ភ្នំពេញ ៖ ជនសង្ស័យម្នាក់ ត្រូវជាប់អន្ទាក់របស់ជនបរទេស ខណៈធ្វើសកម្មភាពឆក់កាបូបរបស់ជនបរទេសរូបនោះមិនបានសម្រេច កាលពីវេលាម៉ោង១៩ល្ងាច ថ្ងៃទី១០ ខែមេសា ឆ្នាំ២០១៩ នៅចំណុចលើសួនច្បារមាត់ទន្លេ ផ្លូវព្រះស៊ីសុវត្ថិ កែងផ្លូវលេខ ១១៨ ភូមិ១ សង្កាត់ផ្សារកណ្តាលទី១ខណ្ឌដូនពេញ។
សមត្ថកិច្ចបានឲ្យដឹងថា ជនសង្ស័យ ឈ្មោះ ខួន ដែន ភេទប្រុស អាយុ២៥ឆ្នាំ មុខរបរ និងទីលំនៅ មិនពិតប្រាកដ។ ចំណែកជនរងគ្រោះ ឈ្មោះ MALTE CHRISTIAN HOWELER ភេទប្រុស អាយុ២៥ឆ្នាំ ជនជាតិអាល្លឺម៉ង់ មុខរបរទេសចរណ៍ ស្នាក់នៅផ្ទះលេខ29 ផ្លូវ178 សង្កាត់ ជ័យជំនះ ខណ្ឌដូនពេញ រាជធានី ភ្នំពេញ។ រីឯវត្ថុតាងចាប់យកបានរួមមាន កាបូបស្ពាយពណ៌ខៀវចំនួន០១ ទូរស័ព្ទដៃម៉ាកអាយហ្វូន6 ពណ៌ទឹកប្រាក់ចំនួន០១ និងសៀវភៅ ទេសចរណ៍ចំនួន០១ក្បាល(ជារបស់ជនរងគ្រោះ)។
សមត្ថកិច្ចបានបន្តទៀតថា កាលពីថ្ងៃទី១០ ខែមេសា ឆ្នាំ២០១៩ នាវេលាម៉ោង១៩និង០០នាទី ជនរងគ្រោះ កំពុងតែអង្គុយមើលសៀវភៅ នៅចំណុចកើតហេតុខាងលើ ពេលនោះមានជនសង្ស័យដែលនៅក្បែរនោះ បានដើរមកជិតជនរងគ្រោះ ហើយយកដៃខាងស្តាំរបស់ខ្លួនធ្វើសកម្មភាពឆក់យកកាបូបស្ពាយដែលទុកនៅខាងស្តាំដៃបានសម្រេចកាន់ជាប់នឹងដៃ ហើយបម្រុងរត់គេចខ្លួន ស្រាប់តែជនរងគ្រោះបានស្រែកឆោឡោឡើង រួចទាញកាបូបស្ពាយបានវិញ ស្របពេលនោះដែរ ក៏មានកម្លាំងល្បាតរបស់សមត្ថកិច្ចកំពុងល្បាតក្បែរនោះ បានអន្តរាគមន៍ឃាត់ខ្លួនជនសង្ស័យ រួមទាំងចាប់យកវត្ថុតាងយកមកអធិការដ្ឋាននគរបាលខណ្ឌដូនពេញ ដើម្បីធ្វើការសាកសួរ។ ដោយឆ្លងតាមការធ្វើតេស្តទឹកនោមនោះគឺបញ្ជាក់ថា ជនសង្ស័យធ្លាប់ប្រើប្រាស់សារធាតុញៀន។
កម្លាំងជំនាញរបស់អធិការដ្ឋាន និងប៉ុស្តិ៍ កំពុងបន្តការស្រាវជ្រាវ រកបក្ខពួក និងបទល្មើស ដែលបានប្រព្រឹត្តកន្លងមក រួចកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីអនុវត្តន៍តាមនីតិវិធី នៃច្បាប់៕
Source: Kampuchea Thmey Daily
0 Comments