ភ្នំពេញ ៖ តារាប្រុស-ស្រីល្បីៗរបស់ខ្មែរប្រមាណ១០រូប បាននាំគ្នាឡើងយន្តហោះទៅចូលរួមបំបែកកំណត់ត្រាប្រចាំឆ្នាំក្នុងព្រឹត្តិការណ៍ប្រគំតន្ត្រីសង្ក្រាន្តសប្បុរសធម៌ ដើម្បីស្វែងរកជំនួយជួយដល់មន្ទីរពេទ្យគន្ធបុប្ផា។
នៅក្នុងការប្រគំតន្ត្រីនេះ ត្រូវបានរំពឹងថា មានអ្នកចូលរួមរាំចង្វាក់ រាំវង់ មានវង់ធំជាងគេលើពិភពលោក ដែលមានតារាចម្រៀងល្បីក្នុងប្រទេសកម្ពុជាចំនួន១០រូប ដឹកនាំដោយ លោកឧកញ៉ា ឡេង ណាវ៉ាត់ត្រា បានទៅដល់ប្រទេសកូរ៉េខាងត្បូងដោយសុវត្ថិភាពហើយ ដូចនេះបងប្អូនខ្មែរ អាចចូលរួមរាំកម្សាន្តលេងឲ្យបែកអាចម៍ក្លៀក ដោយសេរី។
ក្រុមតារាល្បីៗរបស់ប្រទេសកម្ពុជាដែលបានទៅចូលរួម នៃការប្រគំតន្ត្រីខ្នាតយក្សខាងលើ ពួកគេបានចេញទៅតាំងតែពីថ្ងៃទី១៨ ខែមេសា ឆ្នាំ២០១៩មកម្ល៉េះ ដោយនៅក្នុងនោះគ្រាន់តែចូលទៅដល់ទឹកដីកូរ៉េភ្លាម ត្រូវបានអ្នករៀបចាំកម្មវិធី និង អ្នកគាំទ្ររបស់ពួកគេទទួលយ៉ាងកក់ក្ដៅបំផុត។
តារាល្បីៗមកពីប្រទេសកម្ពុជា ដែលបានអញ្ជើញទៅចូលរួមមានដូចជា ៖ កញ្ញា ឡូ រ៉ាម៉ម, លោក ខេម,លោក វុទ្ធា, កញ្ញា បាន ម៉ុន្នីល័ក្ខ,លោក ចាន់ សម័យ, កញ្ញ៉ា យូរី, លោក Bmo លោក Tampo,ពិធីករ កំពូលកូ លោក ប៉ែនចំរ៉ុង និង លោក យឹម តាស្រង់ និងដឹកនាំលើការប្រគំតន្ត្រីនេះ។
ការប្រគំតន្ត្រីខាងលើ ធ្វើឡើងតែ១ថ្ងៃប៉ុណ្ណោះ ដោយមិនមានការលក់សំបុត្រឡើយ គឺបងប្អូនពលករខ្មែរអាចចូលរួមទស្សនាដោយសេរី។ទីតាំងនេះធ្វើការប្រគំតន្ត្រីនៅល្ងាចនេះតែម្ដង ទីកន្លែង នៃការប្រគំ តន្ត្រីរបស់យើងធ្វើនៅ ទីក្រុង ប៊ូសាន សួនឧទ្យាន សាមណាក់ក្បែរស្ថានីយរថភ្លើងសាសាង ឬតាមអាសយដ្ឋាន 부산 사상구 삼락동 29-51 ចាប់ពីម៉ោង៤ល្ងាច ដល់ម៉ោង១០យប់។
តាមការរំពឹងទុក ព្រឹត្តិការណ៍ខាងលើ នឹងមានបងប្អូនខ្មែរទៅចូលរួមទស្សនាច្រើនម៉ឺននាក់ ហើយអាចស្វែងរកមូលនិធិបានច្រើន ដើម្បីយកមកជួយដល់មន្ទីរពេទ្យគន្ធបុប្ផាដែលកំពុងខ្វះខាត។
ក្រៅពីនោះ សកម្មភាព នៃការរាំលេង របស់បងប្អូន នឹង បន្សល់នៅវីដេអូ MV ដ៏អស្ចារ្យ ទុកជាអនុស្សាវរីយ របស់ខ្មែរលើ ទឹកដី កូរ៉េ ដែលមិនធ្លាប់មានថែមទៀតផង៕
Source: Kampuchea Thmey Daily
0 Comments