យោងតាមសេចក្តីប្រកាសព័ត៌មានក្រសួងការបរទេសនៅថ្ងៃ ២២ ខែ មេសាបានឱ្យដឹងថាវេទិកាខ្សែក្រវាត់និងផ្លូវ លើកទី២នេះដែលមានរយៈពេល៥ថ្ងៃ នឹងចាប់ផ្តើមពីថ្ងៃទី២៥ដល់ថ្ងៃទី២៩ខែមេសាឆ្នាំ២០១៩ នៅទីក្រុងប៉េកាំងប្រទេសចិន ។នៅក្នុងសម័យប្រជុំជាន់ខ្ពស់នៃវេទិកាខ្សែក្រវាត់ និងផ្លូវលើកទី២ នៅថ្ងៃទី២៦ខែមេសាឆ្នាំ២០១៩នេះ សម្តេចនាយករដ្ឋមន្ត្រី ហ៊ុន សែន នឹងថ្លែងសុន្ទរកថាពីមូលបទរបស់វេទិកា «កិច្ចសហប្រតិបត្តិការខ្សែក្រវាត់និងផ្លូវ៖ បង្កើតជោគវាសនារួមដ៏ត្រចះត្រចង់»។ វេទិកានេះមានថ្នាក់ដឹកនាំពិភពលោកប្រមាណជា៤០នាក់ និងអ្នកតំណាងមកពីជាង១០០ប្រទេសផ្សេងទៀតនឹងចូលរួមវេទិកាខ្សែក្រវាត់និងផ្លូវលើកទី២នេះ។
តើកម្ពុជានឹងទទួលផលប្រយោជន៍បែបណាអំពីគម្រោងខ្សែក្រវាត់និងផ្លូវរបស់ចិននេះ?
នៅក្នុងគោលនយោបាយផ្តួចផ្តើមដោយលោកប្រធានាធិបតីចិន ស៊ី ជីនពីង (Xi Jinping) ស្តីអំពី «ខ្សែក្រវាត់មួយ ផ្លូវមួយ»យើងអាចសំគាល់ឃើញនូវការប្រឹងប្រែងរបស់រដ្ឋាភិបាលចិនក្នុងការផ្សារភ្ជាប់សមាហរណកម្មសេដ្ឋកិច្ចប្រទេសចិនទៅនឹងសេដ្ឋកិច្ចនៃ៦៥ប្រទេសនៅតាមបណ្តោយ «ខ្សែក្រវាត់មួយ ផ្លូវមួយ»ដែលមានតាំងពី អាស៊ីបូព៌ា អាស៊ីអគ្នេយ៍ មជ្ឈិមបូព៌ា អាស៊ីកណ្តាល មួយផ្នែកនៃទ្វីបអាហ្វ្រិក និងអឺរ៉ុប។
យើងគួរស្វែងយល់អត្ថន័យនៃពាក្យ«ខ្សែក្រវាត់» គឺសំដៅខ្សែក្រវាត់សេដ្ឋកិច្ចផ្លូវសូត្រ(Silk Road Economic Belt)ដែលជាផ្លូវរបៀងតភ្ជាប់ប្រទេសចិនទៅអឺរ៉ុបឆ្លងកាត់អាស៊ីកណ្តាលនិងអាស៊ីខាងលិច។ រីឯពាក្យ«ផ្លូវ»គឺសំដៅទៅលើផ្លូវសូត្រតាមសមុទ្ទនាសតវត្សរ៍ទី២១ (21st Century Maritime Silk Road) ដែលតភ្ជាប់ប្រទេសចិនទៅអាស៊ីអគ្នេយ៍ អាហ្វ្រិក និងអឺរ៉ុប។
ក្នុងគម្រោងការដ៏មហិមានេះដែលមានប្រភពទុនចរាចរទៅមកជាង២០លានលានដុល្លារអាមេរិក ប្រទេសចិននឹងផ្តោតទៅលើការពង្រីកហេដ្ឋារចនាសម្ព័ន្ធឧស្សាហកម្មជឿនលឿន..ដែលនឹងមានអំណោយផលដល់ប្រជាជន ៤.៦០០លាននាក់ស្មើនឹង៦០ភាគរយនៃប្រជាជនលើពិភពលោក ។ ប្រទេសចិនត្រូវគេរំពឹងថានឹងផ្ទេរ នូវឧស្សាហកម្ម អតិពលកម្ម និងឧស្សាហកម្មប្រើដើមទុនធំៗរបស់ខ្លួន ក្នុងរង្វង់៥ឆ្នាំខាងមុខ ទៅឲ្យបណ្តាប្រទេសតាមបណ្តោយ «ខ្សែក្រវាត់និង ផ្លូវ»ទាំងនោះ។
នៅក្នុងបរិបទនេះប្រទេសកម្ពុជាដែលមានទំនាក់ទំនងដល់កំរិតកំពូលជាមួយប្រទេសចិនគឺ ភាពជាដៃគូយុទ្ធសាស្ត្រគ្រប់ជ្រុងជ្រោយនិងជាមិត្តដែកថែបគឺជាឈ្នាន់មួយយ៉ាងសំខាន់សំរាប់ទាក់ទាញនូវរោងចក្រចិនខាងលើឲ្យមកតាំងប្រតិបត្តិការនៅកម្ពុជាវិញតួយ៉ាងការវិនិយោគនៅក្នុងតំបន់សេដ្ឋកិច្ចពិសេសនានា នៅប្រទេសកម្ពុជាដូចជាតំបន់សេដ្ឋកិច្ចពិសេសភ្នំពេញ(PPSEZ)និងតំបន់សេដ្ឋកិច្ចពិសេសក្រុងព្រះសីហនុ(SSEZ) ដែលបច្ចុប្បន្ននេះបានទទួលរោងចក្រមកវិនិយោគដល់ទៅជាង១០០រោងចក្រ។
តាមរយៈគោលនយោយបាយគំនិតផ្តួចផ្តើមខ្សែក្រវាត់និងផ្លូវនេះ កម្ពុជានិងចិនបានចុះហត្ថលេខាលើអនុស្សរណៈយោគយល់គ្នាស្ដីពីកិច្ចពង្រឹងសហប្រតិបត្តិការ និងវិនិយោគលើវិស័យឧស្សាហកម្ម នៅថ្ងៃទី១៥ខែតុលាឆ្នាំ២០១៥នៅទីក្រុងប៉េកាំង។ទី១.ការវិនិយោគរួមរវាងក្រុមហ៊ុន China Huanneng Group របស់ចិនជាមួយក្រុមហ៊ុន Royal Group របស់កម្ពុជា សាងសង់រោងចក្រវារីអគ្គិសនីទំហំ ៤០០MW នៅទន្លេសេសានក្រោមដែលមានទុនវិនិយោគប្រមាណ៩០០លានដុល្លារ។ ទី២.ការវិនិយោគប្រមាណ១,៤ប៊ីលានដុល្លារសាងសង់រោងចក្រវារីអគ្គិសនីទំហំ២៤៦MWនៅស្ទឹងតាតៃដែលនឹងមានសមត្ថភាពចែកចាយអគ្គិសនីចំនួន៣០ភាគរយនៃអគ្គិសនីត្រូវការសរុប។ទី៣.វិនិយោគលើគម្រោងផ្លូវចំនួន១៦ខ្សែក្រោមតម្លៃសរុប១,៦ប៊ីលានដុល្លារ។ទី៤.វិនិយោគលើគម្រោងសាងសង់អាកាសយានដ្ឋានថ្មីនៅក្នុងខេត្តសៀមរាបដែលមានតម្លៃ៨៨០លានដុល្លារ។ ទី៥ ចិនទទួលទិញអង្ករពីកម្ពុជាប្រមាណ ៣០០,០០០ តោនក្នុងឆ្នាំ២០១៨។ល។
ចំពោះកិច្ចសហប្រតិបត្តិការសេដ្ឋកិច្ច ប្រទេសចិនជាដៃគូពាណិជ្ជកម្មនិងវិនិយោគិនដ៏ចម្បងរបស់កម្ពុជា។ទំហំពាណិជ្ជកម្មទ្វេភាគីក្នុងឆ្នាំ២០១៧ មាន ចំនួន ៥.៥៧៧ លានដុល្លារកើនឡើងជាង ២១,៧% បើធៀបនឹងឆ្នាំ ២០១៦។ ក្នុងឆ្នាំ ២០១៧ទំហំវិនិយោគចិនសរុបនៅកម្ពុជាឈរលំដាប់លេខ ១ ធៀបនឹងទំហំវិនិយោគទុនពីប្រទេសដទៃទៀតដែលមានទំហំសរុបប្រមាណ១.៦៤៤ លានដុល្លារ។ លើសពីនេះ ប្រទេសទាំងពីរក៏បានឯកភាពគ្នាជំរុញទំហំពាណិជ្ជកម្មឱ្យកើនឡើងដល់៦.០០០លានដុល្លារនៅឆ្នាំ ២០២០។ចំពោះវិស័យទេសចរណ៍មានក្រុមហ៊ុនឤកាសចរណ៍ចំនួន ១៥ កំពុងធ្វើប្រតិបត្តិការហោះហើរទៀងទាត់ រវាង កម្ពុជា និងចិន។. នៅឆ្នាំ ២០១៧ ទេសចរចិនមានប្រមាណ ១,២ លាននាក់ ។ គិតត្រឹមត្រីមាសទី ១ ឆ្នាំ ២០១៨ នេះកម្ពុជាបានទទួលភ្ញៀវទេសចរអន្តរជាតិសរុប ១,៧ លាននាក់ដែលក្នុងនោះទេសចរ ចិនមានចំនួនជាង ៥០ ម៉ឺននាក់។
មកដល់ពេលនេះ កម្ពុជាបាននិងកំពុងអនុវត្តនូវគោលយោបាយគំនិតផ្តួចផ្តើមខ្សែក្រវាត់ និងផ្លូវមួយនេះយ៉ាងពេញលេញស្របតាមនូវអ្វីដែលប្រទេសចិនបានចុះហត្ថលេខាផ្តល់ជំនួយជាបន្តបន្ទាប់ជាច្រើនពាន់លានដុល្លារមកកម្ពុជាសម្រាប់អភិវឌ្ឍន៍លើហេដ្ឋារចនាសម្ព័ន្ធផ្លូវថ្នល់នានាក្នុងប្រទេស។
ជាមួយឱកាសប្រកបដោយសក្តានុពលនេះកម្ពុជាក៏បានពង្រឹងខ្លួនឯងដើម្បីទទួលយកផលប្រយោជន៍ពីគំនិតផ្តួចផ្តើមខ្សែក្រវាត់និងផ្លូវរបស់លោកប្រធានាធិបតីចិន ។ ជាវិធានការគោលនយោបាយជាក់ស្តែងសម្រាប់គាំទ្រចក្ខុវិស័យនេះ, រាជរដ្ឋាភិបាលកម្ពុជាបានដាក់ចេញនិងកំពុងជំរុញអនុវត្តយ៉ាងសកម្មនូវ «គោលនយោបាយអភិវឌ្ឍន៍វិស័យឧស្សាហកម្ម ២០១៥-២០២៥»ដែលជា «យុទ្ធសាស្ត្រកំណើនថ្មី»ឬ ជាផែនទីបង្ហាញផ្លូវសម្រាប់កសាងមូលដ្ឋានផលិតកម្មដែលមានតម្លៃបន្ថែមខ្ពស់ជាងមុន ហើយមានលក្ខណៈសមាហរណកម្មជាមួយនឹងខ្សែចង្វាក់តម្លៃក្នុងតំបន់ និង លើសកលលោក។ ច្បាស់ណាស់ថា ការទាក់ទាញការវិនិយោគផ្ទាល់ពីបរទេស គឺជាចំណុចគន្លឹះនៃគោលនយោបាយនេះ ដោយក្នុងនេះយើងបានផ្តោតឤទិភាពទៅលើវិស័យសំខាន់ៗមួយចំនួន មាន៖ ទី១-ឧស្សាហកម្មកម្មន្តសាលថ្មីៗសម្រាប់បើកច្រកចូល ទីផ្សារដែលផ្តល់តម្លៃបន្ថែមខ្ពស់ ព្រមទាំងមានភាពច្នៃប្រឌិត និងការប្រកួតប្រជែងខ្ពស់; ទី២-សហគ្រាស ធុនតូច និងមធ្យម ពិសេស ក្នុងវិស័យនៃការផលិតឱសថ និងបរិក្ខារពេទ្យ, សម្ភារៈសំណង់, សម្ភារៈបម្រើការវេចខ្ចប់នាំចេញ, គ្រឿងសង្ហារិម និងឧបករណ៍សម្ភារៈបម្រើឱ្យឧស្សាហកម្ម និងកសិ-ឧស្សាហកម្ម ដែលបម្រើឱ្យការនាំចេញ និងទីផ្សារក្នុងស្រុក; ទី៣-ប្រភេទឧស្សាហកម្មគាំទ្រដល់កសិកម្ម, ទេសចរណ៍ និងវាយនភ័ណ្ឌ ក៏ដូចជាបម្រើឱ្យខ្សែចង្វាក់ផលិតកម្មតំបន់ និងខ្សែចង្វាក់តម្លៃពិភពលោក ទាំងក្នុងទម្រង់ជាឧស្សាហកម្មអនុគមន៍ និងឧស្សាហកម្មប្រតិគមន៍; ទី៤-ប្រភេទឧស្សាហកម្មបម្រើឱ្យខ្សែចង្វាក់ផលិតកម្មតំបន់ដែលមានចរិតជាយុទ្ធសាស្ត្រ ដូចជា បច្ចេកវិទ្យាព័ត៌មាន និងទូរគមនាគមន៍, ថាមពល, ឧស្សាហកម្មធុនធ្ងន់, សិប្បកម្មវប្បធម៌, ប្រវត្តិសាស្ត្រប្រពៃណី និងបច្ចេកវិទ្យាបៃតង ឲ្យមកចូលក្នុងតំបន់សេដ្ឋកិច្ចពិសេសនានាជាពិសេសនៅក្នុងខេត្តព្រះសីហនុដែលរាជរដ្ឋាភិបាលមានបំណងយកខេត្តមួយនេះទាំងមូលមកធ្វើជាតំបន់សេដ្ឋកិច្ចពិសេសពហុបំណង សម្រាប់បំរើដល់ការនាំចេញទៅកាន់បណ្តាប្រទេសក្នុងតំបន់និងទៅបណ្តាប្រទេសលើពិភពលោកដែលផ្តល់ភាពអនុគ្រោះពន្ធគយសូន្យភាគរយនិងមិនកំរិតកំណត់បរិមាណទំនិញនាំចូលទៅប្រទេសគេ(Duty-free, Quota-free Access)។
រដ្ឋាភិបាលកម្ពុជា-ចិន បានខិតខំលើកកម្ពស់កិច្ចសហប្រតិបត្តិការទ្វេភាគីដល់កម្រិតកំពូលមួយ គឺ «ភាពជាដៃគូយុទ្ធសាស្ត្រគ្រប់ជ្រុងជ្រោយ» ចាប់ពីចុងឆ្នាំ២០១០មក។ ក្រោម «គំនិតផ្តួចផ្តើមខ្សែក្រវាត់ និងផ្លូវ»កិច្ចសហប្រតិបត្តិការរវាងប្រទេសទាំងពីរកំពុងតែត្រូវបានពង្រីកយ៉ាងលឿនថែមទៀតលើវិស័យសំខាន់ៗមួយចំនួនជាប្រយោជន៍ដល់ការកែលម្អការអភិវឌ្ឍសេដ្ឋកិច្ចនៃប្រទេសទាំងពីររួមមាន ការពង្រឹងផលិតភាពសេដ្ឋកិច្ច,ការបង្កើនពាណិជ្ជកម្ម ព្រមទាំងការលើកស្ទួយឧស្សាហកម្ម,ទេសចរណ៍, ការវិនិយោគ និងកសិកម្ម។ លើមូលដ្ឋាននេះ,រាជរដ្ឋាភិបាលកម្ពុជាបានត្រៀមខ្លួនរួចជាស្រេចដើម្បីចូលរួមយ៉ាងសកម្មក្នុងយន្តការសហប្រតិបត្តិការទាំងឡាយនៃ«គំនិតផ្តួចផ្តើមខ្សែក្រវាត់និងផ្លូវ»ដើម្បីវឌ្ឍនភាពនិងការរីកចម្រើនរួមនៃតំបន់និងសកលលោក។
កម្ពុជាបានគាំទ្រពេញទំហឹងចំពោះគំនិតផ្តួចផ្តើមនិងគម្រោងទាំងឡាយដែលលោកប្រធានាធិបតីចិនបានលើកឡើង។ ចិនបាននិងកំពុងដើរតួនាទីដ៏សំខាន់ក្នុងដំណើរការសេដ្ឋកិច្ច,ពាណិជ្ជកម្ម, និងនយោបាយពិភពលោកជាពិសេសក្នុងការជំរុញសេរីភាវបូនីយកម្មពាណិជ្ជកម្មអន្តរជាតិ,សមាហរណកម្មសេដ្ឋកិច្ចនិងការអភិវឌ្ឍប្រកបដោយបរិយាប័ន្ន,ដែលបានរួមចំណែកដល់ការបន្តលើកស្ទួយសកលភាវូបនីយកម្ម និងការកសាងនិម្មាបនកម្មសេដ្ឋកិច្ចពិភពលោកថ្មី៕
Source: Kampuchea Thmey Daily
0 Comments