ភ្នំពេញ ៖ ប្រជាពលរដ្ឋក៏ដូចជាអ្នកធ្វើដំណើរឆ្លងកាត់ផ្សារព្រែកឯង ដែលមានទីតាំងតាមបណ្ដោយផ្លូវជាតិលេខ១ ក្នុងសង្កាត់ព្រែកឯង ខណ្ឌច្បារអំពៅ បានសំដែងនូវការគាំទ្រយ៉ាងខ្លាំង ពេលឃើញកម្លាំងចម្រុះរបស់សាលាខណ្ឌច្បារអំពៅចុះរៀបចំសណ្ដាប់ធ្នាប់របៀបរៀបរយមុខផ្សារព្រែកឯង។
បងប្រុស សឿន តុលា ជាអ្នកធ្វើដំណើរឆ្លងកាត់ផ្សារព្រែកឯងជាប្រចាំបាននិយាយថា បងប្រុសពេញចិត្តពេលបានឃើញកម្លាំងចម្រុះរបស់សាលាខណ្ឌច្បារអំពៅ ចុះមករៀបចំសណ្ដាប់ធ្នាប់ មុខផ្សារព្រែកឯងដែលកន្លងមកអ្នកធ្វើដំណើរតែងមានក្តីព្រួយអារម្ភខ្លាចក្រែងរថយន្តធុនធំដាច់ហ្វ្រាំងជ្រុលទៅបុកអ្នកលក់ដូរលើទ្រូងផ្លូវមិនដឹងជាស្លាប់ ឬរបួសយ៉ាងណាទេ។ អ្នកលក់ដូរលើផ្លូវទ្រូងផ្លូវមុខផ្សារព្រែកឯងគឺមុខដដែលៗ។ ក្នុងនាមជាអ្នកដំណើរបងប្រុស សូមប្រកាសគាំទ្រនូវចំណាត់ការរបស់លោកអភិបាលខណ្ឌច្បារអំពៅ ដែលបានដាក់កម្លាំងចុះមករៀបចំសណ្ដាប់ធ្នាប់មុខផ្សារព្រែកឯងបានស្រឡះល្អបែបនេះ។
យោងតាមប្រសាសន៍លោកហ៊ួត ហ៊ុយ នាយរដ្ឋបាលសាលាខណ្ឌច្បារអំពៅបានឲ្យកម្ពុជាថ្មីដឹងថា កាលពីវេលាម៉ោង៣ទៀបភ្លឺឈានចូលថ្ងៃទី២៤ ខែមេសានេះ លោក រស់ សុភគ្គ័ អភិបាលរងខណ្ឌច្បារអំពៅ បានទទួលបញ្ជាពីលោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅឲ្យដឹកនាំកម្លាំងចម្រុះចុះរៀបចំសណ្ដាប់ធ្នាប់មុខផ្សារព្រែកឯង ដោយក្នុងនោះក៏មានដាក់រថយន្តដឹកទឹកទៅលាងសម្អាត និងបោសសំរាមទៀតផង។
លោកនាយករដ្ឋបាលបានបន្តថា ការចុះរៀបចំសណ្ដាប់ធ្នាប់មុខផ្សារព្រែកឯងនេះពុំមែន ទើបនឹងធ្វើនៅយប់រំលងអធ្រាត្រនេះទេ គឺធ្វើឡើងសឹងរៀងរាល់សប្ដាហ៍ ប៉ុន្តែបងប្អូនអាជីវករលោកពុំគោរពតាមការណែនាំពីអាជ្ញាធរឡើយ។ ប៉ុន្តែចាប់ពីពេលនេះតទៅ គឺអាជ្ញាធរមិនបន្ធូរដៃឡើយ ព្រោះបើយោគយល់ដល់ពួកគាត់គឺអាចជួបគ្រោះថ្នាក់ពេលរថយន្តជ្រុលចង្កូតទៅបុកអ្នកលក់ និងអ្នកទៅទិញឥវ៉ាន់ដែលដាក់លក់លើទ្រូងផ្លូវនេះជាក់ជាពុំខាន ហើយបើជួបគ្រោះថ្នាក់ដូចដែលនិយាយខាងលើតាំងមកស្ដីបន្ទោសថា អាជ្ញាធរមិនបើកភ្នែកមើល។
លោកហ៊ួត ហ៊ុយ បានបញ្ជាក់ទៀតថា ការចុះរៀបចំសណ្ដាប់គឺពុំមែនធ្វើតែនៅមុខផ្សារព្រែកឯងប៉ុណ្ណោះទេគឺអាជ្ញាធរត្រូវធ្វើគ្រប់ទីតាំងណាដែលរំលោភយកចិញ្ចើមផ្លូវដាក់អីវ៉ាន់លក់ដូរ។ ដូច្នេះហើយដើម្បីកុំឲ្យមានការថ្នាំងថ្នាក់មកលើអាជ្ញាធរ គឺអាជ្ញាធរសំណូមពរដល់បងប្អូនប្រជាពលរដ្ឋទាំងអស់ដែលមានលំនៅដ្ឋានជាប់ដងផ្លូវសុំចូលរួមថែរក្សាចិញ្ចើមផ្លូវមុខផ្ទះសម្រាប់ឲ្យអ្នកថ្មើរជើងបានដើរផង។ បើពុំដូច្នោះទេគឺជួបគ្រោះថ្នាក់ ខណៈដែលរថយន្តបើកបរទៅបុកបង្កឲ្យមានអ្នកស្លាប់ និងរបួសច្រើនណាស់៕
Source: Kampuchea Thmey Daily
0 Comments