អាមេរិក​និង​ចិន​ជួបគ្នា​បន្ត​ការចរចា​រឿង​ពាណិជ្ជកម្ម​

អ្នកចរចា​ផ្នែក​ជំនួញ​កំពូល​របស់​អាមេរិក និង​ចិន​បាន​បន្ត​ការចរចា​គ្នា​កាលពី​ថ្ងៃ​ពុធ ខណៈ​ភាគី​ទាំងពីរ​ បាន​ឈានដល់​ការព្រមព្រៀង​គ្នា​ដើម្បី​ដោះស្រាយ​ជម្លោះ​ពាណិជ្ជកម្ម​ពាក់ព័ន្ធ​នឹង​រឿង​ពន្ធ​លើ​ទំនិញ​ដែល​អូស​បន្លាយពេល​រាប់​ខែ​មកហើយ​នោះ​។​

ឧបនាយករដ្ឋមន្ត្រី​ចិន លោក Liu He ដែលជា​ជំនួយការ​ជិតស្និទ្ធ​របស់​ប្រធានាធិបតី ស៊ី​ជីន​ពីង​បានទទួល​ស្វាគមន៍​លោក Robert Lighthizer តំណាង​ពាណិជ្ជកម្ម​អាមេរិក និង​លោក Steven Mnunchin រដ្ឋលេខាធិការ​រតនា​គារ​អាមេរិក​ដើម្បី​ធ្វើការ​ពិភាក្សា​ដោយ​រំពឹងថា​នឹង​ផ្ដោតលើ​បញ្ហា​ឧស្សាហកម្ម​របស់​ចិន​។​

ប្រទេស​នាំមុខគេ​ក្នុង​វិស័យសេដ្ឋកិច្ច​ពិភពលោក​ទាំ​ង​ពីរបាន​ផ្លាស់ប្ដូរ​ពន្ធ​លើ​ទំនិញ​គ្នា​ដែលមាន​តម្លៃ ៣៦០​ពាន់​លាន​ដុល្លារ ចាប់តាំងពី​លោក​ប្រធានាធិបតី​អាមេរិក Donald Trump ប្រកាសសង្គ្រាម​ពាណិជ្ជកម្ម​នៅ​ឆ្នាំមុន​មកម្ល៉េះ​។​

ភាគី​អាមេរិក​កំពុង​គាបសង្កត់​ភាគី​ចិន​ដើម្បីឱ្យ​ធ្វើការ​កែប្រែ​គោលនយោបាយ​ឧស្សាហកម្ម​របស់ខ្លួន តាមរយៈ​ការបើកទ្វារ​ទីផ្សារ​សម្រាប់​ក្រុមហ៊ុន​បរទេស បញ្ឈប់​ការឧបត្ថម្ភ​ធន​ដ៏​ច្រើន​សម្រាប់​ក្រុមហ៊ុន​ក្នុងស្រុក និង​ទប់ស្កាត់​ការ​លួច​បច្ចេកវិទ្យា​អាមេរិក​។​

កាលពី​សប្ដាហ៍​មុន ប្រធានាធិបតី​ចិន លោក​ស៊ី​ជីន​ពីង​បាន​និយាយថា ចិន​នឹង​លុបចោល​នូវ​ច្បាប់​ដែល​មិន​យុត្តិធម៌ ការឧបត្ថម្ភ​ទុន និង​ការអនុវត្ត​ទាំងឡាយណា​ដែល​រារាំង​ដល់​ការប្រកួតប្រជែង​ស្មោះត្រង់ និង​ធ្វើឱ្យ​ខូច​ទីផ្សារ​។ ជាងនេះទៅទៀត ចិន​ក៏បាន​អនុម័ត​ច្បាប់​ស្ដីពី​ការវិនិយោគ​បរទេស​ដែល​ធានា​ការពារ​កម្មសិទ្ធិបញ្ញារ​បស់​ក្រុមហ៊ុន​បរទេស​ផងដែរ​។​

លោក Mnuchin និង​លោក Lighthizer បាន​សម្ដែង​ក្ដី​សោមនស្ស​ទៅកាន់​លោក​ឧបនាយករដ្ឋមន្ត្រី Liu ពេល​បាន​ទៅដល់​ផ្ទះសំណាក់​រដ្ឋ Diaoyutai កាលពី​ថ្ងៃ​ពុធ​។ លោក​ឧបនាយករដ្ឋមន្ត្រី​ចិន​ក៏បាន​មានប្រសាសន៍​ទៅកាន់​ភាគី​អាមេរិក​ទាំងពីរ​រូប មុននឹង​ចូលទៅ​ដល់​កិច្ចចរចា​ថា "​អរុណសួស្ដី​! រីករាយ​ណាស់​ដែល​បាន​ជួប​ពួកលោក​!” AFP



Source: Kampuchea Thmey Daily