ជនអន្តោប្រវេសន៍យ៉ាងតិច១,៣០០នាក់ដែលភាគច្រើនជាជនជាតិគុយបាបានរត់ចេញពីមន្ទីរឃុំឃាំងជនអន្តោប្រវេសន៍មួយនៅព្រំដែនភាគខាងត្បូងប្រទេសម៉ិកស៊ិកកាលពីថ្ងៃព្រហស្បតិ៍ដែលនេះជាការរត់គេចខ្លួនដ៏ធំបំផុតនៅក្នុងរយៈពេលថ្មីៗ។
វិទ្យាស្ថានអន្តោប្រវេសន៍ជាតិបាននិយាយថា ជនជាតិគុយបាចំនួន៧០០នាក់បានវិលត្រលប់មកវិញដោយស្ម័គ្រចិត្តប៉ុន្តែ៦០០នាក់នៅតែគេចខ្លួន។
វិទ្យាស្ថាននេះបាននិយាយថា ភ្នាក់ងារនៅក្នុងបរិវេណនោះមិនមានអាវុធទេហើយគ្មានការប្រឈមមុខដាក់គ្នាឡើយ។
ក្រោយមក ប៉ូលិសសហព័ន្ធបានចូលទៅក្នុងបរិវេណនោះដើម្បីគ្រប់គ្រងស្ថានការណ៍ខណៈជនជាតិគុយបាដែលមានសាច់ញាតិត្រូវបានឃុំខ្លួននៅកន្លែងនោះបានប្រមូលផ្តុំនៅខាងក្រៅ។
ជនជាតិគុយបាបានអះអាងថា សាច់ញាតិរបស់ពួកគេបានរាយការណ៍ថា មានមនុស្សច្រើនពេកនិងគ្មានអនាម័យនៅកន្លែងនោះ។
ការរត់គេចខ្លួននេះគឺជាភាពអាម៉ាស់សម្រាប់រដ្ឋាភិបាលដោយសារតែសមត្ថភាពផ្ទុករបស់មណ្ឌលនេះត្រូវបានគេចុះបញ្ជីថាផ្ទុកមនុស្សបានតិចជាង១,០០០នាក់។ ការរត់គេចខ្លួនរបស់មនុស្សចំនួន១,៣០០នាក់មានន័យថា មណ្ឌលនេះប្រហែលជាបង្កើនសមត្ថភាពផ្ទុករបស់ខ្លួនឡើងទ្វេដង។
វាកាន់តែអាម៉ាស់ទៅទៀតដោយសារតែវាកើតឡើងចំថ្ងៃដែលមន្ត្រីសិទ្ធិមនុស្សកំពូលរបស់ប្រទេសម៉ិកស៊ិកបានទៅមើលកន្លែងនេះដើម្បីត្រួតពិនិត្យលក្ខខណ្ឌនៅទីនោះ៕ AP
Source: Kampuchea Thmey Daily
0 Comments