានប្រសាសន៍ថា «ពិតណាស់ការងារធំទីមួយគឺការពារផលប្រយោជន៍ជាតិ ពិសេសការពារឯករាជ្យនិង អធិបតេយ្យ បានក្លាយជាទៅជាអាទិភាពចម្បងក្នុងការងារការទូតរបស់យើង ក្នុងបរិបទនៃការជ្រៀតជ្រែកចូលកិច្ចការផ្ទៃក្នុងរបស់កម្ពុជា ការដាក់សម្ពាធគាបសង្កត់យកឆន្ទៈប្រទេសធំមកបង្ខំឲ្យយើងទទួលយក ដែលនេះជាការគំរាមកំហែងដ៏ធ្ងន់ធ្ងរដល់ឯករាជ្យអធិបតេយ្យភាពក៏ដូចជាគំរាមកំហែងដល់សន្តិភាព និង ស្ថេរភាពប្រទេសជាតិ»។
សម្តេចតេជោនាយករដ្ឋមន្ត្រីបានបញ្ជាក់អះអាងសាជាថ្មីថា « កម្ពុជា អរគុណប្រទេសនិងស្ថាប័នទាំងអស់ដែលបានជួយឧបត្ថម្ភគាំទ្រដ៏ស្មោះស្ម័គ្រ ក្នុងការស្ដារនិងកសាងជាតិឡើងវិញកន្លងមក។ ប៉ុន្តែយើងមិនប្ដូរអធិបតេយ្យរបស់យើងជាមួយនឹងជំនួយណាជាដាច់ខាត យើងត្រូវបន្តការពារនូវសិទ្ធិអធិបតេយ្យរបស់យើង ក្នុងការធ្វើសេចក្តីសម្រេចចិត្តដោយឯករាជ្យ ដើម្បីការពារប្រយោជន៍គោលរបស់ជាតិយើងការពារសន្តិភាព ភាពសុខសាន្តរបស់ប្រជាជន ប្រឆាំងតបនឹងរាល់ការប៉ុនប៉ងផ្ដួលរំលំរដ្ឋាភិបាលស្របច្បាប់ដែលកើតចេញពីឆន្ទៈនិងការគាំទ្ររបស់ប្រជាជនភាគច្រើនលើសលប់»។
ជាមួយនេះ សម្តេចតេជោ ហ៊ុន សែន ក៏បានគាំទ្រដល់ការប្តេជ្ញាចិត្តរបស់ក្រសួងការបរទេសនិងសហប្រតិបត្តិការអន្តរជាតិនិងគ្រប់ស្ថានបេសកកម្មរបស់កម្ពុជានៅក្រៅប្រទេសក្នុងការតស៊ូដើម្បីការពារយុត្តិធម៌ជូនរាជរដ្ឋាភិបាល ជូនប្រទេសជាតិ និងប្រជាជនកម្ពុជា។ សម្តេចតេជោបានបន្តថា នៅចំពោះមុខសភាពការណ៍តំបន់និងពិភពលោកដែលកំពុងវិវត្តន៍ប្រែប្រួលយ៉ាងឆាប់រហ័សស្មុគស្មាញមិនអាចប៉ាន់ស្មានបាននិងប្រកបដោយគ្រោះថ្នាក់នោះ ការកាច់ចង្កូតនាវាកម្ពុជាទាមទារការថ្លឹងថ្លែងនូវការប្រុងប្រយ័ត្នខ្ពស់។ សម្តេចបន្តទៀតថា ត្រង់នេះហើយ ដែលការអនុវត្តនូវនយោបាយការបរទេសប្រកបដោយភាពបត់បែន វាងវៃតបនឹងការប្រែប្រួលនិងសម្ពាធភូមិសាស្ត្រនយោបាយនិងការប្រកួតប្រជែងដ៏តានតឹងរបស់មហាអំណាចនានានោះមានសារៈសំខាន់បំផុត ដើម្បីរក្សាឲ្យបាននូវលក្ខខណ្ឌចាំបាច់នានាដើម្បីការពារសន្តិភាព ស្ថិរភាពដំណើរការអភិវឌ្ឍប្រទេសជាតិដោយឈរលើគោលការណ៍អព្យាក្រឹត្យអចិន្ត្រៃយ៍និងមិនចូលបក្សសម្ព័ន្ធ។ គោលនយោបាយក្នុងស្រុកនិងគោលនយោ បាយការបរទេសបំពេញឲ្យគ្នាទៅវិញទៅមក ហើយទំនាក់ទំនងមិនអាចកាត់ផ្ដាច់ចេញពីគ្នាបានឡើយ។
សម្តេចបន្តថា យើងត្រូវបន្តអនុវត្តតាម បាវចនា ២ របស់រាជរដ្ឋាភិបាលគឺកែទម្រង់ខាងក្នុង បង្កើតមិត្តខាងក្រៅ ក្នុងស្មារតីពង្រឹងឯករាជ្យ អធិបតេយ្យភាពជាតិ នឹងបន្តបង្កើនទំនាក់ទំនងនិងសកម្មភាពការទូតដើម្បីពង្រឹងនិងពង្រីកចំណងមិត្តភាពនិងសហប្រតិបត្តិការជាមួយប្រទេសនានានៅលើលោកឲ្យកាន់តែច្រើនបន្ថែមទៀតដើម្បីលើកស្ទួយផលប្រយោជន៍ និង កិត្យានុភាពជាតិកម្ពុជា។
សម្តេចតេជោនាយករដ្ឋមន្ត្រីបានធ្វើការកត់សំគាល់ថា ការផ្លាស់ប្ដូរពីរបៀបធ្វើការងារការទូតជាប្រពៃណី មកជាការងារការទូតដែលផ្ដោតសារៈសំខាន់ដល់ការលើកស្ទួយសេដ្ឋកិច្ច វប្បធម៌និង ទេសចរណ៍គឺជាការឆ្លើយតបយ៉ាងត្រឹមត្រូវទៅនឹងសភាពការណ៍ថ្មី ដែលទាមទារឲ្យអ្នកការទូត យើងរួមវិភាគទានកាន់តែធំដល់ការជំរុញសេដ្ឋកិច្ច និងវិនិយោគទាក់ទាញទេសចរណ៍និងការផ្សព្វផ្សាយវប្បធម៌ជាតិខ្មែរ។ សម្តេចតេជោបន្តថា ត្រូវប្រែក្លាយការប្រឈមទាំងឡាយឲ្យក្លាយទៅជាកាលានុវត្តភាពដើម្បីពង្រឹងខ្លួនឯងរស់ដោយខ្លួនឯង និងអភិវឌ្ឍខ្លួនឯង ដោយកាត់បន្ថយការពឹងពាក់លើជំនួយពីខាងក្រៅឲ្យនៅតិចបំផុតតាមដែលអាចធ្វើទៅបាន។ យើងក៏នឹងបន្តរួមវិភាគទានរបស់យើងក្នុងបុព្វហេតុសន្តិភាព ស្ថិរភាពនិងក្នុងការប្រយុទ្ធដោះស្រាយបញ្ហាប្រឈមនានានៅលើលោក តួយ៉ាងប្រឆាំងនឹងភេរវកម្មឧក្រិដ្ឋកម្មឆ្លងដែន ការប្រែប្រួលអាកាសធាតុ ការជួញដូរគ្រឿងញៀននិងមនុស្ស ជំងឺឆ្លង។ល។
សម្តេចតេជោបន្តថា ការងារដែលយើងកំពុងធ្វើក្នុងការត្រៀមរៀបចំធ្វើជាម្ចាស់ផ្ទះនៃកិច្ចប្រជុំអាស៊ានលើកទី១៣ ឆ្នាំ២០២០ គឺជាការចូលរួមចំណែកលើបុព្វហេតុខាងលើតាមរយៈការគាំទ្រពហុភាគីនិយមផង និងការលើកស្ទួយតួនាទីរបស់កម្ពុជាក្នុងការកំណត់របៀបវារៈអន្តរតំបន់ផង។
សម្តេចតេជោបានបន្តទៀតថា ដូចអ្វីដែលសម្តេចបានបញ្ជាក់អះអាងជូនលោកអគ្គលេខាធិការអង្គការសហប្រជាជាតិនៅទីក្រុងញូវយ៉កកន្លងមក កម្ពុជាក៏នឹងបន្តបង្កើនការចូលរួមក្នុងបេសកកម្មរក្សាសន្តិភាពនៅទីណាដែលមានតម្រូវការនេះ គឺជាវិភាគទានដ៏ថ្លៃថ្នូរបំផុតរបស់កម្ពុជា ដែលជាប្រទេសធ្លាប់រងទុក្ខវេទនាដោយសារសង្គ្រាម។
សម្ដេចតេជោនាយករដ្ឋមន្ត្រីក៏បានលើកឡើងផងដែរ អំពីការប្រែប្រួលរបស់ពិភពលោកដែលទាមទារឲ្យកម្ពុជា ក៏ត្រូវតែមានការបត់បែនឲ្យបានលឿនទៅតាមសភាពការណ៍និង ស្ថានភាព។ សម្តេចបានលើកឡើងថា ពិភពលោកបានងាកបត់មករករបៀបរបបពហុប៉ូល ដំណាលពេលជញ្ជីងកម្លាំង និងអំណាចបានផ្អៀងពីលោកខាងលិចមកលោកខាងកើត។ ដំណើរវិវត្តន៍មកកាន់របៀបរបបថ្មីនេះបានបណ្តាលឲ្យមានការប្រទាញប្រទង់ប្រកួតប្រជែងដ៏តានតឹងរវាងមហាអំណាច និងតួអង្គនានាដែលធ្វើឲ្យស្ថានការណ៍តំបន់និងពិភពលោកមានការវិវត្តន៍ផ្លាស់ប្តូរយ៉ាងជ្រាលជ្រៅឆាប់រហ័ស ពិបាកប៉ាន់ស្មាន ស្មុគស្មាញនិងគ្រោះថ្នាក់បំផុតទាំងក្នុងទិដ្ឋភាពនយោបាយសេដ្ឋកិច្ច និងយោធា ដំណើរវិវត្តន៍ទៅកាន់ពហុប៉ូលនេះត្រូវទទួលរងនូវការតស៊ូដ៏ស្វិតស្វាញរវាងមហាអំណាចទី១ ដែលចង់រក្សាឧត្តមភាពទោលលើពិភពលោក ជាមួយមហាអំណាចនានាដែលកំពុងងើបឡើងនិងទាមទារតួនាទីចាត់ចែងកិច្ចការពិភពលោកស្របតាមអំណាចនិងសមត្ថភាពថ្មីរបស់ខ្លួន។ ការងាកចេញពីប្រព័ន្ធពហុភាគីនិយម មកកាន់ឯកតោភាគីនិយមរបស់អាមេរិក ការប្រឈមដាក់គ្នាក្នុងផ្នែកសេដ្ឋកិច្ច ជាពិសេសរវាងសហរដ្ឋអាមេរិកនិងចិន សញ្ញាទាំងឡាយមានការរត់ប្រណាំងសព្វាវុធឡើងវិញ ការបើកសមរភូមិថ្មីលើវិស័យបច្ចេកវិទ្យាទូរគមនាគមន៍ និង សញ្ញាណសិប្បនិម្មិតសង្គ្រាមពាណិជ្ជកម្មជាថ្មីជាដើម គឺជាផ្នែកនិងធាតុផ្សំនៃការប្រកួតប្រជែងអំណាច។
សម្តេចតេជោនាយករដ្ឋមន្ត្រីបានបន្តថា ប្រទេសតូចៗ ដូចកម្ពុជាយើងចៀសមិនផុតឡើយពីការរងនូវឥទ្ធិពល និងសម្ពាធកើតចេញពីស្ថានភាពខាងលើនេះ។
បើយោងតាមរបាយការណ៍របស់លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិអន្តរជាតិបានឲ្យដឹងថា ឆ្នាំ២០១៨គឺជាឆ្នាំដែលកម្ពុជាបានធ្វើការតស៊ូយ៉ាងស្វិតស្វាញតបតទៅនឹងការគំរាមកំហែងលើឯករាជ្យភាពនិងអធិបតេយ្យភាពរបស់ខ្លួនតាមរយៈការប៉ុនប៉ងជ្រៀតជ្រែក ចូលកិច្ចការផ្ទៃក្នុងកម្ពុជានិងការបន្តអនុវត្តបដិវត្តន៍ពណ៌ដើម្បីផ្តួលរំលំរាជរដ្ឋាភិបាលស្របច្បាប់។
ឆ្លើយតបទៅនឹងសភាពការណ៍នេះក្រសួងការបរទេសនិងសហប្រតិបត្តិការបានខិតខំយកចិត្តទុកដាក់ធ្វើការងារធំៗចំនួន ៥ ៖
ទី១-ពាក់ព័ន្ធទៅនឹងការការពារផលប្រយោជន៍ជាតិជាពិសេសការពារឯករាជ្យ អធិបតេយ្យភាពជាតិ។ ឆ្នាំ២០១៨ គឺជាឆ្នាំដែលក្រសួងបានធ្វើការតស៊ូយ៉ាងស្វិតស្វាញលើសមរភូមិការទូតនិងសាធារណមតិ ដើម្បីការពារនិងលើកកម្ពស់មុខមាត់កិត្យានុភាពជាតិនៅក្នុងតំបន់និងនៅលើឆាកអន្តរជាតិ ក៏ដូចជាទប់ទល់ការវាយបកប្រឆាំងទប់ទល់វិបត្តិវាយបកប្រឆាំងទល់នឹងការជ្រៀតជ្រែកចូលកិច្ចការផ្ទៃក្នុងរបស់កម្ពុជា។
ទី២-ការបង្កើតគោលនយោបាយការបរទេសប្រកបដោយភាពបត់បែនវាងវៃតប នឹងសម្ពាធភូមិសាស្ត្រនយោបាយ។ បច្ចុប្បន្នកម្ពុជាមានទំនាក់ទំនងការទូតជាមួយប្រទេសចំនួន ១៧២ គិតត្រឹមឆ្នាំ២០១៨ នេះកម្ពុជាបានចុះកិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនការទូតនិងផ្លូវការជាមួយ ៣៤ ប្រទេស ។
ទី៣-អនុវត្តការងារការទូតសេដ្ឋកិច្ចនិងវប្បធម៌ទេសចរណ៍ដើម្បីរួមចំណែកពង្រឹងសេដ្ឋកិច្ចជាតិដែលនេះគឺជាការចាប់ផ្ដើមផ្ដល់សារៈសំខាន់ នៅក្នុងការរួមចំណែកជំរុញលើកស្ទួយទំនាក់ទំនងសេដ្ឋកិច្ចពាណិជ្ជកម្មវប្បធម៌និងទេសចរណ៍បន្ថែមពីលើការងារការពារប្រពៃណីផងដែរ។
ទី៤-ការចូលរួមឲ្យកាន់តែសកម្មថែមទៀតដល់បុព្វហេតុសន្តិភាព ស្ថិរភាពនិងការប្រយុទ្ធនិងការប្រឈមនានានៃពិភពលោក ការប្រយុទ្ធប្រឆាំងភេរវកម្មឧក្រិដ្ឋកម្មឆ្លងដែនមានការប្រែប្រួលអាកាសធាតុជំងឺឆ្លង។
ទី៥-ការបន្តការដ្ឋានកំណែកទំរង់នៅក្នុងស្ថាប័នក្រសួងដើម្បីរៀបចំអង្គអ្នកការទូតប្រកប ដោយវិជ្ជាជីវៈ ស្នេហាជាតិ សកម្ម និងមានសមត្ថភាព។
នៅក្នុងឱកាសនោះ សម្តេចតេជោនាយករដ្ឋមន្ត្រីក៏បានកោតសរសើរចំពោះគំនិតផ្ដួចផ្ដើមនិងសកម្មភាពទាំងឡាយសំដៅកែទម្រង់ការងារក្រសួងឲ្យមានប្រសិទ្ធភាព និង សមធម៌ ការធ្វើឲ្យប្រសើរឡើងនូវលក្ខខណ្ឌការងាររបស់មន្ត្រីបុគ្គលិក ការបង្កើនប្រាក់បៀវត្សជូនមន្ត្រីការទូតទៅបរទេស។ ការបង្កើតថវិកាដំណើរការស្ថានបេសកកម្ម ១០ភាគរយ និងការផ្ដល់ប្រាក់រង្វាន់សម្រាប់មន្ត្រីក្នុងស្រុកសុទ្ធសឹងជាវិធានការដែលសម្តេចគាំទ្រ។ ការសម្ពោធដាក់ឲ្យដំណើរការវិទ្យាស្ថានជាតិការទូត និង ទំនាក់ទំនងអន្តរជាតិកាលពីឆ្នាំទៅមិញក៏នឹងរួមចំណែកដ៏សំខាន់បំផុតក្នុងការបង្កើតនិងពង្រីកចំណេះដឹងទទួលបានបទពិសោធន៍ថែមទៀតដើម្បីកសាងជួរអ្នកការទូតដែលប្រកបដោយដោយវិជ្ជាជីវៈ មានសមត្ថភាពខ្ពស់ និង ទឹកចិត្តស្មោះត្រង់ក្នុងការការពារផលប្រយោជន៍ស្នូលរបស់ប្រទេសនិងប្រជាជន។
សម្តេចបន្តថា នយោបាយការបរទេសគឺជាយុទ្ធសាស្ត្រ ហើយការទូតគឺជាមធ្យោបាយនិងជាវិធីសាស្ត្រក្នុងការលើកស្ទួយផលប្រយោជន៍ជាតិឲ្យសមស្របតាមយុទ្ធសាស្ត្រនោះ។ ដូច្នេះការយកចិត្តទុកដាក់លើធនធានមនុស្ស អ្នកការទូតដែលជាអ្នកអនុវត្តផ្ទាល់នូវនយោបាយការបរទេសរបស់រាជរដ្ឋាភិបាលគឺមានសារៈសំខាន់ខ្លាំងណាស់។ ការដំឡើងឋានៈ តែងតាំងមុខតំណែងដោយផ្អែកលើសមត្ថភាព ឥរិយាបថការងារ ភាពអំណត់ព្យាយាមតាមទិសស្លោក «កុំយកលុយទៅដូរប៉ុស្តិ៍ កុំយកប៉ុស្តិ៍ទៅរកលុយ» នោះគឺជាកត្តាកំណត់សំខាន់បំផុតដើម្បីបង្កើតបាននូវតម្លាភាព សមធម៌ និង បរិយាកាសមួយដែលលើកទឹកចិត្តដល់មន្ត្រីបុគ្គលិកទាំងអស់ដែលខិតខំប្រឹងប្រែងបំពេញការងារ៕
Source: Kampuchea Thmey Daily
0 Comments