នៅថ្ងៃចន្ទ មេដឹកនាំគណបក្សប្រឆាំងលោក Juan Guaido បានអំពាវនាវឲ្យមានការធ្វើបាតុកម្មទ្រង់ទ្រាយធំនៅទូទាំងប្រទេសវេណេហ្ស៊ូអេឡាប្រឆាំងលោកប្រធានាធិបតី Nicolas Maduro ខណៈពេលលោកបានប្រកាសអំពីការវិលត្រឡប់របស់លោក បន្ទាប់ពីធ្វើទស្សនកិច្ចរយៈពេលមួយសប្តាហ៍ទៅកាន់ប្រទេសសម្ព័ន្ធមិត្តអាមេរិកឡាទីន។
អ្នកវិភាគបាននិយាយថា ការលេចមុខជាថ្មីនៅក្នុងប្រទេសវេណេហ្ស៊ូអេឡានឹងបង្កជាបញ្ហាប្រឈមភ្លាមៗមួយចំពោះលោក Maduro ដែលនឹងត្រូវសម្រេចចិត្តថាតើនឹងត្រូវចាប់ខ្លួនគាត់សម្រាប់ការផ្គើននឹងបម្រាមធ្វើដំណើរឬត្រូវអនុញ្ញាតឲ្យគាត់ចូលក្នុងប្រទេសដោយសុវត្ថិភាព។
លោក Guaido បានសរសេរនៅលើ Twitter កាលពីថ្ងៃអាទិត្យថា “ខ្ញុំនឹងប្រកាសពីការវិលត្រលប់មកប្រទេសរបស់ខ្ញុំវិញ។ ខ្ញុំនឹងអំពាវនាវដល់ប្រជាជនវេណេហ្ស៊ូអេឡាឲ្យប្រមូលផ្ដុំគ្នានៅទូទាំងប្រទេសនៅថ្ងៃស្អែកវេលាម៉ោង១១ព្រឹក”។
ទោះបីជាយ៉ាងណាក៏ដោយ លោក Guaido ដែលត្រូវបានទទួលស្គាល់ដោយប្រទេសជាង៥០ជាប្រធានាធិបតីបណ្តោះអាសន្នរបស់វេណេហ្ស៊ូអេឡាគឺមិនបាននិយាយពីរបៀបនិងពេលវេលាដែលលោកនឹងវិលត្រលប់មកវិញនោះទេប៉ុន្តែមានការរំពឹងទុកថា គាត់ប្រហែលជាជិះយន្តហោះចេញពីរដ្ឋធានី Bogota របស់ប្រទេសកូឡុំប៊ីទៅកាន់ទីក្រុង Caracas។
វាក៏អាចទៅរួចដែរដែលថា គាត់មានគម្រោងឆ្លងកាត់ព្រំដែនជាប់ប្រទេសកូឡុំប៊ីដូចកាលដែលគាត់ចាកចេញពីវេណេហ្ស៊ូអេឡាដោយអះអាងនៅពេលនោះថា គាត់មានជំនួយពីយោធារបស់លោក Maduro។
នៅក្នុងការបង្ហោះ Twitter ទី២, លោក Guaido បាននិយាយថា គាត់នឹងផ្តល់កំណត់ហេតុអំពីដំណើរទស្សនកិច្ចរបស់គាត់ហើយប្រកាសអំពី “សកម្មភាពបន្ទាប់” របស់គណបក្សប្រឆាំងនៅលើបណ្តាញសង្គម។
លោក Guaido បានធ្វើកិច្ចចរចានៅទីក្រុង Salinas កាលពីថ្ងៃសៅរ៍ជាមួយលោកប្រធានាធិបតី Lenin Moreno និងបានជួបជាមួយជនភៀសខ្លួនវេណេហ្ស៊ូអេឡា។ កាលពីថ្ងៃអាទិត្យនៅពេលថ្ងៃត្រង់ គាត់បានហោះចេញពីទីក្រុង Salinas ដោយពុំបានបង្ហាញអំពីទិសដៅរបស់គាត់។
ដោយផ្គើនទៅនឹងបម្រាមធ្វើដំណើររបស់រដ្ឋាភិបាលវេណេហ្ស៊ូអេឡា លោក Guaido បានឆ្លងកាត់ព្រំដែនឆ្ពោះទៅកាន់ប្រទេសកូឡុំប៊ីកាលពីថ្ងៃទី២៣ ខែកុម្ភៈ ដើម្បីប៉ុនប៉ងនាំយកជំនួយមនុស្សធម៌អន្តរជាតិចូលក្នុងប្រទេស។ ខណៈពេលស្ថិតនៅប្រទេសកូឡុំប៊ី លោកបានជួបជាមួយអនុប្រធានាធិបតីសហរដ្ឋអាមេរិកលោក Mike Pence៕ AFP
Source: Kampuchea Thmey Daily
0 Comments