រតនគិរី ៖ ករណីគួរឲ្យមានការភ្ញាក់ផ្អើល និងភ័យខ្លាចទាំងកណ្តាលយប់ ខណៈមានហេតុការណ៍ទុសេ្សខ្សែកាបភ្លើងធំបញ្ជូនចរន្តអគ្គិសនីកាលពីវេលាម៉ោង៩យប់ថ្ងៃទី៦ខែឧសភាឆ្នាំ២០១៩បណ្តាលឲ្យតៃកុងរថយន្តម្នាក់មានឈ្មោះថូ រតនា ភេទប្រុស អាយុ២១ឆ្នាំ ជនជាតិខ្មែរ មានទីលំនៅភូមិ១(ក្រុមតាស៊ុយ) សង្កាត់កាចាញ ក្រុងបានលុង ខេត្តរតនគិរី បានស្លាប់ភ្លាមៗនៅនឹងកន្លែងកើតហេតុ និងផ្ទុះកង់រថយន្តអស់ចំនួន១២គ្រាប់។
បើតាមប្រភពពីប្រជាពលរដ្ឋនៅកន្លែងកើតហេតុបានឲ្យក្រុមអ្នកសារព័ត៌មានដឹងថា មុនពេលកើតហេតុ តៃកុងរថយន្តខាងលើ បានរៀបចំចតរថយន្តរបស់ខ្លួននៅចំហៀងផ្ទះ ហើយបានចូលទៅដេកនៅក្នុងកាប៊ីនរថយន្ត មួយសន្ទុះក្រោយមក ក៏ស្រាប់តែមានការទុសេ្សខ្សែកាបធំបញ្ជូនចរន្តអគ្គិសនីដាច់ខ្សែកាបធំនោះធ្លាក់មកលើរថយន្ត ហើយចុងខ្សែធ្លាក់ដល់ដី ប៉ះនឹងកង់រថយន្ត បណ្តាលឲ្យផ្ទុះកង់អស់ចំនួន១២គ្រាប់លាន់រំពងដូចគ្រាប់បែកទាំងកណ្តាលយប់ បង្កឲ្យមានការភ្ញាក់ផ្អើល និងភ័យខ្លាចស្លន់ស្លោដល់ប្រជាពលរដ្ឋដែលរស់នៅក្បែរៗនោះរត់ចែកជើងគ្នា។
ប្រភពបានបន្តទៀតថា ក្រោយពីផ្ទុះកង់រថយន្ត តៃកុងរថយន្តខាងលើក៏បានបើកទ្វារលោតចេញមកក្រៅ ក៏ប៉ុន្តែស្របពេលនោះដៃតៃកុងប៉ះទៅនឹងដែកទ្វារ រថយន្ត បណ្តាលឲ្យឆក់ធ្លាក់ពីលើរថយន្តផ្កាប់មុខមកដីស្លាប់ៗនៅនឹងកន្លែងកើតហេតុនោះតែម្តង។
ក្រោយកើតហេតុ គេឃើញមានរថយន្តពន្លត់អគ្គិភ័យរបស់ស្នងការខេត្តចំនួន២គ្រឿង និងរថយន្តរបស់អធិការស្រុកអូរជុំចំនួន១គ្រឿង ដើម្បីអន្តរាគមន៍ជួយបាញ់ពន្លត់ ហើយក្នុងនោះក៏មានមន្ត្រីខាងអគ្គិសនីចុះទៅពិនិត្យ និងបិទចរន្តអគ្គិសនីផងដែរ។
ក្នុងនោះ ក៏មានរថយន្តសាមុយរបស់ស្នងការខេត្ត បានមកដឹកជនរងគ្រោះយកទៅមន្ទីរពេទ្យបង្អែកខេត្តដើម្បីសង្គ្រោះបន្ទាន់ផងដែរ ប៉ុន្តែជាអកុសល ខាងមន្ទីរពេទ្យបានប្រាប់ថា ជនរងគ្រោះបានស្លាប់បាត់បង់ជីវិតទៅហើយ។
ទាក់ទងទៅនឹងករណីខាងលើផងដែរ ប្រធានអគ្គិសនីខេត្តរតនគិរីមិនអាចសុំការបំភ្លឺជុំវិញរឿងនេះបានទេ ព្រោះអ្នកសារព័ត៌មានយើងបានទំនាក់ទំនងទៅផ្នែករដ្ឋបាល និងមន្ត្រីអគ្គិសនីមួយទៀត ប៉ុន្តែពួកគាត់ដូចជាមានការលាក់លៀម ហើយឆ្លើយថា អត់ស្គាល់លេខមេទេ។
ចំណែកក្រុមគ្រួសារ នៃសពរបស់ជនរងគ្រោះ បានសូមអំពាវនាវដល់លោកប្រធានអគ្គិសនីខេត្តរតនគិរី គួរតែចេញមុខទទួលខុសត្រូវក្នុងករណីទុសេ្សដាច់ខ្សែកាបបញ្ជូនចរន្តអគ្គិសនីផង មិនគួរគេចវេះនោះទេ ព្រោះថាហេតុការណ៍ខាងលើនេះ វាបណ្តាលមកពីទុសេ្សខ្សែកាបភ្លើងធំរបស់អគ្គិសនីទេ ដែលបានដាច់ធ្លាក់មកប៉ះនឹងរថយន្តរបស់គាត់ដែលចតទុកស្ងៀមនៅក្បែរផ្ទះ ទើបបង្កឲ្យមានគ្រោះថ្នាក់ដល់អាយុជីវិត និងរថយន្តយ៉ាងដូច្នេះ៕
Source: Kampuchea Thmey Daily
0 Comments