ព្រះវិហារ ៖ កាលពីថ្ងៃទី០៥ ខែឧសភា ឆ្នាំ២០១៩ វេលាម៉ោង០៨និង៤០នាទីយប់ មានករណីរំលោភសេពសន្ថវៈ(បូក)នៅភូមិស្រែវាលលិច ឃុំខ្យង ស្រុកជ័យសែន ដែលទីតាំងកើតហេតុចម្ងាយពីរោងការ២,៥គីឡូម៉ែត្រ។ ជនសង្ស័យចំនួនពីរនាក់ ត្រូវសមត្ថកិច្ចនគរបាលឃាត់ខ្លួន។
នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តព្រះវិហារបានឲ្យដឹងថា ជនរងគ្រោះ ឈ្មោះ ន ស ត អាយុ១៩ឆ្នាំ មុខរបរសិស្សសាលា រស់នៅនៅភូមិខ្យង ឃុំខ្យង ស្រុកជ័យសែន។
លោកបន្តថា ជនសង្ស័យទី១.ឈ្មោះ ធួន សុផា អាយុ១៩ឆ្នាំ មុខរបរកសិករ រស់នៅភូមិស្លែង ឃុំខ្យងស្រុកជ័យសែន និង ទី២.ឈ្មោះ ថេន ផល្លា អាយុ២១ឆ្នាំ មុខរបរកសិករ រស់នៅភូមិចំរើន ឃុំខ្យងស្រុកជ័យសែន។
បើតាមសម្ដីក្មេងស្រីរងគ្រោះបានបញ្ជាក់ឲ្យដឹងថា មុនពេលកើតហេតុ ខ្លួន និង មិត្តភ័ក្ដិ២នាក់ទៀត បានទៅហូបការនៅភូមិស្លែង ហើយមានការផឹកស៊ីអស់ស្រាជាច្រើន ខ្លួន ក៏ស្រវឹងខ្លាំង លុះដល់ម៉ោងប្រហែល២០និង៣០នាទីយប់ដដែល ខ្លួនក៏ជិះម៉ូតូទៅផ្ទះវិញមិនកើត ត្រូវ ឈ្មោះ ផា និងឈ្មោះ ផល្លា ជាអ្នកធានាជូនមកផ្ទះ។ ឈ្មោះ ផា ជាអ្នកឌុប លុះដល់វាលស្រែខ្ញុំចង់ក្អួត ហើយឈ្មោះ ផា ក៏ឈប់ម៉ូតូ ពេលនោះ ឈ្មោះ ផល្លា ក៏ទាញដៃខ្ញុំចុះទៅវាលស្រែ ហើយធ្វើសកម្មភាពរំលោភតែម្ដង ក្រោយមកឈ្មោះផល្លា រំលោភបានសម្រេច។
ក្មេងស្រីរងគ្រោះដដែលបានឲ្យសមត្ថកិច្ចដឹងទៀតថា បន្ទាប់មកឈ្មោះ ផា ក៏មកសង្កត់រំលោភខ្ញុំម្តងទៀតបានសម្រេចដូចគ្នា។ មួយសន្ទុះ ក្រោយមក ទើបឃើញបងខ្ញុំមកដល់ ហើយធ្វើការឃាត់ខ្លួនពួកគេប្រគល់ឲ្យសមត្ថកិច្ចនគរបាលមូលដ្ឋានតែម្តង ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់តុលាការ ដើម្បីផ្ដន្ទាទោសតាមផ្លូវច្បាប់៕
Source: Kampuchea Thmey Daily
0 Comments