ភ្នំពេញ ៖ វាពិតជារឿងរ៉ាវមួយ ដែលនឹកស្មានមិនដល់ នៅពេលដែលក្មេងស្រីអាយុ៨ឆ្នាំ បានប្រាប់ឪពុកម្ដាយឲ្យប្តឹងនគរបាលឲ្យចាប់ជនក្បាលខូចដែលចាប់រំលោភនាង តាំងពី២ខែមុន។
យោងតាមប្រភពពី លោកវរសេនីយ៍ត្រី ទេព បូរ៉ា នាយនគរបាលប៉ុស្តិ៍ច្បារអំពៅទី២ បានឲ្យដឹងថាកាលពីវេលាទៀបភ្លឺម៉ោង៤និង៣០នាទី ថ្ងៃទី២៦មេសានេះ កម្លាំងរបស់លោកបានចាប់ខ្លួនជនសង្ស័យម្នាក់ ឈ្មោះ ឌាំង យុំាងញឹក ភេទប្រុស អាយុ២៦ឆ្នាំ ជនជាតិវៀតណាម មុខរបរមិនពិតប្រាកដ ស្នាក់នៅផ្ទះជួល ភូមិដើមចាន់ទី១ សង្កាត់ច្បារអំពៅទី២ ខណ្ឌច្បារអំពៅ ដោយយោងតាមបណ្តឹងក្រុមគ្រួសារក្មេងស្រីម្នាក់ដែលចោទថា ជនសង្ស័យខាងលើ បានចាប់រំលោភនាងបានសម្រេច ហើយគំរាមសម្លាប់ចោល បើសិនប្រាប់នគរបាល។
លោកមេប៉ុស្តិ៍ បានរៀបរាប់ពីសកម្មភាពជនសង្ស័យដែលបានចាប់រំលោភក្មេងស្រីដែលមានអាយុ៨ឆ្នាំថា នៅពាក់កណ្ដាលខែមីនា ឆ្នាំ២០១៩ មិនចាំថ្ងៃ ម៉ោងប្រមាណជាង៣ទៀបភ្លឺ ក្មេងស្រីរងគ្រោះបានដេកនៅក្បែរវិហារចិន ដែលស្ថិតនៅក្បែរផ្ទះនាងដែរ ក៏ស្រាប់តែលេចមុខជនសង្ស័យខាងលើបានចាប់ពោបពីលើខ្លួននាង រួចយកកន្ត្រៃមកកាត់ខោនាង រួចរំលោភបានសម្រេច ដោយដៃម្ខាងសង្កត់បំពង់.ក នាងជាប់។ ពេលរំលោភបានសម្រេចហើយ វាក៏ដើរចេញទៅបាត់ហើយ ពេលនោះក្មេងស្រីចំណាំមុខវាបាន ដើម្បីមកប្រាប់ឪពុកម្ដាយឲ្យប្តឹងនគរបាលឲ្យចាប់ខ្លួន។ បន្ទាប់ពីដាក់ពាក្យប្តឹងនគរបាលរួចមក ក្មេងស្រីរងគ្រោះចេះតែស្វែងរកជនសង្ស័យរហូតដល់ព្រឹកព្រលឹមថ្ងៃទី២៦មេសានេះ ស្រាប់តែឃើញជនក្បាលខូចកំពុងដើរនៅមាត់ទន្លេក្នុងសង្កាត់ច្បារអំពៅទី២ ក៏ប្រាប់ឪពុកម្តាយឲ្យរាយការណ៍ទៅនគរបាលប៉ុស្តិ៍ចាប់ខ្លួនមកស្នាក់ការប៉ុស្តិ៍តែម្ដង។
នៅចំពោះសមត្ថកិច្ច ជនសង្ស័យ មិនបានសារភាពទេ ប៉ុន្តែក្មេងស្រីរងគ្រោះបានចង្អុលមុខវាចង់ដល់ថ្ងាសថា អាហ្នឹងហើយដែលចាប់រំលោភនាងនោះ។
លោកនាយប៉ុស្តិ៍បានបញ្ជាក់ថា ជនសង្ស័យត្រូវបានបញ្ជូនទៅអធិការដ្ឋានខណ្ឌច្បារអំពៅ ដើម្បីចាត់ការតាមនីតិវិធី បើទោះបីជាគេមិនព្រមសារភាព ប៉ុន្តែជនរងគ្រោះបានចង្អុលមុខទៅហើយ៕
Source: Kampuchea Thmey Daily
0 Comments