ប៉ូលិសរដ្ឋ New South Wales បាននិយាយថា ស្ត្រីម្នាក់អាយុ២៥ឆ្នាំបានគប់ស៊ុតមួយគ្រាប់ចំក្បាលរបស់នាយករដ្ឋមន្ត្រីអូស្ត្រាលីលោក Scott Morrison នៅឯព្រឹត្តិការណ៍ឃោសនាបោះឆ្នោតមួយកាលពីថ្ងៃអង្គារហើយត្រូវបានគេចាប់ខ្លួន។
ឆ្មាំសន្តិសុខបានចូលអន្តរាគមន៍យ៉ាងលឿនហើយបានអូសនាងចេញ។
សេចក្តីថ្លែងការណ៍របស់ប៉ូលិសបាននិយាយថា “មន្ត្រីប៉ូលិសមកពីសង្កាត់ Murray River បានចាប់ខ្លួនស្ត្រីម្នាក់នេះបន្ទាប់ពីនាងបានគប់ស៊ុតដាក់នាយករដ្ឋមន្ត្រីអំឡុងព្រឹត្តិការណ៍របស់សមាគមន៍ស្ត្រីនៅមជ្ឈមណ្ឌល Albury Entertainment”។
ប៉ូលិសបាននិយាយថា “ស៊ុតហាក់ដូចជាចំក្បាលរបស់លោកនាយករដ្ឋមន្ត្រី”។
ទោះបីជាយ៉ាងណាក៏ដោយ ពួកគេមិនបានបង្ហាញឈ្មោះរបស់អ្នកតវ៉ានោះទេ។
រូបភាពក្នុងទូរទស្សន៍បានបង្ហាញថា លោក Morrison បានជូតក្បាលរបស់គាត់ភ្លាមៗបន្ទាប់ពីស៊ុតត្រូវបានគេគប់ដាក់ហើយបន្ទាប់មកបានជួយស្ត្រីវ័យចំណាស់ម្នាក់ដែលត្រូវបានគេរុញឲ្យដួលនៅក្នុងការប្រវាយប្រតប់។
ប៉ូលិសបាននិយាយថា គ្មានអ្នករងរបួសត្រូវបានគេរាយការណ៍ទេ។
ឧបទ្ទវហេតុនេះបានកើតឡើងក្នុងអំឡុងពេលនៃការធ្វើទស្សនកិច្ចរបស់លោកនាយករដ្ឋមន្ដ្រីទៅកាន់ទីក្រុង Albury ដែលជាមណ្ឌលបោះឆ្នោតនៅរដ្ឋ New South Wales និងជាកន្លែងដែលបេក្ខជនឯករាជ្យម្នាក់ត្រូវបានគេពេញចិត្តនៅពេលដែលអ្នកបោះឆ្នោតតាមជនបទបោះបង់ចោលរដ្ឋាភិបាល។
ក្រោយមក បាតុករស្រីម្នាក់នេះបានប្រាប់ក្រុមអ្នកកាសែតថា សកម្មភាពរបស់នាងគឺធ្វើឡើងដោយខ្លួនឯងហើយសំដៅទៅកោះ Manus ក្នុងប្រទេសប៉ាពួញូហ្គីណេដែលជាកន្លែងអូស្ត្រាលីឃុំឃាំងជនភៀសខ្លួនជាយូរមកហើយ៕ REUTERS
Source: Kampuchea Thmey Daily
0 Comments