សៀមរាប ៖ សមត្ថកិច្ចមូលដ្ឋាន បានឲ្យដឹងថា នៅវេលាម៉ោងប្រមាណ១០និង២០នាទីព្រឹក ថ្ងៃទី០៥ ឧសភាឆ្នាំ ២០១៩ មានករណីភ្លើងឆេះផ្ទះ ០១ខ្នង ទំហំ ៦ម ×៩មដំបូលប្រក់ស័ង្កសី ជញ្ជាំងក្តារ ដែលមានម្ចាស់ផ្ទះ ឈ្មោះ អ៊ាម ស៊ីណន ភេទ ប្រុស អាយុ៤៨ឆ្នាំ មុខរបរគ្រូបង្រៀន រស់នៅភូមិដូនស្វា ឃុំចារឈូក ស្រុកអង្គរជុំ ខេត្តសៀមរាប។
សមត្ថកិច្ចបន្តថា បន្ទាប់ពីបានទទួលព័ត៌មាន អំពីករណីអគ្គិភ័យ នេះ លោកវរសេនីយ៍ ឯក ម៉ាន់ សុខាត់ អធិការនគរបាលស្រុកអង្គរជុំ បានដឹកនាំកម្លាំងចុះដល់កន្លែងកើតហេតុ និងបានបាញ់ទឹកពន្លត់ប្រើប្រាស់អស់ទឹក១ឡាន និងបានគ្រប់គ្រងស្ថានការណ៍ពន្លត់បានទាំងស្រុងនៅវេលាម៉ោងប្រមាណ ១០និង៥០នាទី ព្រឹកថ្ងៃដដែល។
តាមសមត្ថកិច្ចឲ្យដឹងថា ការ ខូចខាត ក្នុងនោះឆេះផ្ទះអស់០១ខ្នងទាំងស្រុង រួមមាន គ្រែដេក២ ពូកភួយ ខ្នើយ ឆ្នាំងចាននិងសម្ភារៈប្រើប្រាស់មួយចំនួនទៀត តែពុំបានបណ្តាលប៉ះពាល់អាយុជីវិតមនុស្សឡើយ។ សមត្ថកិច្ចបញ្ជក់ថា មូលហេតុបង្កឲ្យមានអគ្គិភ័យនេះ គឺម្ចាស់ផ្ទះមិននៅ ដោយសាក្សីអ្នកជិតខាងបានប្រាប់ថា មុនពេលឆេះ បានឮសំឡេងផ្ទុះ ចេញពីក្នុងផ្ទះ (សង្ស័យទុស្សេខ្សែភ្លើង) ។
សូមរំលឹកផងដែរថា មួយរយៈចុងក្រោយឆ្នាំ២០១៩ នារដូវក្តៅនេះ មានអគ្គិភ័យកើតឡើងច្រើនករណីទូទាំងប្រទេស អាស្រ័យដូចនេះសូមបងប្អូនចូលរួមទប់ស្កាត់ និងបង្ការទាំងអស់គ្នា ផង៕
Source: Kampuchea Thmey Daily
0 Comments