ភ្នំពេញ ៖ នៅក្នុងថ្ងៃបុណ្យចូលឆ្នាំខ្មែរកន្លងទៅនេះ បងប្អូនប្រជាពលរដ្ឋ មកពីតាមបណ្តា ខេត្ត ក្រុងនានា បាននាំគ្នាទៅសុំទឹកមន្តយកមកប្រោះព្រំ ដែលទឹកមន្តនេះ គឺចេញពីល្អាងថ្មភ្នំ ស្ថិតនៅលើកំពូលភ្នំ នៃវត្តភ្នំខ្លែង។
យោងតាមប្រភពពី លោកតា ចាំង យឿង អាយុ៦២ឆ្នាំ ដែលចាំដងទឹកមន្តនៅល្អាងថ្មបានប្រាប់កម្ពុជាថ្មីឲ្យដឹងថា ជារៀងរាល់ថ្ងៃ មានប្រជាពលរដ្ឋមកពីតាមបណ្តាខេត្ត/ក្រុង បាននាំគ្នាមកសុំទឹកមន្តសក្ដិសិទ្ធិ ដែលស្ថិតនៅលើកំពូលភ្នំក្នុងវត្តភ្នំខ្លែង ដែលមានទីតាំងក្នុងភូមិភ្នំខ្លែង ឃុំព្រៃស្លឹក ស្រុកទ្រាំង ខេត្តតាកែវ។ ទឹកមន្តនេះ គឺចេញពីល្អាងថ្មភ្នំ ហើយដងមិនចេះអស់ អញ្ចឹងហើយ ទើបចាស់ៗនិយាយថា ជាទឹកមន្តអាចយកទៅប្រោះព្រំឲ្យមានសេចក្តីសុខ និងយកទៅចែកចាយដល់ក្រុមគ្រួសារដែលពុំបានមកសុំផ្ទាល់នោះ។
លោកតាបន្តថា ទឹកមន្តនេះ គឺបានកកើតឡើងតាំងពីដើមមក ដែលនិយាយរួម គឺតាំងពីជំនាន់សម្ដេចឪមកម្ល៉េះ។ ហើយមកដល់ជំនាន់ ប៉ុល ពត ត្រូវបានមេខ្មែរក្រហម យកគ្រឿងចក្រមកឈូសរំលាយភ្នំនេះ តែដោយសារបារមីសក្ដិសិទ្ធិ គឺគ្រឿងចក្រដែលមកឈូសឆាយបានខូចជាច្រើនគ្រឿងទើបពួកគេបញ្ឈប់ទៅវិញ រហូតដល់របបខ្មែរក្រហម ត្រូវរលំរលាយទៅ។ លុះមកដល់សព្វថ្ងៃ វត្តភ្នំខ្លែង ត្រូវបានសាងសង់ និងមានព្រះពុទ្ធបដិមាករពូកែសក្ដិសិទ្ធិ ហើយអ្វីដែលប្រជាពលរដ្ឋមានជំនឿខ្លាំងលើសលប់នោះ គឺឲ្យតែចង់ប្រាថ្នាអ្វី គេមកបន់ស្រន់ គឺបានសម្រេចដូចក្តីបំណង ទើបគេសង្កេតឃើញមានប្រជាពលរដ្ឋមកពីតាមបណ្តាខេត្តឆ្ងាយៗមកបន់ស្រន់ ព្រោះគេជឿជាក់ថា បារមីវត្តភ្នំខ្លែងពូកែណាស់៕
Source: Kampuchea Thmey Daily
0 Comments