កំពង់ចាម ៖ សមត្ថកិច្ច នគរបាលស្រុកព្រៃឈរ បានចាប់ខ្លួនជនសង្ស័យម្នាក់ ដែលបានយកកាំបិតដេញកាប់ជនរងគ្រោះតែសំណាងល្អ ជនរងគ្រោះបានរត់គេចខ្លួនទាន់។
ប៉ូលិសបានអោយដឹងថា នៅថ្ងៃទី៥ ខែឧសភា ឆ្នាំ២០១៩ វេលាម៉ោង១៧និង៣០នាទី មានជនរងគ្រោះឈ្មោះយឹម អ៊ួនភេទ ប្រុស អាយុ៥៨ឆ្នាំ ជនជាតិខ្មែរ សញ្ជាតិខ្មែរ នៅភូមិតារាម ឃុំជ្រៃវៀន ស្រុកព្រៃឈរ ខេត្តកំពង់ចាម មុខរបរ កសិករ បានប្តឹងថា នៅថ្ងៃទី៥ ខែឧសភា ឆ្នាំ ២០១៩វេលាម៉ោង១៦និង៣០នាទី គាត់កំពុងអង្គុយត្រង់ ចំណុចស្រះទឹកចិញ្ចឹមត្រី របស់គាត់នៅខាងត្បូងភូមិតារាម ឃុំជ្រៃវៀន ស្រុកព្រៃឈរ ខេត្តកំពង់ចាម ស្រាប់តែឈ្មោះអ៊ីម ភារុំ ភេទប្រុសអាយុ៣៨ ឆ្នាំជនជាតិខ្មែរសញ្ជាតិខ្មែរមានទីលំនៅភូមិឃុំស្រុកជាមួយគ្នាកាន់ដាវចំនួនមួយនៅនឹងដៃ ដើរសំដៅមករកគាត់ ឃើញដូច្នេះ គាត់ក៏ស្ទុះរត់ ឈ្មោះអ៊ីម ភារុំ ក៏ដេញតាមកាប់ពីក្រោយ ភ្លាមនោះគាត់ក៏លោតចូលក្នុងរណ្ដៅដីមួយ គេចផុត និងរត់បន្តទៅសំដៅទៅផ្ទះរបស់គាត់ ដើម្បីអោយគេជួយ តែឈ្មោះ អ៊ីម ភារុំ នៅតែបន្តនិងដេញតាមរហូត ដល់ផ្ទះរបស់គាត់។
ជនរងគ្រោះបានបន្តថា ភ្លាមនោះគាត់បានទាញរបងលួសសំណាញ់បិទ ហើយឈ្មោះភារុំ បានទាញដាវ កាប់របងរបស់គាត់ នៅក្នុងពេលនោះមានបងប្អូនរបស់វាបានដេញចាប់វាចេញកុំអីគាត់ត្រូវស្លាប់បាត់បង់ជីវិត។
ជនរងគ្រោះបានបញ្ជាក់ថា ជនសង្ស័យ មានគំនុំខឹងនឹងខ្លួនជាជនរងគ្រោះ ដែលធ្លាប់ដេញគប់គោរបស់ប្អូនជនសង្ស័យ ដែលបានទៅផឹកទឹកនិងស៊ីស្មៅក្នុងស្រែរបស់ជនរងគ្រោះកន្លងមក។
ប៉ូលិសបន្តថា ក្រោយពីទទួលបណ្ដឹងរួចមក ជំនាញបានធ្វើការស្រាវជ្រាវដល់កន្លែងកើតហេតុ និងនាំជនសង្ស័យមកអធិការដ្ឋាននគរបាលស្រុកដើម្បីសាកសួរកសាសំណុំរឿងតាមនីតិវិធី៕
Source: Kampuchea Thmey Daily
0 Comments