តារាប្រុសកម្សត់ ស៊ីណាវ៉ាត់ត្រា បែកធ្លាយដំណឹងបោះទុនដុល្លារ ដណ្ដើមសង្សារគេ

ភ្នំពេញ ៖ តារាសម្ដែងប្រុសធ្លាប់មានប្រវត្តិជាក្មេងដើរលក់នំកងតាមផ្សារលោក ស៊ីណាវ៉ាត់ត្រា ដែលត្រូវបានទស្សនិកជនស្គាល់តាមរយៈការថតសម្តែង MV បទ”អូនដឹង”របស់កញ្ញា ធារ៉ានី នោះ ថ្មីៗនេះមានដំណឹងលេចឮថា តារាប្រុសរូបនេះ បានជះលុយដណ្ដើមសង្សារគេទាំងតារាចម្រៀងផលិតកម្ម U កំពុងស្រលាញ់កញ្ញា គីមឡាង ពេញបេះដូងផងនោះ។

ចំពោះការឡើងកូដក្លាយទៅជាអ្នកមានទ្រព្យធនរហូតជះលុយឆក់សង្សារគេពីសំណាក់លោក ណាវ៉ាត់ត្រា ពេលនេះបានកើតមានឡើង បន្ទាប់ពីមុននេះ លោកបានឱកាសរកស៊ីលក់ជំនួញដីឡូត៍ត្រូវប៉ាន់ទើបធ្វើឲ្យលោកអនាគត មិនអាចប្រជែងស្នេហ៍ជាមួយអ្នកសម្ដែងរូបនេះបានឡើយ។

បើតាមការបញ្ជាក់ឲ្យដឹងពីសាមីខ្លួនលោកណាវ៉ាត់ត្រាបានលើកឡើងដូច្នេះថា លោកមិនមានលទ្ធភាពឯណាយកលុយទៅបោះទុនដើម្បីដណ្ដើមសង្សារគេនោះឡើយ ពោលគឺសកម្មភាពនេះគ្រាន់តែជាការថតសម្តែងនៅក្នុង MVបទថ្មីតែប៉ុណ្ណោះ។ លោកណាវ៉ាត់ត្រា អះអាងថា ថ្មីៗនេះ លោកបានសម្ដែងបទ”ជនបទ”របស់តារាចម្រៀងនៅផលិតកម្មUហើយសាច់រឿងគឺលោកត្រូវបានអ្នកដឹកនាំសម្ដែងតម្រូវឲ្យសម្តែងធ្វើជាតួអ្នកមានទ្រព្យធន ហើយជះលុយដណ្ដើមសង្សាររបស់គេមែន។

តារាសម្តែងប្រុសរូបសង្ហាលោក ណាវ៉ាត់ត្រា បន្តទៀតថា សម្រាប់សកម្មភាពនៅក្រៅឆាកវិញ លោកមិនមែនជាមនុស្សចូលចិត្តដណ្ដើមសង្សារគេទេ ហើយរវាងលោក និងកញ្ញា គីមឡាង ពេលថតចប់គឺរាប់អានគ្នាជាធម្មតាមិនមានទំនាក់ទំនងគ្នាស៊ីជម្រៅក្រៅឆាកឡើយ។ ជាមួយគ្នានេះអ្នកតំណាងផលិតកម្ម U បានឲ្យដឹងដែរថា បទ ”ជនបទ” និពន្ធដោយលោក ខេម រ៉េតសីហៈដែលសាច់រឿងឆ្លុះបញ្ចាំងពីវណ្ណៈអ្នកមាននិងអ្នកក្រ ហើយផលិតកម្មនេះពេញចិត្តសមត្ថភាពរបស់តារាសម្ដែង ស៊ីណាវ៉ាត់ត្រា ហើយបច្ចុប្បន្នក៏គ្រោងធ្វើបទថ្មីៗទៀតដើម្បីឲ្យពួកគេច្រៀងនិងសម្ដែងរួមគ្នានាពេលខាងមុខនេះទៀត៕