ប្រទេសចិនកាលពីថ្ងៃច័ន្ទនេះបាននិយាយថា ខ្លួននឹងបន្តផែនការបញ្ជូនក្រុមអ្នកចរចាទៅកាន់សហរដ្ឋអាមេរិកដើម្បីកិច្ចចរចាពាណិជ្ជកម្ម ទោះបីប្រធានាធិបតីអាមេរិកដូណាល់ត្រាំបានប្ដេជ្ញាថានឹងដំឡើងពន្ធនៅចុងសប្ដាហ៍នេះ ដែលជាការគំរាមកំហែងមួយអាចនាំឱ្យទីផ្សារភាគហ៊ុនឈានទៅដល់ភាពវឹកវរ។
លោកត្រាំបានធ្វើឱ្យបញ្ហាកាន់តែក្ដៅឡើងស្របពេលដែលក្រុមអ្នកចរចាបានត្រៀមខ្លួនជួបលោកក្នុងក្រុងវ៉ាស៊ីនតោនកាលពីថ្ងៃពុធសម្រាប់អ្វីដែលត្រូវបានចាត់ទុកជាជុំសំខាន់ចុងក្រោយសម្រាប់ការចរចាទាំងឡាយដើម្បីឈានទៅដល់កិច្ចព្រមព្រៀងឬបង្កឱ្យភ្លើងសង្គ្រាមពាណិជ្ជកម្មផ្ទុះឡើង។
លោកត្រាំបានសរសេរនៅលើ Twitter កាលពីថ្ងៃអាទិត្យថា "កិច្ចព្រមព្រៀងពាណិជ្ជកម្មជាមួយប្រទេសនឹងនៅតែបន្តប៉ុន្តែយឺតពេកពេលដែលពួកគេមានបំណងចរចាម្ដងទៀតគឺអត់ទេ!” មេដឹកនាំអាមេរិករូបនេះបាននិយាយថាពន្ធប្រមាណ២០០ពាន់លានដុល្លារលើទំនិញរបស់ចិននោះនឹងត្រូវដំឡើងបន្ថែមទៀតពី១០% ទៅ២៥% ក្នុងថ្ងៃសុក្រនេះ។សហរដ្ឋអាមេរិកបានអនុវត្តការដំឡើងពន្ធលើការនាំចូល២៥% លើផលិតផលបច្ចេកវិទ្យាខ្ពស់របស់ចិនដែលមានតម្លៃ៥០ពាន់លានដុល្លាររួចមកហើយ។
លោកត្រាំក៏បានបន្តការគំរាមកំហែងសាជាថ្មីដើម្បីដាក់ពន្ធលើការនាំចូលទាំងអស់របស់ចិនមកកាន់សហរដ្ឋអាមេរិកដែលមានតម្លៃ៥៣៩,៥ពាន់លានដុល្លារកាលពីឆ្នាំទៅ។ ទោះបីការបង្ហោះដ៏បង្កជាព្យុះភ្លៀងរបស់លោកត្រាំលើបណ្ដាញសង្គម Twitter ក្ដីអ្នកនាំពាក្យក្រសួងការបរទេសរបស់ចិនលោក Geng Shuang បាននិយាយថាភាគីចិនបានត្រៀមខ្លួនដើម្បីទៅកាន់សហរដ្ឋអាមេរិកដើម្បីកិច្ចចរចាហើយប៉ុន្តែលោកមិនបានឱ្យដឹងទេតើពេលណាឬថាតើអ្នកចរចាកំពូលលោក Liu He ជាអ្នកដឹកនាំគណៈប្រតិភូឬយ៉ាងណានោះទេ។ លោកGengបាននិយាយថាដំណើរការដ៏វិជ្ជមានត្រូវបានធ្វើឡើងក្នុងកិច្ចចរចាជាន់ខ្ពស់១០លើកហើយពិភពលោកទាំងមូលកំពុងតាមដានរឿងនេះ៕AFP
Source: Kampuchea Thmey Daily
0 Comments