ភ្នំពេញ ៖ រាជបណ្ឌិត្យសភាកម្ពុជា គ្រោងរៀបចំកិច្ចពិភាក្សាតុមូលមួយរវាងស្ថានទូតសហរដ្ឋអាមេរិក និងស្ថានទូតសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជា ដែលវេទិកានេះ នឹងធ្វើឡើងនៅព្រឹកថ្ងៃទី៣០ ខែមេសា ឆ្នាំ២០១៩ វេលាម៉ោង៨និង៣០នាទីព្រឹក នៅសាលប្រជុំរាជបណ្ឌិត្យសភាកម្ពុជា នេះបើតាមសេចក្តីជូនដំណឹង ហើយកិច្ចពិភាក្សានេះ ក៏នឹងមានវាគ្មិនកិត្តិយសមកពីក្រសួងការបរទេស អ្នកប្រវត្តិសាស្ត្រ អ្នកច្បាប់ និងនិងអ្នកស្រាវជ្រាវចូលរួមផងដែរ។
ជាការកត់សំគាល់ ការរៀបចំកិច្ចពិភាក្សាតុមូល រវាងស្ថានទូតសហរដ្ឋអាមេរិក និងស្ថានទូតសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជានេះ បានធ្វើឡើងក្រោយពីមានសាឆ្លើយឆ្លង ទាក់ទងសកម្មភាពពាណិជ្ជកម្មរវាងកម្ពុជា-ចិន។
គួររំលឹកថា ប៉ុន្មានថ្ងៃចុងក្រោយនេះ ស្ថានទូតសហរដ្ឋអាមេរិក និងស្ថានទូតសាធារណរដ្ឋប្រជាមានិតចិន ប្រចាំនៅកម្ពុជា បានបង្ហោះសាឆ្លងឆ្លើយគ្នា តាមបែបឌឺដងឲ្យគ្នាទៅវិញទៅមក ទាក់ទងការធ្វើពាណិជ្ជកម្មរវាងសាធារណរដ្ឋប្រជាមានិតចិន ជាមួយកម្ពុជា ដោយស្ថានទូតសហរដ្ឋអាមេរិកបានអះអាងថា ដៃគូពាណិជ្ជកម្មធំជាងគេរបស់ប្រទេសកម្ពុជា គឺចិន តែទំនាក់ទំនងនេះចំណេញខ្លាំងទៅខាងភាគីចិន ដោយសំអាងថា ប្រមាណ៨៧ ភាគរយ នៃទំនិញដោះដូរគ្នា គឺជាទំនិញនាំចូលមកពីប្រទេសចិន ដែលមិនជួយដល់ការធ្វើអោយមានការងារ ឬជួយដល់ឧស្សាហកម្ម ដូចទំនាក់ទំនងរបស់ប្រទេសកម្ពុជា ជាមួយសហរដ្ឋអាមេរិក ឬសហភាពអឺរ៉ុបនោះទេ ហើយនេះគ្រាន់តែជាផ្លូវមួយទៀត ដែលប្រទេសកម្ពុជា បានងាកចេញពីយុទ្ធសាស្ត្រសេដ្ឋកិច្ច ដែលមានតុល្យភាព និងលក្ខណៈចម្រុះច្រើន ទៅរកយុទ្ធសាស្ត្រសេដ្ឋកិច្ច ដែលមានការពឹងផ្អែកច្រើនទៅលើប្រទេសចិនប៉ុណ្ណោះ។
ចំណែកស្ថានទូតចិន បានលើកឡើងថា វាគឺជារឿងធម្មតា នៅក្នុងពិភពសកលភាវូបនីយកម្ម សកម្មភាពពាណិជ្ជកម្មតែងតែធ្វើដំណើរហួសពីកម្រិតទ្វេភាគី ហើយក្នុងករណីកម្ពុជាវិញ ប្រទេសកម្ពុជា បាននាំចូលវត្ថុធាតុដើម វាយនភ័ណ្ឌ និងគ្រឿងម៉ាស៊ីនវាយនភ័ណ្ឌយ៉ាងច្រើនពីប្រទេសចិន សម្រាប់បម្រើវិស័យកាត់ដេរ ខណៈដែលខ្លួនបាននាំចេញផលិតផលសម្រេចទៅកាន់គ្រប់ទីកន្លែងទូទាំងសកលលោក ក្នុងនោះរួមមានទាំងសហរដ្ឋអាមេរិក និងសហភាពអឺរ៉ុបផងដែរ។
តាមស្ថានទូតចិន "នៅក្នុងករណីនេះ វាគឺជាភាពសកម្មបំផុតរបស់កម្មករខ្មែរ ដែលបម្រើក្នុងវិស័យឧស្សាហកម្ម។ ក្រៅពីនេះ ទំនាក់ទំនងរវាងរដ្ឋ និងរដ្ឋ គឺមិនមែនត្រឹមតែ ដើម្បីពាណិជ្ជកម្មនោះឡើយ។ អ្វីដែលគួរឲ្យកត់សម្គាល់ គឺប្រទេសចិនបានកសាងផ្លូវចំនួន៣១ខ្សែ និងស្ពានចំនួន៨ សម្រាប់ប្រទេសកម្ពុជា ដែលមានប្រវែងសរុបជាង៣,០០០គីឡូម៉ែត្រ។ ចុះតើសហរដ្ឋអាមេរិកវិញ ធ្លាប់បានជួយធ្វើអ្វីខ្លះដល់កម្ពុជា? ចិនបានជួយកសាងស្ថានីយវារីអគ្គិសនីទាំងអស់នៅកម្ពុជា (ស្មើនឹង៨០ភាគរយ នៃសមត្ថភាពផលិតថាមពលអគ្គិសនី ដែលមានដំណើរការនៅកម្ពុជា)។ ចុះតើសហរដ្ឋអាមេរិកបានធ្វើអ្វីខ្លះដែរ?”។
បន្ទាប់ពីសារបស់ស្ថានទូតចិននេះ ស្ថានទូតសហរដ្ឋអាមេរិកបានចេញនយោបាយមួយទៀត ដោយលើកឡើងថា ពីរឆ្នាំ ក្រោយពីក្រុមហ៊ុនសំណង់រដ្ឋចិន បានសង់ទំនប់វារីអគ្គិសនីដ៏ធំមួយនៅប្រទេស Ecuador ទំនប់នេះដូចជាគ្មានដំណើរការសោះ។ សំណង់គ្មានគុណភាព និងមិនគិតពីស្តង់ដារសុវត្ថិភាព។ មានន័យថា កសិករនៅផ្នែកខាងក្រោមត្រូវទទួលរងការជន់លិចជាញឹកញាប់...ក្រោមគោលនយោបាយខ្សែក្រវាត់មួយ ផ្លូវមួយរបស់ចិន ហើយនិងបញ្ហាកង្វះតម្លាភាព និងគណនេយ្យភាព។
អាយ៉ៃឆ្លងឆ្លើយរវាងស្ថានទូតចិន និងស្ថានទូតអាមេរិក ត្រូវបានអ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានចាត់ទុកថា ជាការយកចិត្តទុកដាក់លើជោគវាសនារបស់កម្ពុជា នៅក្នុងពេលបច្ចុប្បន្ន ក៏ដូចជាអនាគតកាល ហើយជឿថា មហាមិត្តទាំងពីរ ក៏បានទទួលស្គាល់ការពិតនៃភាពវេទនាខ្លោចផ្សា អតីតកាលរបស់កម្ពុជា៕
Source: Kampuchea Thmey Daily
0 Comments