ភ្នំពេញ ៖ អយ្យការ សាលាដំបូងរាជធានីភ្នំពេញ កាលពីពេលថ្មីនេះ បានសម្រេចចោទប្រកាន់ ទៅលើជនជាតិជប៉ុនពីររូប និង ជនជាតិ អង់គ្លេសមួយរូប ដែលជាប់ពាក់ព័ន្ធ និង លួចឃុបឃិត ចូលទៅគ្រប់គ្រង និងបង្អាក់សកម្មភាព ក្រុមហ៊ុនPOH (Pacific Opportunities Holdings S.a.r.l) និង ក្រុមហ៊ុនចំនួនពីរទៀត ដែលជាបុត្រសម្ព័ន្ធ ដោយខុសច្បាប់ តាមមាត្រា ៣៧៧ និង៣៧៨ នៃក្រម ព្រហ្មទណ្ឌ។
តាមសេចក្ដីរាយការណ៍ពីសាលាដំបូងរាជធានីភ្នំពេញបានឲ្យដឹងថា អយ្យការសាលាដំបូងរាជធានីភ្នំពេញ កាលពីថ្ងៃទី១១ ខែមេសា ឆ្នាំ២០១៩ កន្លងមកនេះ បានសម្រេចចោទប្រកាន់ទៅលើ ជនជាតិ ជប៉ុន ចំនួន២រូប និងជនជាតិអង់គ្លេស ពីបទឆបោក ដែលបានប្រព្រឹត្តនៅរាជធានីភ្នំពេញកាលពីអំឡុងឆ្នាំ២០១៨។ ជនជាប់ចោទ ទី១-ឈ្មោះ Fujisawa Nobuyoshi ភេទប្រុស ជនជាតិជប៉ុន កាន់លិខិតឆ្លងដែន លេខ TR 2924742 (ជាមេខ្លោង)។ ទី២-ឈ្មោះ Nobiru Adachi ភេទប្រុស អាយុ ៥៧ឆ្នាំ ជនជាតិជប៉ុន កាន់លិខិតឆ្លងដែនលេខ TR 6153584 (ជាអ្នកច្បាប់)។ និងទី៣-ឈ្មោះ Gwynn David Nevill Hopkins ភេទប្រុស អាយុ៤៧ឆ្នាំ ជនជាតិអង់គ្លេស កាន់លិខិតឆ្លងដែនលេខ 53872269(ជាអ្នកគ្រប់គ្រងក្រុមហ៊ុន Saronic Holdings Ltd ) អ្នកទាំងបី ស្នាក់នៅ មានអាស័យដ្ឋាន នៅ28a block 2 sceneliff .33 conduit Road , Mid-levels ,hongkong.។
ប្រភពដដែលបន្តថា ដែលអយ្យការ សម្រេចចោទប្រកាន់ជនជាតិជប៉ុនទាំងពីរ និង ជនជាតិ អង់គ្លេស មួយនាក់នេះ គឺធ្វើឡើង ក្រោយពីតុលាការ រកឃើញថា កាលពីអំឡុង ឆ្នាំ២០១៨ កន្លងទៅ នៅរាជធានីភ្នំពេញ ជនសង្ស័យ ឈ្មោះ ទេព រិទ្ធីវិទ្ធ ដែលជាអ្នកឈរឈ្មោះឲ្យក្រុមហ៊ុនជាអតីតប្រធានក្រុមប្រឹក្សាភិបាលក្រុមហ៊ុន POH សហការ ឃុបឃិត ដោយបានលួចលក់ ក្រុមហ៊ុន POH (Pacific Opportunities Holdings S.a.r.l) និងក្រុមហ៊ុនចំនួនពីរទៀត ដែលជាបុត្រសម្ព័ន្ធ មាន ក្រុមហ៊ុន Cougar Pacific Pte Ltd. និងក្រុមហ៊ុន Kuga Reflorestamento Ltda ទៅឲ្យ ក្រុមហ៊ុន Saronic Holdings Ltd ដែលបង្កើត និងក្រុមគ្រងដោយ ជនជាតិ ជប៉ុន ឈ្មោះ Fujisawa Nobuyoshi ដែលជាមេខ្លោង និងជាប្រធានប្រតិបត្តិរបស់ក្រុមហ៊ុន JTRUST ASIA PTE LTD និងក្រុមហ៊ុន JTRUST CO. LTD នៅប្រទេស ជប៉ុន ហើយជនទាំងបីរូបខាងលើ និង ឈ្មោះ ទេព រិទ្ធីវិទ្ធ បានសហការគ្នា ចូលទៅគ្រប់គ្រង និងបង្អាក់សកម្មភាព ក្រុមហ៊ុន បុត្រសម្ព័ន្ធ ខាតបង់ផលប្រយោជន៍យ៉ាងធ្ងន់ធ្ងរ។
ប្រភពដដែលបញ្ជាក់ថា ក្រោយពីពិនិត្យឯកសារ និងតម្រុយ នានា អយ្យការ សាលាដំបូងរាជធានីភ្នំពេញ សម្រេចចោទប្រកាន់ ជនជាតិប៉ុន ៣នាក់ ១.ឈ្មោះ Fujisawa Nobuyoshi ។ ទី២.ឈ្មោះ Nobiru Adachi និងទី៣.ឈ្មោះ Gwynn David Nevill Hopkins ពីបទឆបោក ប្រព្រឹត្តកាលពីអំឡុង ឆ្នាំ២០១៨ នៅរាជធានីភ្នំពេញ បទល្មើស ព្រហ្មទណ្ឌ ដែលមានចែងឲ្យផ្ដន្ទាទោស តាមបញ្ញត្តិ មាត្រា ៣៧៧ និង៣៧៨ ក្រមព្រហ្មទណ្ឌ នៃ ព្រះរាជាណាចក្រកម្ពុជា ដែលអាចត្រូវផ្ដន្ទាទោស ពី៦ខែ ទៅ៣ឆ្នាំ ពិន័យពី ១លានរៀល ទៅ៦លានរៀល និងសងថ្លៃខូចខាត ទៅឲ្យជនរងគ្រោះ។
ជាមួយគ្នានេះ អយ្យការ ក៏បានស្នើសុំឲ្យតុលាការដាក់ជនទាំងបីឲ្យស្ថិតនៅក្រោម ផ្លូវតុលាការ និងស្នើសុំដាក់ឲ្យស្ថិតនៅក្រោមការឃុំខ្លួនបណ្ដោះអាសន្ន លើឈ្មោះខាងលើ ដើម្បីបង្ក ឬបញ្ចប់បទល្មើស កុំឲ្យកើតឡើងជាថ្មី និងធានា រក្សាជនត្រូវចោទទុកជូនតុលាការចាត់ការតាមនីតិវិធី។
តាមដើមចម នៃរឿងនេះ ដំបូងថៅកែជនជាតិជប៉ុន បានឲ្យ លោក ទេព រិទ្ធី វិទ្ធ ឈរឈ្មោះជាប្រធានក្រុមប្រឹក្សាភិបាលមានភាគហ៊ុនមួយរយភាគរយ នៃក្រុមហ៊ុនPOH (Pacific Opportunities Holdings S.a.r.l) មានប្រាក់ខែ ចំនួន១២.០០០ដុល្លារអាមេរិក ក្នុងមួយខែ ពោលគឺបានន័យថាលោកទេព រិទ្ធិវិទ្ធ គឺជាមនុស្សដែលក្រុមហ៊ុនបានជួលមកឲ្យធ្វើការ ដោយមានភ្ជាប់នឹងកិច្ចសន្យាច្បាស់លាស់ ប៉ុណ្ណោះ ពោលគឺលោកមិនមានសិទ្ធិលក់ភាគហ៊ុននេះបានទេ។ ក្រោយមក លោក ទេព រិទ្ធិវិទ្ធ បាន ឃុបឃិតជាមួយជនជាតិជប៉ុនទាំងពីរ និង ជនជាតិ អង់គ្លេសខាងលើ លួចលក់ក្រុមហ៊ុន POH (Pacific Opportunities Holdings S.a.r.l) និងក្រុមហ៊ុនចំនួនពីរទៀត ដែលជាបុត្រសម្ព័ន្ធ មាន ក្រុមហ៊ុន Cougar Pacific Pte Ltd. និងក្រុមហ៊ុន Kuga Reflorestamento Ltda ទៅឲ្យក្រុមហ៊ុន Saronic Holdings Ltd ដែលបង្កើត និងក្រុមគ្រងដោយ ជនជាតិជប៉ុន ឈ្មោះ Fujisawa Nobuyoshi, Nobiru Adachi, និង ជនជាតិ អង់គ្លេសឈ្មោះ Gwynn David Nevill Hopkins។
ករណីនេះ កន្លងមក ថៅកែបានព្យាយាមអញ្ជើញ លោក ទេព រិទ្ធិវិទ្ធ ដែលបានលួចលក់ភាគហ៊ុនមួយរយភាគរយ នៃក្រុមហ៊ុនPOH ឲ្យចូលខ្លួនមកដោះស្រាយ ប៉ុន្តែជននោះពុំបានចូលខ្លួនមកដោះស្រាយឡើយ។ ក្រោយមក តុលាការ ក៏បានចោទប្រកាន់ លោក ទេព រិទ្ធិវិទ្ធ ពីបទរំលោភទំនុកចិត្ត ដោយអភិបាល និង បទលួចលក់ភាគហ៊ុនក្រុមហ៊ុន បច្ចុប្បន្ន កំពុងគេចខ្លួននៅក្រៅប្រទេស។
ជុំវិញករណីនេះ ជនរងគ្រោះ ជាអ្នកវិនិយោគជនជាតិជប៉ុន សង្ឃឹមថា តុលាការ នឹងផ្តល់ភាព យុត្តិធម៌ដល់ពួកគាត់ ដើម្បីផ្តល់កម្លាំងចិត្ត និងគាំទ្រ ដល់អ្នកវិនិយោគជប៉ុន ដែលមកវិនិយោគ នៅកម្ពុជា ករណីនេះ ប្រសិនបើអ្នកប្រព្រឹត្ត បែរជារួចខ្លួន ក្រៅសំណាញ់ច្បាប់ អ្នកវិនិយោគជប៉ុន ក៏ដូចជាអ្នកវិនិយោគដទៃទៀត អាចនឹងខ្លាចរអា ក្នុងការចូលមកវិនិយោគនៅកម្ពុជា៕
Source: Kampuchea Thmey Daily
0 Comments