រថយន្តបីគ្រឿងបុកបន្ដកន្ទុយគ្នា កៀបតៃកុងជាប់ក្នុងកាប៊ីន ជាមួយកូនស្រីម្នាក់

ភ្នំពេញ ៖ បុរសជាតៃកុងឡាន រួមនឹងកូនស្រីតូចម្នាក់ទៀតដែលអង្គុយក្នុងកាប៊ីនជាមួយឪពុកខ្លួនផ្នែកខាងក្រោយ បានរងរបួសទាំងពីរនាក់ ដោយកូនស្រីរងរបួសស្រាល និងឪពុករងរបួសធ្ងន់ ក្រោយពីត្រូវបានរថយន្តធុនធំដឹកសសរគ្រឹះមួយគ្រឿង បើកបរក្នុងល្បឿនលឿន ជ្រុលទៅបុករថយន្តដឹកទំនិញ និងបន្ដទៅបុករថយន្តបែនដឹកដីកំពុងចតស្ងៀម ផ្លោងក្រឡាប់ចូលប្រឡាយទឹកស្អុយ ចំណែក អ្នកបើកបររថយន្តដឹកសសរគ្រឹះបង្កហេតុ ចុះរត់គេចខ្លួនបាត់ស្រមោល។

ហេតុការណ៍ខាងលើកើតឡើងកាលពីវេលាម៉ោង១១ព្រឹក ថ្ងៃទី២៦ ខែមេសា ឆ្នាំ២០១៩ ស្ថិតនៅតាមបណ្តោយមហាវិថីឈ្នះ ឈ្នះ មុខសាលាកូរ៉េ ភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ។

ជនរងគ្រោះ របួសធ្ងន់ធ្ងរ កៀបជាប់ក្នុងកាប៊ីនរថយន្ត គ្រាន់តែ ស្គាល់ឈ្មោះ អៀង លីហួ ភេទប្រុស អាយុ៣៦ឆ្នាំ ចំណែកកូនស្រីម្នាក់ទៀតរួមដំណើរជាមួយ រងរបួសស្រាល ត្រូវបានខាងក្រុមហ៊ុនថៅកែឡាននេះ ដឹកយកទៅផ្ទះបាត់។

ភាគីរថយន្តបែនដឹកដី ម៉ាក ហ៊ីណូ ពណ៌ក្រហម ពាក់ស្លាកលេខ ចង្កូតស្តាំ PP-0213 អ្នកបើកបរ រត់គេចខ្លួនបាត់។ ភាគីរថយន្តដឹកសសរគ្រឹះ ម៉ាក ហ៊ីយ៉ាន់ដាយ ពណ៌លឿង ពាក់ស្លាកលេខ ភ្នំពេញ 3D-5967 អ្នកបើកបរគេចខ្លួនបាត់។ ភាគីរថយន្តដឹកទំនិញ ម៉ាកនីសាន់ ពណ៌បៃតង ពាក់ស្លាកលេខ ព្រះសីហនុ 3A-1763 អ្នកបើកបរឈ្មោះ អៀង លីហួ។

តាមប្រភពនៅកន្លែងកើតហេតុបានឲ្យដឹងថា មុនពេលកើតហេតុ រថយន្តដឹកទំនិញមួយគ្រឿង ពណ៌ខៀវ បើកឆ្លងពីកើតទៅលិច បត់ឆ្ពោះទៅត្បូងផុតហើយ ស្រាប់តែរថយន្តដឹកសសរគ្រឹះបេតុង មួយគ្រឿងផ្សេងទៀត ម៉ាកហ៊ីយ៉ាន់ដាយ ពណ៌លឿង បើកល្បឿនលឿនបោះពួយ ពីជើងទៅត្បូង ជ្រុលទៅបុករុញរថយន្តដឹកទំនិញពីក្រោយ ហើយរថយន្តដឹកទំនិញ ជ្រុលទៅបុករុញ រថយន្តបែនដឹកដីពីក្រោយបន្ដគ្នា បណ្តាលឲ្យផ្លោងរថយន្តដឹកដីក្រឡាប់ធ្លាក់ចូលប្រឡាយ។ រថយន្តដឹកសសរគ្រឹះនិងរថយន្តដឹកទំនិញ អូសជាប់គ្នា ចូលទៅបំណែកផ្លូវម្ខាង ចូលមកចំណែកទឹកដីភូមិភ្លូផ្អែម សង្កាត់គោករកា ខណ្ឌព្រែកព្នៅ វិញ បណ្តាលឲ្យកៀបជាប់អ្នកបើកបររថយន្តដឹកទំនិញ ក្នុងកាប៊ីន។

ក្រោយកើតហេតុ ជនរងគ្រោះម្នាក់ ត្រូវបានរថយន្តសង្គ្រោះរបស់អង្គភាព៧១១ ចេញទៅអន្តរាគមន៍ យកជនរងគ្រោះចេញពីក្នុងកាប៊ីន ដើម្បីដឹកបញ្ជូនទៅមន្ទីរពេទ្យព្រះកុសុមៈ។ ចំណែករថយន្តទាំង៣គ្រឿងក្នុងហេតុការណ៍ខាងលើ ត្រូវបានសមត្ថកិច្ចជំនាញចុះទៅពិនិត្យ រួចស្ទូចលើកយកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគេរបាល ក្រុងភ្នំពេញ រង់ចាំដោះស្រាយពេលក្រោយ៕