ទីភ្នាក់ងារសារព័ត៌មានរដ្ឋបានរាយការណ៍ថា កាលពីថ្ងៃចន្ទ ស្ថាប័នបោះឆ្នោតកំពូលរបស់ប្រទេសទួរគីបានចេញបញ្ជាឲ្យរៀបចំឡើងវិញនូវការបោះឆ្នោតតំណែងអភិបាលក្រុងអ៊ីស្តង់ប៊ុលបន្ទាប់ពីគណបក្សរបស់លោកប្រធានាធិបតី Recep Tayyip Erdogan បានតវ៉ាអំពីបរាជ័យរបស់ខ្លួនដ៏គួរឲ្យភ្ញាក់ផ្អើលនៅក្នុងការបោះឆ្នោតនេះ។
ទោះបីជាយ៉ាងណាក៏ដោយ អ្នកឈ្នះក្នុងការបោះឆ្នោតនេះគឺលោក Ekrem Imamoglu នៃគណបក្សសាធារណរដ្ឋប្រជាមានិត (CHP) បានប្តេជ្ញាប្រយុទ្ធប្រឆាំង។
លោកបានប្រាប់ក្រុមអ្នកគាំទ្ររាប់ពាន់នាក់នៅជាយក្រុងអ៊ីស្តង់ប៊ុលបន្ទាប់ពីសេចក្តីសម្រេចនេះថា “ពួកគេកំពុងព្យាយាមយកការបោះឆ្នោតដែលយើងឈ្នះទៅវិញ។ ប្រហែលជាអ្នកមិនសប្បាយចិត្តទេប៉ុន្តែមិនដែលបាត់បង់ក្តីសង្ឃឹមរបស់អ្នកឡើយ”។
លោក Imamoglu បានផ្តួលបេក្ខជននៃគណបក្សយុត្តិធម៌និងអភិវឌ្ឍន៍ (AKP) ដែលកំពុងកាន់អំណាចនៅក្នុងការបោះឆ្នោតមូលដ្ឋានកាលពីថ្ងៃទី៣១ខែមីនាដើម្បីគ្រប់គ្រងទីក្រុងធំបំផុតរបស់ប្រទេសទួរគីមួយនេះ។
វាគឺជាការចាញ់ឆ្នោតដ៏កម្រមួយសម្រាប់លោក Erdoganទាំងខ្លួនឯងផ្ទាល់ជាអតីតចៅហ្វាយក្រុងនេះ។
ប៉ុន្តែគណបក្ស AKP បានបដិសេធទទួលយកបរាជ័យនេះដោយនិយាយថា មានភាពមិនប្រក្រតីនិងអំពើពុករលួយនៅក្នុងការបោះឆ្នោតនេះ។
លោក Imamoglu ទទួលបានត្រឹមតែ១៣,០០០សំឡេងប៉ុណ្ណោះប៉ុន្ដែត្រូវបានគេបញ្ជាក់បន្ទាប់ពីការរាប់សន្លឹកឆ្នោតឡើងវិញរយៈពេល២សប្តាហ៍កាលពីខែមេសា។
លោក Erdogan ធ្លាប់បាននិយាយថា ជ័យជំនះក្នុងទីក្រុងអ៊ីស្តង់ប៊ុលគឺដូចជាការឈ្នះប្រទេសទាំងមូលអញ្ចឹង។
ការចាញ់តំណែងអភិបាលក្នុងទីក្រុងអ៊ីស្តង់ប៊ុលរួមជាមួយការបរាជ័យយ៉ាងខ្លាំងមួយទៀតនៅក្នុងរដ្ឋធានីអង់ការ៉ាបានឆ្លុះបញ្ចាំងពីការព្រួយបារម្ភជាទូទៅទៅលើសេដ្ឋកិច្ចដែលកំពុងយ៉ាប់យ៉ឺន៕ AFP
Source: Kampuchea Thmey Daily
0 Comments