ភ្នំពេញ ៖ ចៅក្រមសាលាដំបូងរាជធានីភ្នំពេញ លោករស់ ពិសិដ្ឋ នារសៀលថ្ងៃទី០២ ខែឧសភា ឆ្នាំ២០១៩នេះ បានប្រកាសសាលក្រមសម្រេចផ្ដន្ទាទោសទណ្ឌិតសម រង្ស៊ី ដាក់ពន្ធនាគារ៨ឆ្នាំ និងពិន័យប្រាក់២០លានរៀល ក្រោមការចោទប្រកាន់ពីបទ ញុះញង់កងទ័ពមិនអោយស្ដាប់បង្គាប់ និងបទធ្វើអោយខូចទឹកចិត្តកងទ័ព។
កាលពីរសៀលថ្ងៃទី២២ ខែមេសា ឆ្នាំ២០១៩នេះ លោករស់ ពិសិដ្ឋ ចៅក្រមសាលាដំបូងរាជធានីភ្នំពេញ បានលើកយកសំណុំរឿងញុះញង់កងទ័ពមិនអោយស្ដាប់បង្គាប់របស់ទណ្ឌិត សម រង្ស៊ី មកបើកសវនាការជាសាធារណៈ នៅចំពោះមុខមេធាវីការពារក្ដីអោយជនជាប់ចោទ គឺមេធាវី សំ សុគង់។
សវនាការនេះ បានធ្វើឡើងនៅចំពោះមុខមេធាវីគូភាគី និងកំបាំងមុខជនត្រូវចោទ សម រង្ស៊ី។តុលាការ បានផ្ដើមចោទប្រកាន់លោកសម រង្ស៊ីពីបទ ញុះញង់កងទ័ពកុំអោយស្ដាប់បង្គាប់រាជរដ្ឋាភិបាល បទធ្វើអោយខូចទឹកចិត្តកងទ័ព និងបទប្រមាថថ្នាក់ដឹកនាំកងយោធពលខេមរភូមិន្ទ កាលពីថ្ងៃទី ០៥ធ្នូ ឆ្នាំ២០១៧។
កាលពីព្រឹកថ្ងៃទី០៧ ខែធ្នូ ឆ្នាំ២០១៧ លោកមេធាវី វង្ស ភក្ដី មេធាវីតំណាងដោយអាណត្តិរបស់ក្រសួងការពារជាតិ បានដាក់ពាក្យប្តឹងទណ្ឌិត សម រង្ស៊ី មកសាលាដំបូងរាជធានីភ្នំពេញ ពាក់ព័ន្ធនឹងករណីញុះញង់កុំឲ្យយោធិនស្តាប់បង្គាប់រាជរដ្ឋាភិបាល ស្របច្បាប់ បទធ្វើឲ្យខូចទឹកចិត្តកងទ័ព និងបទប្រមាថថ្នាក់ដឹកនាំកងយោធពលខេមរភូមិន្ទ។
ពាក្យបណ្តឹងរបស់មេធាវីតំណាងក្រសួងការពារជាតិបានបញ្ជាក់ថា ការអំពាវនាវរបស់លោក សម រង្ស៉ី នៅលើបណ្ដាញសង្គម ធ្វើឲ្យប៉ះពាល់ដល់សន្តិសុខជាតិ ដែលជាបទល្មើសចែងនៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជាកំពុងអនុវត្ត។
នៅលើបណ្ដាញសង្គមកាលពីថ្ងៃទី០៥ ខែធ្នូ ឆ្នាំ២០១៧ លោក សម រង្ស៉ី អតីតប្រធានគណបក្សសង្គ្រោះជាតិ បានអំពាវនាវឲ្យកងទ័ពបង្វែរកាណុងកាំភ្លើងមកលើរាជរដ្ឋាភិបាល ហើយបង្គាប់ឲ្យកងទ័ពឈប់គាំទ្រសម្តេចតេជោ ហ៊ុន សែន តទៅទៀត។
ក្រោយពីដាក់ពាក្យបណ្ដឹងរួច លោកសៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចចោទប្រកាន់លោកសម រង្ស៊ី ជាផ្លូវការហើយបញ្ជូនអោយចៅក្រមសម្រេចតាមនីតិវិធី ក្រោមរូបភាពជនជាប់ចោទនៅក្រៅឃុំ៕
Source: Kampuchea Thmey Daily
0 Comments