ភ្នំពេញ ៖ យានដ្ឋានកាត់ត ដំឡើងរថយន្តស៊េរីទំនើបអត់ច្បាប់មួយកន្លែង ត្រូវបានបានកម្លាំងសាខាគយរាជធានី សហការជាមួយកងរាជអាវុធហត្ថខណ្ឌឫស្សីកែវ ចុះទៅបង្ក្រាបចាប់ដកហូតបានរថយន្តស៊េរីទំនើបចំនួន៣គ្រឿង ប៉ុន្តែម្ចាស់បានគេចខ្លួនដោយសុវត្ថិភាព មិនត្រូវបានឃាត់ខ្លួននោះទេ។
ប្រតិបត្តិការបង្ក្រាបនេះ ធ្វើឡើងកាលពីវេលាម៉ោង៩និង៣០នាទីព្រឹក ថ្ងៃទី២៦ ខែមេសា ឆ្នាំ២០១៩ ស្ថិតនៅក្នុងភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ។
តាមសមត្ថកិច្ចបានឲ្យដឹងថា ការលួចដំឡើងកាត់តរថយន្ត ដោយយកគ្រឿងផ្គុំ ត ដំឡើង រថយន្តគ្មានច្បាប់នេះ អាចបង្កឲ្យកើតមានគ្រោះថ្នាក់ចំពោះអ្នកប្រើប្រាស់ ហើយម្យ៉ាងវិញទៀត ពុំមានច្បាប់ឡើយ។
សមត្ថកិច្ចបន្តទៀតថា ក្រោយពីកម្លាំងជំនាញ ស្រាវជ្រាវ ទើបឈានដល់ចុះទៅបង្ក្រាប ដកហូតបានរថយន្ត៣គ្រឿង ២គ្រឿងម៉ាកឡិចស៊ីស៤០០អេច មួយគ្រឿងទៀត ម៉ាកឡិចស៊ីសអ អ៊ិច៣៣០ រួមជាមួយសម្ភារៈពាក់ព័ន្ធមួយចំនួនទៀត។ ខណៈដែលម្ចាស់ទីតាំង បានគេចខ្លួនបាត់ សមត្ថកិច្ច បានហៅអ្នកតំណាងយានដ្ឋានម្នាក់ ឈ្មោះ ណុល ជុំ ភេទប្រុស អាយុ៣៨ឆ្នាំ ស្នាក់នៅកន្លែងកើតហេតុ ទៅសាកសួរ។ រថយន្តទាំង៣គ្រឿងដកហូតបាន យកទៅរក្សាទុកនៅសាខាគយ រាជធានីភ្នំពេញ ដើម្បីស្រាវជ្រាវបន្ត តាមនីតិវិធី។
មន្ត្រីសាខាគយរាជធានី នាឱកាសនោះ ក៏បានអំពាវនាវឲ្យបងប្អូនប្រជាពលរដ្ឋ ដែលចង់ទិញរថយន្តគ្រប់ប្រភេទយកទៅប្រើប្រាស់ មុននឹងទិញ ត្រូវពិនិត្យពិច័យឲ្យបានច្បាស់លាស់ ប្រយ័ត្នទិញចំរថយន្តដែលជនខិលខូចលួចលាក់ដំឡើង កាត់តខុសលក្ខណៈបច្ចេកទេសនេះវានាំឲ្យបង្កគ្រោះថ្នាក់ទៅថ្ងៃក្រោយ៕
Source: Kampuchea Thmey Daily
0 Comments