លោក សួន បវរ ត្រូវបាន​ដកចេញ​ពី​អភិបាលខេត្ត​បន្ទាយមានជ័យ បន្ទាប់ពី​បែកធ្លាយ​រឿងស្រី​ញី​

​ភ្នំពេញ​៖ អភិបាលខេត្ត​បន្ទាយមានជ័យ លោក សួន បវរ ត្រូវបាន​ព្រះមហាក្សត្រ​នៃ​ព្រះរាជាណាចក្រ​កម្ពុជា ត្រាស់បង្គាប់​ផ្ទេរ​ភារកិច្ច ពី​អភិបាល​នៃ​គណៈ​អភិបាលខេត្ត​បន្ទាយមានជ័យ មក​បម្រើ​ការងារ​នៅ​ក្រសួងមហាផ្ទៃ​វិញ ដែល​ព្រះរាជក្រឹត្យ​នេះ ធ្វើឡើង​តាម​សំណើ ​របស់​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដោយ​ផ្អែក​តាម​សេចក្តីត្រូវការ​ចាំបាច់រ​បស់​រាជរដ្ឋាភិបាល នេះ​បើ​តា​ព្រះរាជក្រឹត្យ​ចុះ​ថ្ងៃទី​០៨ ខែឧសភា ឆ្នាំ​២០១៩​។​

ការសម្រេច​ផ្ទេរ​ភារកិច្ច​លោក សួន បវរ នេះ ត្រូវបាន​គេ​មើលឃើញថា បាន​ធ្វើឡើង​បន្ទាប់ពី​លេច​ធ្លាយ​រឿង​ស្ត្រី​ម្នាក់​បានចេញ​មុខ​អះអាងថា គាត់​ជា​ស្រី​ស្នេហ៍​របស់លោក សួន បវរ ហើយ​ត្រូវបាន​លោក សួន បវរ ដោះដៃ​បោះបង់ចោល​។​

យោងតាម​លិខិត​របស់​សម្ដេច​អគ្គមហាសេនាបតី​តេ​ជោ ហ៊ុន សែន ចុះ​ថ្ងៃទី​០៨ ខែឧសភា ឆ្នាំ ២០១៩ ដែល​ទូលថ្វាយ ព្រះករុណា​ព្រះបាទ​សម្ដេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​បាន​បញ្ជាក់ថា ការសម្រេច​ផ្ទេ​រ​តំណែង​លោក សួន បវរ នេះ ដោយ​ផ្អែក​តាម​សេចក្តីត្រូវការ ចាំបាច់​របស់​រាជរដ្ឋាភិបាល នៃ​ព្រះរាជាណាចក្រ​កម្ពុជា និង​ដោយបាន​ពិនិត្យ​លើ​លក្ខណៈសម្បត្តិ សមត្ថភាព និង​បទពិសោធន៍​ការងារ​របស់​មន្ត្រីរាជកា​រ ព្រមទាំង​ដើម្បី​លើកកម្ពស់​ប្រសិទ្ធភាព​ការដឹកនាំ និង​ការគ្រប់គ្រង​ការងាររដ្ឋបាល​ ឲ្យ​មានដំណើរ​ការល្អប្រសើរ​។​

តាម​សំណើ​ដែល​បានទូល​ថ្វាយ​ព្រះមហាក្សត្រ​នោះ​រួមមាន ទី​១, ផ្ទេរ​ភារកិច្ច​លោក សួន បវរ ឋានន្តរសក្តិ​ឧ​ត្ត​ម​មន្ត្រី​ថ្នាក់​លេខ​២ ពី​អភិបាល​នៃ​គណៈ​អភិបាលខេត្ត​បន្ទាយមានជ័យ មក​ឲ្យ​បម្រើ​ការងារ​នៅ​ទីស្ដីការ​ក្រសួងមហាផ្ទៃ ដើម្បី​ទទួល​ភារកិច្ច​ថ្មី​។ ទី​២, តែងតាំង​លោក អ៊ុំ រាត្រី ឋានន្តរសក្តិ​ឧ​ត្ត​ម​មន្ត្រី​ថ្នាក់​លេខ​៦ ជា​អភិបាល​នៃ​គណៈ​អភិបាលខេត្ត​បន្ទាយមានជ័យ ជំនួស​លោក សួន បវរ​។ ទី​៣, ផ្ទេរ​បញ្ចូល​លោក គឹ​ង វណ្ណៈ ពី​ឋានន្តរសក្តិ​ឧ​ត្ត​ម​សេនីយ៍​ឯក នៃ​ក្របខ័ណ្ឌ​មន្ត្រី​នគរបាលជាតិ​កម្ពុ​ជា មកជា​ឋានន្តរសក្តិ​ឧ​ត្ត​ម​មន្ត្រី​ថ្នាក់​លេខ​២ នៃ​ក្របខ័ណ្ឌ​មន្ត្រីរដ្ឋបាល​ជាន់ខ្ពស់​ក្រសួងមហាផ្ទៃ ដើម្បី​មាន​ឧបនិស្ស័យ​តែងតាំង​មុខតំណែង​ជា​អភិបាលរង​ខេត្តបន្ទាយមានជ័យ​។​

ទាក់ទង​ការផ្ទេរ​ភារកិច្ច​លោក សួន បវរ នេះ តាម​លិខិត​លោក ប្រាក់ សំអឿន អគ្គនាយកដ្ឋាន​រដ្ឋបាល​ក្រសួងមហាផ្ទៃ បាន​បញ្ជាក់ថា ពិធី​ប្រកាស​ផ្ទេរ​ភារកិច្ច នឹងត្រូវ​ធ្វើ​នៅ​ថ្ងៃទី​១០ ខែឧសភា ឆ្នាំ​២០១៩ វេលា​ម៉ោង​៨ និង​៣០​នាទី នៅ​សាលប្រជុំ​សាលាខេត្ត​បន្ទាយមានជ័យ ក្រោមអ​ធិបតី​ភាព​ដ៏​ខ្ពង់ខ្ពស់​សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ​។​
​
គួររំលឹកថា ថ្មីៗ​នេះ ស្ត្រី​ម្នាក់​បានចេញ​មុខ ស្នើសុំ​ឲ្យ​អោយ​សម្តេច​អគ្គមហាសេនាបតី​តេ​ជោ ហ៊ុន សែន ជួយ​រក​យុត្តិធម៌ ដោយ​សំអាងថា លោក សួន បវរ អភិបាលខេត្ត​បន្ទាយមានជ័យ បាន​យក​គាត់​ជា​គូ​​ស្នេហ៍​អស់​រយៈពេល​៥​ឆ្នាំ​ហើយ តែ​បាន​​លែង​ទទួលខុស​សត្រូវ និង​ចង់​ចាប់​ដាក់គុក​ទៀត​។​

ការចោទប្រកាន់​នេះ បាន​ធ្វើឡើង​តាមរយៈ Account facebook ឈ្មោះ So Phy ដោយបាន​សរសេរ​យ៉ាង​នេះ​ថា “​សម្តេច​ជួយ​រក​យុត្តិធម៌​ឲ្យ​ញុំ​ផង អភិបាលខេត្ត​បន្ទាយមានជ័យ សួន បវរ យក​ញុំ​ហើយ​បោះបង់​ញុំ​ចោល ខ្ញុំ​អត់​មានផ្ទះ​នៅទេ​”, សម្តេច​ជួយ​រក​យុត្តិធម៌​ឲ្យ​ញុំ​ផង ម្តាយ​ញុំ​ដេ​អង្រឹង​ឲ្យ​សម្តេច និង​កងទ័ព អភិបាលខេត្ត សួន បវរ យក​ញុំ​ចោល ហើយ​រក​ចាប់​ខ្ញុំ​ដាក់គុក​ទៀត​, សម្តេច​ជួយ​រក​យុត្តិធម៌​ឲ្យ​ញុំ​ផង អភិបាលខេត្ត​បន្ទាយមានជ័យ​យក​ញុំ​ប្រាំ​ឆ្នាំ​ហើយ តាំងពី​គាត់​នៅ​ក្រ ដល់​ថ្ងៃ​១៧ មេសា ឆ្នាំ​២០១៩ គាត់​ឈប់​យក​ញុំ​ហើយ ញុំ​អត់​មាន​អ្វី​ទាំងអស់ អភិបាលខេត្ត​សួន​បវរ​”​។​

ស្ត្រី​ដែលជា​ស្រី​កំណាន់ចិត្ត​របស់លោក សួន បវរ ត្រូវបាន​ដឹងថា មានឈ្មោះ ឡៅ សុ​ភី មាន​អាយុ​៤១​ឆ្នាំ រស់នៅ​ខេត្តកំពង់ចាម ហើយ​បាន​ស្គាល់គ្នា​ចាប់តាំងពី​ឆ្នាំ​២០១៣​មក​ម្ល៉េះ តែ​មិនសូវ​ជិតស្និទ្ធ​នោះទេ​។ រហូតដល់​ថ្ងៃទី​៨ ខែមីនា ឆ្នាំ​២០១៥ គាត់ និង​លោក សួន បវរ បានរស់នៅ​ជាមួយគ្នា​ដូចជា​ប្តី​ប្រពន្ធ ហើយ​កាលពី​ថ្ងៃទី​១៧ ខែមេសា ឆ្នាំ​២០១៩ បន្ទាប់ពី​ថ្ងៃបុណ្យ​ចូលឆ្នាំ​ប្រពៃណី​ខ្មែរ​រួច លោក សួន បវរ អភិបាលខេត្ត​បន្ទាយមានជ័យ​បាន​ផ្ញើ​សារ​មក​គាត់​ថា ឲ្យ​ឈប់​ទាក់ទង​គាត់​តទៅទៀត​។​

តាម​ស្ត្រី​រូបនោះ ដោយសារ​គាត់ និង​លោក​អភិបាលខេត្ត​ស្រលាញ់គ្នា​យូរ​ឆ្នាំ​ហើយ គាត់​ក៏បាន​បង្ហោះ​សា​រលើ​ហ្វេ​ស​ប៊ុ​ក​ផ្ទាល់ខ្លួន និង​បាន​បញ្ចេញមតិ (Comments) ក្នុង​ផេ​ក​ហ្វេ​ស​ប៊ុ​ក សម្តេច​តេ​ជោ ហ៊ុន សែន ដើម្បីអោយ​បងប្អូន និង​សម្តេច​ជួយ​ស្វែងរក​យុត្តិធម៌​ជូន​គាត់​។​

ក្រោយពី​បែកធ្លាយ​រឿងនេះ ស្ត្រី​ឈ្មោះ ឡៅ សុ​ភី ដែល​អះអាងថា ជា​ស្រី​កំណាន់​របស់លោក សួន បវរ បាន​លេខ​ថ្នាំ​សម្លាប់ខ្លួន​​ ហើយ​ត្រូវបាន​យកមក​សង្គ្រោះបន្ទាន់ នៅ​មន្ទីរពេទ្យ​កាល់ម៉ែត​។ បន្ទាប់ពី​ស្ត្រី​ឈ្មោះ ឡៅ សុ​ភី បាន​ទៅ​តវ៉ា​នៅមុខ​សាលាខេត្ត លោក សួន បវរ ក៏បាន​រក​មេធាវី​មក​ចរចា ដោយ​ផ្តល់​លុយ​ចំនួន​២​ម៉ឺន​ដុល្លារ ប៉ុន្តែ​ត្រូវបាន​ស្ត្រី​ឈ្មោះ ឡៅ សុ​ភី អះអាងថា លោក សួន បវរ បាន​លួង​គាត់ ហើយ​បោកប្រាស់ ដោយបាន​សន្យាថា នឹង​ទិញ​ផ្ទះមួយ​ល្វែង និង​ផ្តល់​មុខ​របប តែ​ទីបំផុត​ឲ្យ​តែ​លុយ​២​ម៉ឺន​ដុល្លារ​។​

ស្ត្រី​ឈ្មោះ ឡៅ សុ​ភី បាន​ថ្លែងប្រាប់​កម្ពុជា​ថ្មី យ៉ាង​ដូច្នេះ​ថា “​លោក សួន បរ​វ គាត់​លួង​ញុំ បោកប្រាស់​ចិត្ត​ញុំ អោយទៅ​ជួប​គាត់ ហើយ​មុន​នឹង​ទៅ​ជួប​គាត់ គាត់​បាន​តេ​តាម​ទូរស័ព្ទ​ជាច្រើន​ដង ដោយ​គាត់​បាន​សន្យាថា នឹង​ទិញ​ផ្ទះមួយ​ល្វែង ទីបំផុត គាត់​ប្រើល្បិច​បោកប្រាស់​ចិត្ត​ញុំ​។ លោក សួន បវរ គាត់​បាន​លួង​ញុំ​បោកប្រាស់​ចិត្ត​ញុំ អោយ​ញុំ​ទៅ​ជួប​គាត់ ហើយ​ញុំ​ផ្តិតមេដៃ ហើយ​មុន​ថ្ងៃ​ទៅ​ជួប​គាត់​នៅ​យប់​ថ្ងៃទី​២៩ គាត់​បាន​តេ​មក​ញុំ​ច្រើនដង ដល់​ថ្ងៃទី​៣០​អ្នកបើក​ឡាន​អោយ​គាត់ បាន​តេ​មក​ញុំ​ច្រើនដង​ទៀត អោយ​ញុំ​ទៅ​ជួប​មេ​របស់គេ គឺ​លោក​សួន បវរ ទីបំផុត គេ​អោយ​ញុំ​ផ្តិតមេដៃ តែ​មិន​និង​ផ្តិតមេដៃ គាត់​បាន​សន្យាថា គាត់​និង​ទិញ​ផ្ទះមួយ​ល្វេ​ង​អោយ​ញុំ ហើយ​និង​មុខ​របប​រកស៊ី ទីបំផុត គាត់​អោយ​លុយ​ត្រឹម​២០០០០$ ប៉ុណ្ណោះ ញុំ​ចាញ់ល្បិច​របស់លោក សួន បវរ​”៕
​
​

Source: Kampuchea Thmey Daily