រតនគិរី ៖ មន្ត្រីត្រួតពិនិត្យការងារមាត្រាសាស្ត្រ នៃការិយាល័យស្តង់ដារ និងមាត្រាសាស្ត្រ នៃមន្ទីរឧស្សាហកម្ម និងសិប្បកម្មខេត្តរតនគិរី នៅថ្ងៃទី៨ ខែឧសភា ឆ្នាំ២០១៩ បានសហការជាមួយមន្ត្រីសាលាក្រុង ចុះត្រួតពិនិត្យផ្ទៀងផ្ទាត់ កុងទ័រចែកចាយប្រេងឥន្ធនៈនៅតាមស្ថានីយចំនួន៣ នៅក្នុងក្រុងបានលុង គឺ ស្ថានីយ ឡុច ចំរើន ស្ថានីយប្រេងយើង និង ស្ថានីយ ប្រេងយើង៩។
លោក ញឹម វណ្ណារុន ប្រធានការិយាល័យ ស្តង់ដារ និងមាត្រាសាស្ត្រ នៃមន្ទីរឧស្សាហកម្ម និងសិប្បកម្មខេត្តរតនគិរី បានឲ្យដឹងថា ដើម្បីធានាផលប្រយោជន៍ដល់អ្នកប្រើប្រាស់ (អ្នកទិញប្រេង) និង អ្នកផ្គត់ផ្គង់ (អ្នកលក់ប្រេង) មន្ទីរឧស្សាហកម្មនិងសិប្បកម្មខេត្ត នឹងចុះត្រួតពិនិត្យផ្ទៀងផ្ទាត់នៅតាមស្ថានីយទាំងអស់ដើម្បីឲ្យប្រាកដថា គ្រប់ស្ថានីយប្រេងឥន្ធនៈបានប្រើប្រាស់កុងទ័រចែកចាយប្រេងឥន្ធនៈមានកម្រិតលំអៀងត្រឹមត្រូវ ដែលមានន័យថា ម្ចាស់ ឬតំណាងម្ចាស់ស្ថានីយ លក់ប្រេងគ្រប់ចំនួនលីត្រជូនអតិថិជនរបស់ខ្លួនស្របតាមច្បាប់មាត្រាសាស្ត្រកម្ពុជា។ ហើយលទ្ធផល នៃការត្រួតពិនិត្យនេះ រកឃើញថា ស្ថានីយទាំង៣ខាងលើ មានភាពត្រឹមត្រូវ គឺ លក់គ្រប់លីត្រ លើកលែងដៃបាញ់ប្រេងចំនួន២ ក្នុងចំណោមដៃបាញ់ប្រេងទាំង១០ របស់ស្ថានីយប្រេង ឡុច ចំរើន ត្រូវធ្វើការកែតម្រូវជួសជុលឡើងវិញ។
លោក ញឹម វណ្ណារុន បានបន្តទៀតថា ក្រុមការងារមន្ត្រីមាត្រាសាស្ត្របានធ្វើការណែនាំដល់ម្ចាស់ដេប៉ូ និងស្ថានីយប្រេងឥន្ធនៈ ធ្វើយ៉ាងណាឲ្យមាននិរន្តរភាព នៃការលក់គ្រប់លីត្រ និងគោរពច្បាប់។ ចំពោះដេប៉ូ និងស្ថានីយមួយចំនួនដែលខុសប្រក្រតីនោះ ខាងមន្ត្រីក្រុមការងារត្រួតពិនិត្យបានឲ្យពួកគាត់ធ្វើកិច្ចសន្យាជាលើកទី១ ដើម្បីឲ្យពួកគាត់ធ្វើការជួសជុលកែតម្រូវ ហើយដេប៉ូណាមានភាពត្រឹមត្រូវក្រុមការងារបានបិទសញ្ញាសម្គាល់ត្រួតពិនិត្យបញ្ជាក់ពីភាពត្រឹមត្រូវជូនផងដែរ។
តែបើសិនជាមានការលក់មិនគ្រប់លីត្រ លើកទី២ និងករណីរកឃើញភាពមិនប្រក្រតីនោះទៀត ពួកគាត់អាចប្រឈមមុខនឹងការផាកពិន័យ ឬបញ្ជូនសំណុំរឿងទៅព្រះរាជអាជ្ញា ដើម្បីចាត់ការតាមនីតិវិធីច្បាប់។
លោក ញឹម វណ្ណារុន បានពន្យល់ថា ការលក់មិនគ្រប់លីត្រពីតាមបណ្តាស្ថានីយ ឬដេប៉ូ មានហេតុផល៣ ទី១-អាចថៅកែប្រេង លួចលីត្រពីកុងទ័រតែម្តង។ ទី២-អាចបុគ្គលិកលក់ប្រចាំការបំភ័ន្តភ្នែកលើកុងទ័រតែម្តង។ ៣.ប្រហែលអាចមកពីការផ្គត់ផ្គង់មិនគ្រប់លីត្ររបស់ក្រុមហ៊ុនប្រេងជូនទៅម្ចាស់ស្ថានីយ៕
Source: Kampuchea Thmey Daily
0 Comments