ឧត្ដរមានជ័យ ៖ ករណីបុរសម្នាក់ ស្លាប់នៅក្នុងបន្ទប់ឃុំខ្លួន នៅក្នុងប៉ុស្តិ៍នគរបាលរដ្ឋបាលសង្កាត់អូរស្មាច់ កាលពីវេលាម៉ោង៣រសៀល ថ្ងៃទី០៤ ខែឧសភា ឆ្នាំ២០១៩ កន្លងទៅថ្មីៗនេះ ដែលមហាជនយល់ច្រឡំថា ជារឿងអាថ៌កំបាំងនោះ ពេលនេះបានលាតត្រដាងការពិតហើយ។
បើយោងទៅតាមរបាយការណ៍របស់អធិការក្រុងសំរោង បានបញ្ជាក់ថា ករណីបុរសម្នាក់ឈ្មោះ ធូ ហាត ភេទប្រុស អាយុ៣៧ឆ្នាំ រស់នៅភូមិក្រសាំង សង្កាត់បុស្បូវក្នុង ក្រុងសំរោង ខេត្តឧត្ដរមានជ័យដែលបានស្លាប់នៅក្នុងបន្ទប់ឃុំខ្លួននៅក្នុងប៉ុស្តិ៍នគរបាលរដ្ឋបាលសង្កាត់អូរស្មាច់ កាលពីវេលាម៉ោង១៥និង០០នាទី ថ្ងៃ០៤ ខែឧសភា ឆ្នាំ២០១៩ ជាករណី អត្តឃាត(ចង.ក) សម្លាប់ខ្លួនដោយច្រវាក់ រឹត.ក ខ្លួនឯង បណ្ដាលឲ្យស្លាប់ នៅក្នុងបន្ទប់ឃុំឃាំង។
របាយការណ៍របស់សមត្ថកិច្ចបានបញ្ជាក់ថា សាកសពដែលបានធ្វើអត្តឃាតខាងលើ ជាជនសង្ស័យ ករណីខ្ចីម៉ូតូអ្នកភូមិជាមួយគ្នាតែមួយភ្លែត យក មកក្រុងសំរោង រហូតដល់ថ្ងៃទី០៤ ខែឆ្នាំខាងលើ ក៏ត្រូវបានម្ចាស់ម៉ូតូប្ដឹង។
នៅម៉ោងប្រហែល១៤និង៣០នាទី ឈ្មោះ ធូ ហាត បានយកម៉ូតូ ម៉ាកវេវ ពណ៌ខ្មៅ លាយក្រហម គ្មានប័ណ្ណសម្គាល់ យកមកលក់ឲ្យ ឈ្មោះ អឿន ពេជ្រ ភេទប្រុស អាយុ២៧ឆ្នាំ មានទីលំនៅភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្ដរមានជ័យ ដែលមានមុខរបរជាជាងម៉ូតូ ហើយបាននាំគ្នាមកធ្វើសំបុត្រស្នាមនៅនឹងប៉ុស្ដិ៍នគរបាល ក៏ត្រូវបានសមត្ថកិច្ចប៉ុស្តិ៍ធ្វើការឃាត់ខ្លួន និងរាយការណ៍ជូនថ្នាក់លើ។
ការស្លាប់ ឈ្មោះ ធូ ហាត ដោយមានគណៈកម្មាធិការត្រួតពិនិត្យសាកសព មានសមាសភាពចូលរួមចំនួន១១នាក់ ដឹកនាំដោយលោកឧត្ដមសេនីយ៍ត្រី ឡឹក សុខា ស្នងការរងនគរបាលខេត្ត ផ្នែកព្រហ្មទណ្ឌ និងសម្របសម្រួលដោយ លោក គង់ រតនា ព្រះរាជអាជ្ញារងអមសាលាដំបូងខេត្តឧត្ដរមានជ័យផងដែ។
ក្រោយមានការត្រួតពិនិត្យសាកសព ឈ្មោះ ធូ ហាត រួចមក ក្រុមគណៈកម្មការបានសន្និដ្ឋានថា ពិតជាស្លាប់ដោយសារករណីចង.ក ធ្វើអត្តឃាត នៅក្នុងបន្ទប់ឃុំឃាំងពិតប្រាកដមែន ហើយសមត្ថកិច្ច ក៏បានប្រគល់សាកសពជូនដល់ក្រុមគ្រួសារយកទៅធ្វើបុណ្យទៅតាមប្រពៃណី៕
Source: Kampuchea Thmey Daily
0 Comments