ភ្នំពេញ ៖ លោកទៀង ច័ន្ទសារ អធិការនគរបាលខណ្ឌដូនពេញបានឲ្យដឹងនៅព្រឹកថ្ងៃទី១១ ខែមេសា ឆ្នាំ២០១៩នេះថា កម្លាំងជំនាញខណ្ឌ កំពុងស្រាវដើម្បីស្វែងរកជនបង្ក ដែលប្រើអំពើហិង្សាដោយទះកំផ្លៀងស្ត្រីម្នាក់បណ្តាលឲ្យដួលដាច់ផ្ងារនៅសង្កាត់ផ្សារកណ្តាល ខណ្ឌដូនពេញ។
លោកអធិការខណ្ឌដូនពេញបានបញ្ជាក់ទៀតថា «កម្លាំងនគរបាលខណ្ឌដូនពេញ បានបើកការស្រាវជ្រាវតាំងពីយប់មកម្ល៉េះ ក្រោយពីទទួលបានព័ត៌មាន និងឃើញវីដេអូបុរស ដែលទះកំផ្លៀងស្ត្រីម្នាក់នោះ ដោយបានចុះដល់កន្លែងកើតហេតុស្រាវជ្រាវយ៉ាងដុតដៃដុតជើង ហើយបើទោះបីមិនទាន់បានព័ត៌មានច្រើន ក៏ប៉ុន្តែកម្លាំងនគរបាលនឹងបន្តស្រាវជ្រាវ ដោយសហការជាមួយនគរបាលចរាចរណ៍ ដើម្បីស្វែងរកឲ្យឃើញជនបង្កនោះឲ្យទាល់តែឃើញតែម្តង។
ជាមួយគ្នានោះដែរកម្លាំងសមត្ថកិច្ចបានរកឃើញអត្តសញ្ញាណរថយន្តរបស់បុរស ដែលបានប្រើហិង្សាទះកំផ្លៀងនារីម្នាក់ឱ្យដួលអុកគូទនៅផ្សារកណ្តាលទី១ ខណ្ឌដូនពេញហើយ។ បើតាមសមត្ថកិច្ចបានអះអាងថា រថយន្តដែលបុរសប្រើហិង្សានេះជិះ គឺបានចុះបញ្ជីថាជាកម្មសិទ្ធិរបស់ក្រុមហ៊ុន មិនមែនជាកម្មសិទ្ធិបុគ្គលនោះឡើយ។ ព្រោះតែហេតុនេះហើយ ទើបនាំឱ្យសមត្ថកិច្ចពិបាកកំណត់មុខសញ្ញារបស់ជនប្រើហិង្សា តែទោះជាយ៉ាងណាតាមរយៈតម្រុយនេះ គឺនឹងឈានទៅកំណត់មុខ សញ្ញារបស់បុរសប្រើហិង្សាក្នុងពេលឆាប់ៗនេះ។
គួរបញ្ជាក់ថា កាលពីថ្ងៃទី០៩ ខែមេសា ឆ្នាំ២០១៩ បុរសម្នាក់បានទះកំផ្លៀងនារីម្នាក់ឱ្យដួលអុកគូទទៅនឹងថ្នល់ បន្ទាប់ពីមានជម្លោះពាក្យសម្តីនឹងគ្នា។ ហេតុការណ៍ហិង្សានេះ កើតឡើងនៅចំណុចផ្លូវលេខ១៣៦ កែងនឹងផ្លូវលេខ១៥ សង្កាត់ផ្សារកណ្តាលទី១ ខណ្ឌដូនពេញ។
យោងតាមស្ត្រីដែលជាអ្នករងនូវអំពើហិង្សាបានរៀបរាប់ឱ្យដឹងថា មុនពេលកើតហេតុបុរសបង្កអំពើហិង្សា បានបើករថយន្តយ៉ាងលឿនចូលទៅទិញថ្នាំពេទ្យ។ ដោយឃើញរថយន្តបើកលឿនស្ទើរតែបុកខ្លួន ដែលកំពុងដើរនោះ នារីរងគ្រោះ ក៏បានលាន់មាត់ថា ប្រញាប់ទៅណាហេតុអ្វីក៏បើកលឿនម្ល៉េះ។
បើតាមការរៀបរាប់របស់នារីរងគ្រោះ បានឱ្យដឹងទៀតថា ក្រោយខ្លួនលើកឡើងបែបនោះ បុរសបង្កអំពើហិង្សាក៏បានជេរម្តាយខ្លួន ខ្លួនក៏បានជេរតបទៅលើជនបង្កហិង្សាវិញផងដែរ។
បន្ទាប់ពីនារីរងគ្រោះជេរតបបុរស ដែលគេមិនទាន់ស្គាល់អត្តសញ្ញាណនៅឡើយនោះ បានស្ទុះមកទះនារីរងគ្រោះមួយកំផ្លៀងឱ្យដួលអុកគូទទៅនឹងថ្នល់តែម្តង។ ក្រោយពីទះកំផ្លៀងហើយ បុរសបង្កហេតុក៏បានបើករថយន្តចេញ ពីកន្លែងកើតហេតុបាត់ទៅ។
ជាមួយនឹងហេតុការណ៏នោះដែរលោក ថោង ពិសិដ្ឋ មេបញ្ជាការកងរាជអាវុធហត្ថខណ្ឌដូនពេញក៏បានបញ្ជាក់នាព្រឹកថ្ងៃទី១១ខែមេសាឆ្នាំ២០១៩នេះថា ពាក់ព័ន្ធនឹងហេតុការណ៍បុរសម្នាក់ទះកំផ្លៀងស្ត្រីម្នាក់បណ្តាលឲ្យដួលដាច់ផ្ងារនោះ កម្លាំងជំនាញកងរាជអាវុធហត្ថក៏កំពុងតែស្រាវជ្រាវតាមចាប់ជនដៃដល់រូបនោះដើម្បីចាត់ការតាមនីតិវិធីច្បាប់ផងដែរ៕
Source: Kampuchea Thmey Daily
0 Comments