ប្រជាជនអេហ្ស៊ីបបានចាប់ផ្តើមបោះឆ្នោតនៅថ្ងៃសៅរ៍ក្នុងការធ្វើប្រជាមតិមួយដែលមានគោលបំណងពង្រឹងការគ្រប់គ្រងរបស់លោកប្រធានាធិបតី Abdel Fattah al-Sisi។ថ្វីបើមានការតវ៉ាពីក្រុមសិទ្ធិមនុស្សក្ដី ក៏ការធ្វើប្រជាមតិរយៈពេលបីថ្ងៃនេះត្រូវបានគេរំពឹងថានឹងអនុម័តលើការកែប្រែរដ្ឋធម្មនុញ្ញដ៏ទូលំទូលាយដែលនឹងពង្រីកអាណត្តិរបស់លោក Sisi រហូតដល់យ៉ាងហោចណាស់ឆ្នាំ២០២៤នៅក្នុងរដ្ឋធំបំផុតរបស់អារ៉ាប់មួយនេះ។
លើសពីនេះទៀត ការធ្វើវិសោធនកម្មនេះនឹងអនុញ្ញាតឲ្យលោក Sisi ឈរឈ្មោះសម្រាប់អាណត្តិរយៈពេល៦ឆ្នាំទៀតហើយបង្កើនការគ្រប់គ្រងរបស់លោកលើប្រព័ន្ធតុលាការនិងផ្ដល់ឲ្យយោធានូវឥទ្ធិពលកាន់តែខ្លាំងថែមទៀត។បុរសវ័យ៦៤ឆ្នាំរូបនេះបានចាប់យកអំណាចនៅក្នុងឆ្នាំដ៏ច្របូកច្របល់បន្ទាប់ពីបាតុកម្ម Arab Spring ឆ្នាំ២០១១បានផ្ដួលរំលំមេដឹកនាំយូរអង្វែងលោក Hosni Mubarak ហើយក្រោយមកត្រូវកាន់ តំណែងដោយប្រធានាធិបតីឥស្លាមលោក Mohamed Morsi ។
លោក Sisi បានទម្លាក់លោក Morsi ក្នុងឆ្នាំ២០១៣ហើយឆ្នាំបន្ទាប់ លោកបានឈ្នះតំណែងជាប្រធានាធិបតីអាណត្តិដំបូង។ គាត់បានជាប់ឆ្នោតជាថ្មី នៅក្នុងខែមីនាឆ្នាំ២០១៨ជាមួយសំឡេងជាង៩៧ភាគរយបន្ទាប់ពីបានឈរឈ្មោះដោយគ្មានការប្រឆាំង។ក្រុមអ្នកសង្កេតការណ៍អន្តរជាតិបានរិះគន់ការបោះឆ្នោតទាំងពីរខណៈរដ្ឋាភិបាលរបស់លោក Sisi បានទទួលរងការរិះគន់យ៉ាងទូលំទូលាយចំពោះការបង្ក្រាបយ៉ាងឃោរឃៅលើគូប្រជែងរបស់ខ្លួនទាំងក្រុមឥស្លាមនិយមនិងក្រុមមិនមានសាសនា។
អង្គការឃ្លាំមើលសិទ្ធិមនុស្សបានចោទប្រកាន់ថា ការធ្វើវិសោធនកម្មរដ្ឋធម្មនុញ្ញនេះមានគោលបំណង ពង្រឹងការគ្រប់គ្រងផ្តាច់ការរបស់លោក Sisi ខណៈពេលដែលអង្គការលើកលែងទោសបាននិយាយថា សភាបានបង្ហាញពីការមិនគោរពសិទ្ធិមនុស្ស។ គួរបញ្ជាក់ថា សម្រាប់រយៈពេលប៉ុន្មានសប្តាហ៍កន្លងមកនេះ ផ្លូវនានារបស់ប្រទេសអេហ្ស៊ីបគឺពោរពេញទៅដោយបដានិងផ្ទាំងប៉ាណូដែលជំរុញឲ្យប្រជាពលរដ្ឋធ្វើអ្វីដែលត្រឹមត្រូវហើយបោះឆ្នោត “Yes”៕ AFP
Source: Kampuchea Thmey Daily
0 Comments