តន្ត្រីករ និង​អ្នកចម្រៀង​ខ្មែរ​វ័យក្មេង​ចំនួន​១០​នាក់ នឹងធ្វើ​ដំណើរ​ទៅ​សហរដ្ឋអាមេរិក ដើម្បី​សិក្សា​ស្វែងយល់​ពី​វិស័យ​ធុរកិច្ច​ផ្នែក​តន្ត្រី

ភ្នំពេញ​ ៖ តន្ត្រីករ និង​អ្នកចម្រៀង​ខ្មែរ​វ័យក្មេង​ចំនួន​១០​នាក់ នឹង​ធ្វើ​ដំណើរ​ទៅ​សហរដ្ឋអាមេរិក ដើម្បី​សិក្សា​ស្វែងយល់​ពី​វិស័យ​តន្ត្រី ចាប់ពី​ថ្ងៃទី​២៧ ខែមេសា ដល់​ថ្ងៃទី​០៨ ខែឧសភា ឆ្នាំ​២០១៩ ដែល​ដំណើរ​ទស្សនកិច្ច​របស់​ពួកគេ​នេះ ធ្វើឡើង​តាមរយៈ​កម្មវិធី​ទស្សនកិច្ច​ភាពជា​អ្នកដឹកនាំ​អន្តរជាតិ (IVLP) On-Demand ហើយ​ជា​ឱកាស​មួយ​សម្រាប់​ឲ្យ​ពួកគេ​ស្វែងយល់​ពី វិស័យ​ធុរកិច្ច​ផ្នែក​តន្ត្រី និង​ជួយ​ពួកគេ​ឲ្យ​ប្រែក្លាយ​ពី​អ្នក​ស្រឡាញ់​សិល្បៈ និង​អ្នក​តន្ត្រី ទៅជា​អ្នកដឹកនាំ​ក្នុង​ឧស្សាហកម្ម​។

កម្មវិធី IVLP On-Demand ត្រូវបាន​រៀបចំ​ពិសេស​ដោយ ស្ថានទូត​អាមេរិក​នៅ​កម្ពុជា ក្រោម​ប្រធានបទ “​កសាងឡើង​វិញ​នូវ​ឧស្សាហកម្ម​ធុរកិច្ច​តន្ត្រី​កម្ពុជា​” ដែល​កម្មវិធី​នេះ​នឹង​រួមបញ្ចូល​ផង​ដែរ នូវ​ការ​បណ្តុះបណ្តាល​លើ​ផ្នែក​ការពារ​កម្មសិទ្ធិបញ្ញា និង​ការរក្សា​សិទ្ធិ បែប​នៃ​ការកំណត់​តម្លៃ និង​របៀប​ដើម្បី​លក់​តន្ត្រី ការរក​ទីផ្សារ​សម្រាប់​លក់​តន្ត្រី និង​បញ្ហា​ទាក់ទង​នឹង​ស្លាក​យីហោ ។ ដំណើរ​ទស្សនកិច្ច​នេះ ក៏​នឹង​ផ្តល់ឱកាស​ដល់​សិល្បករ​ទាំងនេះ ឲ្យ​យល់​កាន់តែច្រើន​ពី​វិធី​កសាង និង​រៀបចំ​ទម្រង់​នៃ​ឧស្សាហកម្ម​តន្ត្រី​។

កញ្ញា Linnette Franco មន្ត្រី​ទទួលបន្ទុក​កិច្ចការ​វប្បធម៌​របស់​ស្ថានទូត​អាមេរិក បាន​ថ្លែង​ថា “​យើង​ជឿជាក់​ថា សិល្បករ​ទាំងនេះ នឹង​វិល​ត្រឡប់មក​ប្រទេស​កម្ពុជា​វិញ ជាមួយនឹង​ការត្រៀមខ្លួន​យ៉ាង​ល្អ ក្នុង​ការ​នាំយក​វិស័យ​សិល្បៈ​របស់គេ ឲ្យ​ឈានឡើង​ទៅដល់​កម្រិត​មួយទៀត ហើយ​ផ្សព្វផ្សាយ​ព័ត៌មាន​ពី​សារៈសំខាន់​នៃ​ការការពារ​កម្មសិទ្ធិបញ្ញា ។ ដូច្នេះ គម្រោង​នេះ​ក៏​នឹង​ជួយ​ផងដែរ ដល់​ការខិតខំ​របស់​ក្រុមហ៊ុន​ទាំងឡាយ​របស់​អាមេរិក នៅក្នុង​ការការពារ​ក​ម្ម​សិទ្ធិ​បញ្ញា​នៅ​កម្ពុជា​ដោយ​បង្កើត​ឲ្យ​មាន​កិច្ចពិភាក្សា​យ៉ាង​ទូលំទូលាយ​មួយ​ស្តីពី​ការការពារ​កម្មសិទ្ធិបញ្ញា​នៅ​កម្ពុជា​”​។

អ្នកសិល្បៈ​ទាំងនេះ​មាន កញ្ញា Adda Angel, កញ្ញា ចិត្ត ក​ញ្ច​នា​, លោក ម៉ម ពេ​ជ្ជ​រិ​ទ្ធ​, លោក សុខា បញ្ញា​, លោក វណ្ណ ចេស្ដា​, លោក ម៉ា ច័ន្ទ​បញ្ញា​, លោក រៀម សុខ​ភី​រម្យ​, កញ្ញា រិទ្ធី លំអរ​ពេជ្រ​, លោក ជុង សៀវ​ភី​ន និង​លោក អ៊ួ​ង សូរិយា​។ ពួកគេ​នឹងធ្វើ​ដំណើរ​ទៅ​រដ្ឋធានី​វ៉ាស៊ីនតោន ទីក្រុង Austin ក្នុង​រដ្ឋ Texas និង​ទីក្រុង Los Angeles ក្នុង​រដ្ឋ California។

អ្នកចម្រៀង និង​តន្ត្រីករ អ៊ួ​ង សូរិយា បាន​និយាយថា “​ខ្ញុំ​ពិតជា​រង់ចាំ ដើម្បី​នឹងចូលរួម គ្រប់​វគ្គ​ទាំងអស់ ដែល​ក្រសួងការបរទេស​អាមេរិក​កំណត់​មក តែ​ពិសេស​បំផុត​នោះ គឺ​វិធី​ធ្វើយ៉ាងណា​ដើម្បី​ប្រែ​ក្លាយ​ខ្លួន​ជា​អ្នក​ស្រឡាញ់​តន្ត្រី ទៅជា​ម្ចាស់​ជំនួញ​ម្នាក់​”។

កម្មវិធី​ទស្សនកិច្ច​ភាពជា​អ្នកដឹកនាំ​អន្តរជាតិ (IVLP) គឺជា​កម្មវិធី​ផ្លាស់ប្តូ​រទស្ស​កិច្ច​កម្រិត​អាជីព​ដ៏​សំខាន់​មួយ​របស់ ក្រសួងការបរទេស​ស​ហ​រដ្ឋ​អាមេរិក​។ តាមរយៈ​ទស្សនកិច្ច​រយៈពេល​ខ្លី​ទៅកាន់​សហរដ្ឋអាមេរិក អ្នកដឹកនាំ​បរទេស​បច្ចុប្បន្ន និង​នាពេល​អនាគត មកពី​វិស័យ​នានា​នៅក្នុង បានឃើញ​ប្រទេស​នេះ​ដោយផ្ទាល់ ហើយ​បណ្តុះ​ទំនាក់ទំនង​យូរអង្វែង ជាមួយ​សម​ភាគី​អាមេរិក​របស់​ពួកគេ​។

គួរ​បញ្ជាក់​ថា តាំងពី​ឆ្នាំ​១៩៩៣​មក ស្ថានទូត​អាមេរិក​នៅ​ភ្នំពេញ បាន​បញ្ជូន​បុគ្គល​ចំនួន​៣២៥ នាក់ ឲ្យ​ចូលរួម​នៅក្នុង​កម្មវិធី IVLP ដោយ​ក្នុងនោះ​រួមមាន​មន្ត្រី​រដ្ឋាភិបាល​កំពូលៗ អ្នកនយោបាយ អ្នកធ្វើ​ការតស៊ូ​មតិ​មកពី​អង្គការ​សង្គម​ស៊ីវិល សហគ្រិន និង​អ្នកសារព័ត៌មាន​៕

Source: Kampuchea Thmey Daily