ចិន ឯកភាពជួយសិក្សារៀបចំផែនការអភិវឌ្ឍន៍ប្រព័ន្ធរថភ្លើងទំនើបប្រភេទ Monorail នៅកម្ពុជា ដើម្បីកាត់បន្ថយការកកស្ទះចរាចរណ៍ នៅក្នុងរាជធានីភ្នំពេញ

ភ្នំពេញ ៖ កាលពីថ្ងៃទី២៥ ខែមីនា ឆ្នាំ២០១៩ នៅក្រុង Chongqing ប្រទេសចិន⁣ លោកទេសរដ្ឋមន្ត្រី ស៊ុន ចាន់ថុល បានបន្ដដឹកនាំគណៈប្រតិភូក្រសួងសាធារណការ និងដឹកជញ្ជូន ជួបពិភាក្សាការងារជាមួយ លោក Zhou Keqin អនុប្រធានក្រុមប្រឹក្សាពិគ្រោះយោបល់ បក្សនយោបាយប្រជាជនចិន នៃគណៈកម្មាធិការ ក្រុង Chongqing។

ទេសរដ្ឋមន្ត្រី ស៊ុន ចាន់ថុល បានថ្លែងអំណរគុណសម្រាប់ការបំពេញទស្សនកិច្ចរបស់ លោក Zhou នៅកម្ពុជា កាលពីខែវិច្ឆិកា ឆ្នាំ២០១៨ កន្លងទៅ ដែលបានជំរុញឲ្យមានកិច្ចសហការបន្ត និងការផ្លាស់ប្ដូរទស្សនកិច្ច របស់គណៈប្រតិភូកម្ពុជា មកក្រុង Chongqing នាពេលនេះ។

កិច្ចប្រជុំបានផ្តោតសំខាន់ទៅលើ កិច្ចសហប្រតិបត្តិការ រវាង កម្ពុជា និងក្រុង Chongqing ក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូន និងឡូជីស្ទីក ជាពិសេសលទ្ធភាពនៃការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា និងការជួយពង្រឹងសមត្ថភាពធនធានមនុស្សរបស់កម្ពុជា។

កិច្ចប្រជុំនេះ ក៏បានពិភាក្សាផងដែរ ពីការតភ្ជាប់ច្រករបៀងប៉ែកខាងត្បូង រវាង ប្រទេសចិន ក្រុង Chongqing ប្រទេសសិង្ហបុរី ប្រទេសវៀតណាម និងប្រទេសកម្ពុជា ដើម្បីពង្រឹងទំនាក់ទំនង មិត្តភាព និងកិច្ចសហប្រតិបត្តិការលើវិស័យទេសចរណ៍ ពាណិជ្ជកម្ម និងការវិនិយោគ រវាង កម្ពុជា-ចិន និងប្រទេសក្នុងតំបន់។

លោក Zhou បានយល់ព្រមលើសំណើរបស់ លោកទេសរដ្ឋមន្ត្រី លើកិច្ចសហប្រតិបត្តិការ រវាងក្រុង Chongqing និងក្រសួងសាធារណការ និងដឹកជញ្ជូន ក្នុងការសិក្សារៀបចំ ផែនការអភិវឌ្ឍប្រព័ន្ធរថភ្លើងទំនើបប្រភេទ Monorail នៅកម្ពុជា ដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញ និងសិក្សាលទ្ធភាពក្នុងការពង្រឹង និងពង្រីកទំនាក់ទំនងឡូជីស្ទីករវាងប្រទេសទាំងពីរ ដោយ លោក Zhou បានសន្យាថា នឹងរៀបចំក្រុមការងារគណៈប្រតិភូ នៃការិយាល័យដឹកជញ្ជូនក្រុង Chongqing (Chongqing Municipal Transport Bureau) និងក្រុមការងារឡូជីស្ទីក ទៅបំពេញទស្សនកិច្ចសិក្សា នៅកម្ពុជាក្នុងពេលឆាប់ៗខាងមុខនេះ។

លោក Zhou ក៏បានឯកភាពតាមសំណើរបស់លោកទេសរដ្ឋមន្ត្រី ផងដែរ លើកិច្ចសហប្រតិបត្តិការ នៃការកសាង និងពង្រឹងសមត្ថភាពមន្ត្រីក្រសួងសាធារណការ និងដឹកជញ្ជូន ដោយសន្យាថា នឹងពិនិត្យលទ្ធភាព ផ្តល់ជូននូវគ្រូបណ្ដុះបណ្ដាលជំនាញពីក្រុង Chongqing ទៅកម្ពុជា និងរៀបចំវគ្គបណ្ដុះបណ្ដាលខ្លីៗ សម្រាប់ផ្លាស់ប្ដូរបទពិសោធន៍ និងឱកាសសិក្សាស្វែងយល់ ទៅវិញទៅមក ព្រមទាំងលទ្ធភាព នៃការផ្តល់ជូនអាហារូបករណ៍ ទៅដល់និស្សិតកម្ពុជា ថ្នាក់ឧត្ដមសិក្សាផងដែរ ដើម្បីជំរុញឲ្យទំនាក់ទំនងរវាង ក្រុង Chongqing និងប្រទេសកម្ពុជា កាន់តែរីកចម្រើនទៅមុខ មួយកម្រិតទៀត។

លោកទេសរដ្ឋមន្ត្រី ស៊ុន ចាន់ថុល បានគូសបញ្ជាក់ពីការកោតសរសើរ និងថ្លែងអំណរគុណ ចំពោះឆន្ទៈ និងគោលជំហរ ក្នុងការរឹតចំណងមិត្តភាព និងកិច្ចសហប្រតិបត្តិការរវាងកម្ពុជា-ចិន ជាពិសេសទំនាក់ទំនង រវាងក្រុង Chongqing និងក្រសួងសាធារណការ និងដឹកជញ្ជូន ហើយលោកទេសរដ្ឋមន្ត្រី សង្ឃឹមជឿជាក់ថា ៖ ទំនាក់ទំនង និងកិច្ចសហប្រតិបត្តិការនេះ និងចូលរួមជំរុញការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន នៅកម្ពុជា ឲ្យកាន់តែរីកចម្រើនឈានឡើងមួយកម្រិតទៀត៕