មនុស្ស​៧៨០,០០០​នាក់​ត្រូវ​ជម្លៀស​នៅ​ប្រទេស​ឥណ្ឌា​មុន​ព្យុះ​ស៊ីក្លូន​ដ៏​ធំ​មួយ​មកដល់

ក្រុមមន្ត្រី​បាន​និយាយ​នៅ​ថ្ងៃ​ព្រហស្បតិ៍​ថា មនុស្ស​ជិត​៨០០,០០០​នាក់​នៅក្នុង​តំបន់ឆ្នេរ​សមុទ្រ​ភាគ​ខាងកើត​របស់​ប្រទេស​ឥណ្ឌា​ត្រូវបាន​ជម្លៀសចេញ​មុន​ការមកដល់​នៃ​ព្យុះ​ស៊ីក្លូន​ដ៏​ធំ​មួយ​។​

សេវា​អាកាសធាតុ​របស់​ប្រទេស​ឥណ្ឌា​បាន​និយាយថា ព្យុះ​ស៊ីក្លូន​ដ៏​មាន​ឥទ្ធិពល​ខ្លាំងក្លា​ឈ្មោះ Fani ត្រូវបាន​គេ​រំពឹងថា​នឹង​បង្ក​ឲ្យ​មានការ​បាក់​ដី​នៅ​រសៀល​ថ្ងៃ​សុក្រ​ជិត​ទីក្រុង​ហិណ្ឌូ​ដ៏​ពិសិដ្ឋ​ឈ្មោះ Puri ។​

មន្ដ្រី​នាយកដ្ឋាន​សង្គ្រោះ​ជាតិ​បាន​ប្រាប់ AFP ថា មនុស្ស​ចំនួន​៧៨០,០០០​នាក់​បានធ្វើ​ដំណើរ​ទៅកាន់​កន្លែង​ដែលមាន​សុវត្ថិភាព​នៅពេល​យប់​ពី​ស្រុក​យ៉ាងហោចណាស់​១៣​ក្នុង​រដ្ឋ Odisha ដែលជា​កន្លែង​នឹង​ទទួលរង​គ្រោះ​ពី​ព្យុះ​ស៊ីក្លូន​ដ៏​ខ្លាំងក្លា​នេះ​។​

ជម្រក​ប្រមាណ​១,០០០​កន្លែង​នៅតាម​សាលារៀន​និង​អគារ​រដ្ឋាភិបាល​ត្រូវបាន​បង្កើតឡើង​ដើម្បី​ដាក់​មនុស្ស​ជាង​មួយ​លាន​នាក់​។​

នៅ​ថ្ងៃ​ព្រហស្បតិ៍ ព្យុះ​ដែល​គេ​រាយការណ៍​ថា​ជា​ព្យុះ​ធំ​បំផុត​ដែល​វាយប្រហារ​ប្រទេស​ឥណ្ឌា​ភាគ​ខាងកើត​ក្នុង​រយៈពេល​ជិត​ពីរ​ទសវត្សរ៍​ចុងក្រោយ​មួយ​នេះ​គឺមាន​ប្រភព​ចេញពី​ឈូង​សមុទ្រ Bengal ដែលមាន​ចម្ងាយ​ប្រហែល​៤៥០​គីឡូម៉ែត្រ​ពី​ឆ្នេរសមុទ្រ​ហើយនឹង​ឆ្ពោះ​ដំណើរ​ទៅ​ទិស​ខាងលិច​។​

ព្យុះ​ស៊ីក្លូន​នេះ​ត្រូវបាន​គេ​រំពឹងថា​នឹង​នាំមក​ជាមួយ​ខ្យល់​ដែលមាន​ល្បឿន​ពី​១៨០​ទៅ​១៩០​គីឡូម៉ែត្រ​ក្នុង​មួយ​ម៉ោង​ហើយ​វា​ស្មើ​ទៅនឹង​កម្លាំង​ខ្យល់ព្យុះ​ប្រភេទ​៣​ដល់​ប្រភេទ​៤​។​
​វា​នឹង​ក្លាយជា​ព្យុះ​ខ្លាំង​ទី​បួន​ដែល​វាយប្រហារ​ឆ្នេរសមុទ្រ​ភាគ​ខាងកើត​របស់​ប្រទេស​នេះ​ក្នុង​រយៈពេល​៣​ទសវត្សរ៍​ចុងក្រោយ​។​

ការិយាល័យ​អាកាសធាតុ​របស់​ប្រទេស​ឥណ្ឌា​បាន​ព្រមាន​ថា ខ្យល់​ដែលមាន​ល្បឿន​លឿន​អាច​គាស់​រំលីង​ដើមឈើ​ទាំង​ឫស ធ្វើ​ឲ្យ​ខូចខាត​ដំណាំ បំផ្លាញ​ផ្ទះសម្បែង ហេដ្ឋារចនាសម្ព័ន្ធ​អគ្គិសនី​និង​ចរាចរណ៍​នៅតាម​តំបន់​ដែល​ងាយ​រងគ្រោះ​ដោយ​ទឹកជំនន់​និង​តំបន់​ទំនាប​។​

គួរ​បញ្ជាក់ថា ខ្យល់ព្យុះ​តែងតែ​វាយប្រហារ​ភាគ​ខាងកើត​និង​ភាគ​អាគ្នេយ៍​ប្រទេស​ឥណ្ឌា​ចន្លោះ​ខែមេសា​ដល់​ខែធ្នូ​។ កាលពី​ឆ្នាំ​២០១៧ ព្យុះ​ស៊ីក្លូន Ockhi បាន​បណ្តាល​ឲ្យ​មនុស្ស​ចំនួន​២៥០​នាក់​ស្លាប់​និង​ជាង ៦០០​នាក់​បាត់​ខ្លួន​នៅក្នុង​រដ្ឋ Tamil Nadu និង Kerala៕ AFP

​ 

Source: Kampuchea Thmey Daily