បាត់ដំបង ៖ យ៉ាងហោចណាស់ក៏មានមនុស្សម្នាក់ស្លាប់ និងម្នាក់ទៀតរងរបួសធ្ងន់ដែរ បន្ទាប់ពីមានករណីគ្រោះធម្មជាតិ គឺរន្ទះបាញ់ បានកើតឡើងផ្ទួនៗគ្នាក្នុងពេលតែមួយ។
គ្រោះធម្មជាតិនេះ បានកើតឡើងនៅវេលាម៉ោង១និង២០នាទីរសៀល ថ្ងៃទី២៥ ខែមេសា ឆ្នាំ២០១៩ ខណៈដែលមេឃកំពុងមានភ្លៀងធ្លាក់ ព្រមទាំងលាយឡំខ្យល់កន្ត្រាក់មកជាមួយផង ដោយលើកទី១ រន្ទះបានបាញ់នៅចំណុចភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង បណ្តាលឲ្យត្រូវមនុស្ស ម្នាក់ឈ្មោះ បឿន ទ្រី ភេទប្រុស អាយុ ៣៨ឆ្នាំ រស់នៅភូមិ ឃុំខាងលើ ស្លាប់ នៅនឹងកន្លែងតែម្តង។
ឯករណីលើកទី២ បានកើតឡើងនៅចំណុចភូមិនិគមកណ្តាល ឃុំជ្រោយស្តៅ ស្រុកថ្មគោលដដែល ទៅលើឈ្មោះ ជិន ណារ៉ា ភេទប្រុស អាយុ ៦១ឆ្នាំ រស់នៅភូមិ ឃុំខាងលើ ខណៈដែលជនរងគ្រោះកំពុងអង្គុយក្បែរទូរទស្សន៍ ហើយត្រូវ រន្ទះបាញ់ទូរទស្សន៍ ក៏បណ្តាលឲ្យរង របួសធ្ងន់ដែរដោយបច្ចុប្បន្ន កំពុងសម្រាកព្យាបាលនៅមន្ទីរពេទ្យបង្អែកស្រុកថ្មគោល៕
Source: Kampuchea Thmey Daily
0 Comments