កណ្ដាល ៖ បច្ចុប្បន្ននេះ នៅតាមស្រុកស្រែចម្ការ មិនថាផ្សារ ឬទីក្រុងនោះទេ មានបងប្អូនស្រីៗមួយចំនួន ជាពិសេសចាប់ពីវ័យពាក់កណ្ដាលមនុស្ស រហូតដល់ចាស់សក់ស្កូវ បាននិងកំពុងវក់វង្វេងនឹងល្បែងបៀស៊ីគូថៃ លេងទាំងថ្ងៃ ទាំងយប់យ៉ាងងប់ងុល បាយមិននឹក ទឹកមិនស្រេក ដេកមិនលក់ បិទភ្នែកស្រមៃឃើញតែសន្លឹកបៀនៅក្នុងភ្នែក បន់ឲ្យតែមានគ្នាគ្រប់ជើងនឹងបានចាប់ផ្ដើមប្រកួត សូម្បីចាស់ៗសក់ស្កូវ ក៏មិនសូវទៅវត្តវ៉ាដែរ លោកតាចង់ដាច់ចង្ហាន់ហើយ រីឯបងប្អូនស្រីៗអ្នកមានប្ដី និងកូនវិញ ក៏ភ្លេចបាយទឹកប្ដីអស់ហើយ មកពីធ្វើការវិញស៊ីមីស្ទើររាល់ថ្ងៃ។
ដោយមើលឃើញថានេះជាទង្វើខុសច្បាប់ និងកាន់តែរីករាលដាលស្ទើរពេញភូមិស្រុកទៅហើយនោះ ទើប យូរៗម្ដង គេឃើញសមត្ថកិច្ចអាជ្ញាធរមូលដ្ឋានឆ្មក់ចុះបង្ក្រាបម្ដងម្កាល ដើម្បីជាការព្រមានដល់អ្នកផ្សេងទៀត។ តែការចាប់មកនេះ គ្រាន់តែជាការព្រមានប៉ុណ្ណោះ ដោយបានធ្វើ កិច្ចសន្យាឲ្យឈប់លេងជាបន្ដទៀត និងត្រូវចេះទុកដាក់លុយកាក់ដែលប្ដីរកបានកុំយកទៅលេងល្បែងស៊ីសងបែបនេះ វានាំឲ្យមានជម្លោះក្នុងគ្រួសារ ឈានដល់ការបែកបាក់គ្នាជាដើម ជាពិសេសបំផ្លាញលុយកាក់ដែលប្ដីខំរកទាំងឈឺជា មិនហ៊ានឈប់សម្រាក១ថ្ងៃឡើយ ក៏ព្រោះតែខំរកលុយ ដើម្បីទុកផ្គត់ផ្គង់ជីវភាពគ្រួសារ តែពេលខ្លះត្រូវបំផ្លាញដោយនាងៗជាប្រពន្ធទៅវិញ។
ជាក់ស្ដែងកាលពីវេលាម៉ោង៣និង៤០នាទីរសៀល ថ្ងៃអាទិត្យ ទី៥ ខែឧសភា ឆ្នាំ២០១៩នេះសមត្ថកិច្ចនគរបាលស្រុកអង្គស្នួល ដឹកនាំដោយ លោក មាន សំណាង អធិការ នៃអធិការដ្ឋាននគរបាលស្រុក បានដឹកនាំកម្លាំងក្រោមឱវាទឆ្មក់ចូលចាប់ខ្លួននារីភេទទាំងចាស់ទាំងក្មេងប្រគំក្បាលគ្នាលេងបៀស៊ីគូថៃ នៅចំណុចក្នុងផ្ទះ ឈ្មោះ មឿន គួន ភេទស្រី អាយុ៦៣ឆ្នាំ រស់នៅភូមិចំបក់ទន្សាយ ឃុំព្រៃពួច ស្រុកអង្គស្នួល ដោយចាប់ឃាត់ខ្លួន បាន៧នាក់ ដឹកតាមឡានយកមកព្រមាននិងអប់រំនៅអធិការដ្ឋាននគរបាលស្រុក និងពិន័យឲ្យចាស់ដៃ ដើម្បីឲ្យរាងចាល កុំឲ្យថ្ងៃក្រោយចេះតែនាំគ្នាហ៊ានលេងបែបនេះទៀត។
ជនទាំង៧នាក់ដែលត្រូវ ឃាត់ខ្លួន ទី១.ឈ្មោះ មឿន គួន ភេទស្រី អាយុ៦៣ឆ្នាំ មុខរបររើសអេតចាយ នៅភូមិចំបក់ទន្សាយ ឃុំព្រៃពួច ស្រុកអង្គស្នួ ខេត្តកណ្តាល(ជាម្ចាស់ផ្ទះ)។ ទី២.ឈ្មោះ ស ស្រីមុំ ភេទស្រី អាយុ៣៣ឆ្នាំ មុខរបរលក់ដូរ នៅភូមិចំការស្លែង ឃុំព្រៃពួច ស្រុកអង្គស្នួលខេត្តកណ្តាល។ ទី៣.ឈ្មោះ ទៀង រ៉ា ភេទស្រី អាយុ៦៤ឆ្នាំ មុខរបរកសិករ នៅភូមិចំបក់ទន្សាយ ឃុំព្រៃពួច ស្រុកអង្គស្នួល ខេត្តកណ្តាល ជាអ្នកឈរមើលផង លេងផង។ ទី៤.ឈ្មោះទឹម ផល្លី ភេទស្រី អាយុ៤២ឆ្នាំ ជនជាតិខ្មែរ មុខរបរកម្មការិនីរោងចក្រ នៅភូមិចំបក់ទន្សាយ ឃុំព្រៃពួច ស្រុកអង្គស្នួលខេត្តកណ្តាលជាអ្នកលេង។ទី៥.ឈ្មោះ ឌឹម ខេមម៉ា ភេទស្រី អាយុ៣៥ឆ្នាំ ជនជាតខ្មែរ មុខរបរកម្មការិនីរោងចក្រ នៅភូមិចំបក់ទន្សាយ ឃុំព្រៃពួច ស្រុកអង្គស្នួល ខេត្តកណ្តាលជាអ្នកលេង។ ទី៦.ឈ្មោះ មឿង ធីតា ភេទស្រី អាយុ២៥ឆ្នាំ មុខរបរកម្មកររោងចក្រ នៅភូមិចំបក់ទន្សាយ ឃុំព្រៃពួចស្រុកអង្គស្នួល ខេត្តកណ្តាល។ ទី៧.ឈ្មោះ ភុន ថាវី ភេទស្រី អាយុ៣៤ឆ្នាំ មុខរបរកម្មការិនីរោងចក្រមានទីលំនៅភូមិចំបក់ទន្សាយឃុំ ព្រៃពួច ស្រុកអង្គស្នួល ខេត្តកណ្តាល។
ក្នុងនោះវត្ថុតាងចាប់យករួមមាន ៖ បៀចំនួន១០សន្លឹក ព្រោះពេលឃើញសមត្ថកិច្ច គេបោះចោលអស់ និង កម្រាលភួយចំនួន១ និងកន្ទេលក្រហមចំនួន១។
សមត្ថកិច្ចនិយាយថា ដោយទទួលបានព័ត៌មានពីពលរដ្ឋល្អ ថានៅចំណុចខាងលើនោះ មានស្រីៗទាំងចាស់ទាំងក្មេងនាំគ្នាលេងល្បែងស៊ីសងប្រភេទបៀស៊ីគូថៃ ខុសច្បាប់ ហើយនគរបាល បានចុះទៅដល់កន្លែងកើតហេតុឃើញជនសង្ស័យកំពុងតែលេងបៀស៊ីគូរថៃ ដូចគេរាយការណ៍មែន ពេលឃើញសមត្ថកិច្ចទៅដល់ អ្នកខ្លះក្រវាត់បៀចោលអស់ នៅសល់តែចំនួន១០សន្លឹក ជាភស្តុតាង នគរបាលត្រូវប្រមូលមកទាំងអស់។
នៅពេលនាំខ្លួនមកដល់អធិការដ្ឋាននគរបាលស្រុក ខណៈសួរចម្លើយ ឈ្មោះ មឿន គួន បានសារភាពថា ខ្លួនពិតជាឲ្យគេលេងបៀស៊ីគូថៃនៅក្នុងផ្ទះរបស់ខ្លួនមែន។ ចំពោះករណីនេះ កម្លាំងជំនាញសុំអប់រំ២៤ម៉ោង នៅត្រឹមអធិការដ្ឋាននគរបាលស្រុកតែប៉ុណ្ណោះ មិនបានកសាងសំណុំរឿងបញ្ជូនទៅណាទៀតទេ។
បើតាមប្រជាពលរដ្ឋក្នុងមូលដ្ឋានបាននិយាយថា ករណីស្រីៗលេងបៀស៊ីគូថៃនេះមានច្រើនណាស់ បើសិនជាសមត្ថកិច្ចមានពេលក្នុងការចុះបង្ក្រាបវិញនោះ ត្រូវធ្វើរាល់ថ្ងៃក៏មិនអស់ដែរ តែទោះជាយ៉ាងណា ពលរដ្ឋសូមឲ្យសមត្ថកិច្ចចាត់ការរបៀបនេះឲ្យបានជាប្រចាំ មិនថាកន្លែងណា ឬកន្លែងណានោះទេ ហើយដាក់ពិន័យឲ្យបានតឹងរ៉ឹងបំផុត ទើបពួកគេអាចរាងចាល ពីព្រោះម្នាក់ៗ ព្រាយបៀកាន់ក្បាលទៅហើយ៕
Source: Kampuchea Thmey Daily
0 Comments