ភូមិ​នៅជាប់​ព្រំប្រទល់​អន្តរ​កូរ៉េ​នឹង​ចាប់​បើក​ឡើងវិញ​សម្រាប់​ទេសចរណ៍​ជា​សាធារណៈ

ទាហាន​កូរ៉េខាងត្បូង​បាន​ឈរ​ដោយ​គ្មាន​កម្រើក​កាលពី​ថ្ងៃ​ពុធ​នៅ​ខាងក្រៅ​ខ្ទម​ពណ៌​ខៀវ​នៃ​ភូមិ​ផ្អាក​សង្គ្រាម Panmunjom ជា​កន្លែង​តែមួយគត់​នៅតាម​បណ្ដោយ​ព្រំប្រទល់​ដែល​យោធា​រវាង​កូរ៉េ​ទាំងពីរ​ត្រូវ​ឈរ​យាមកាម​ទល់មុខ​គ្នា​តែ​អ្វីដែល​មិនមាន​ក្នុង​ដៃ​គួរឱ្យកត់សម្គាល់​នោះ​គឺ​អាវុធ​របស់​ពួកគេ​។​

ដោយមាន​ពាក់​វ៉ែនតា​ខ្មៅ​ដូច​អ្នកបើក​យន្តហោះ​ផង​នោះ​ឆ្មាំ​ទាំងអស់​នៅក្នុង​ភូមិ​ផ្អាក​សង្គ្រាម​ក្នុង​តំបន់​គ្មាន​យោធា (DMZ) ដែលជា​កន្លែង​បែងចែក​ឧបទ្វីប​កូរ៉េ​ទាំងពីរ​បាន​ឈរ​គម្លាត​ត្រឹមតែ​ប៉ុន្មាន​ម៉ែត្រ​ប៉ុណ្ណោះ​ពី​ទាហាន​កូរ៉េខាងជើង​។​

ការធ្វើដំណើរ​កម្សាន្ត​ជា​សាធារណៈ​ទៅកាន់​ភាគខាងត្បូង​ភូមិ​ជាប់​ព្រំប្រទល់​អន្តរ​កូរ៉េ​ត្រូវបាន​បន្ត​ឡើងវិញ​កាលពី​ព្រឹក​ថ្ងៃ​ពុធ​ដោយមាន​ការដក​កងក​ម្លាំ​ង​ប្រដាប់អាវុធ​និង​ប៉ុស្តិ៍​យាម​ចេញពី​តំបន់​សន្តិសុខ​រួម (JSA) បន្ទាប់ពី​បាន​ផ្អាក​កាលពី​ខែតុលា​កន្លងទៅ​ដើម្បី​សម្រួល​កិច្ចខិតខំ​ប្រឹងប្រែង​រួមគ្នា​របស់​ទីក្រុង​សេ​អ៊ូ​ល​និង​ព្យុងយ៉ាង​ក្នុងការ​ដកទ័ព​ពី​ព្រំដែន​។​

ភូមិ​ផ្អាក​សង្គ្រាម​គឺជា​គោលដៅ​ដ៏​ពេញនិយម​របស់​ភ្ញៀវទេសចរ​ព្រំប្រទល់​ទាំងសង្ខាង​។​ការបន្ត​ឱ្យមាន​ដំណើរ​កម្សាន្ត​ជា​សាធារណៈ​ឡើងវិញ​នេះ​គឺជា​ពេលវេលា​ដើម្បី​កត់ចំណាំ​អំពី​ខួប​លើក​ទី​១​នៃ​កិច្ចប្រជុំ​កំពូល​នៅ Panmunjom ដែលជា​កិច្ចចរចា​អន្តរ​កូរ៉េ​លើកដំបូង​រវាង​ប្រធានាធិបតី​កូរ៉េខាងត្បូង Moon Jae-in និង​សម​ភាគី​កូរ៉េខាងជើង Kim Jong Un កាលពី​ឆ្នាំទៅ​មិញ​។​

ក្រុង​សេ​អ៊ូ​ល​និង​ក្រុង​ព្យុងយ៉ាង​បាន​ព្រមព្រៀងគ្នា​បើក​ឱ្យ​បន្ត​មានកម្ម​វិធី​ទេសចរណ៍​ពេញលេញ​និង​អនុញ្ញាតឱ្យ​ភ្ញៀវទេសចរ​ដើរ​ពិនិត្យ​និង​ទស្សនា​ភាគ​ខាងជើង​និង​ខាងត្បូង​ភូមិ​នេះ​បាន​។

ប៉ុន្តែ​គម្រោងការ​នេះ​មិនបាន​លេច​រូបរាង​ឡើង​ដោយសារតែ​បញ្ជាការ​អង្គការសហប្រជាជាតិ​ដឹកនាំ​ដោយ​អាមេរិក​ដែល​បាន​ត្រួតត្រា​កិច្ចការ​នៅ​តំបន់​គ្មាន​យោធា​ចាប់តាំង​ពី​ចុង​ឆ្នាំ​១៩៥០-៥៣​មក​នោះ​មិនទាន់បាន​យល់ព្រម​ចំពោះ​គំនិត​នេះ​ទេ​។​យ៉ាងណាមិញ​ភាគី​សេ​អ៊ូ​ល​បាន​សម្រេចចិត្ត​បន្ត​ឱ្យមាន​ដំណើរ​កម្សាន្ត​ជា​សាធារណៈ​ទៅកាន់​ភាគខាងត្បូង​នៃ​តំបន់​នោះ​តែប៉ុណ្ណោះ៕AFP



Source: Kampuchea Thmey Daily