រតនគិរី ៖ បុរសម្នាក់ ត្រូវបានរន្ទះបាញ់បណ្តាលឲ្យស្លាប់ភ្លាមៗមួយរំពេច ខណៈពេលមេឃធ្លាក់ភ្លៀងដំបូងផងនោះ
ហេតុការណ៍នេះ បានកើតឡើងកាលពីវេលាម៉ោង៦និង២០នាទីល្ងាច ថ្ងៃសៅរ៍ ១កើត ខែពិសាខ ឆ្នាំកុរ សំរឹទ្ធិស័ក ព.ស២៥៦២ ត្រូវនឹងថ្ងៃទី៤ ខែឧសភា ឆ្នាំ២០១៩ ស្ថិតនៅក្នុងភូមិកាតែ ឃុំម៉ាលិក ស្រុកអណ្តូងមាស។
មន្ត្រីនគរបាលស្រុកអណ្តូងមាសបានឲ្យដឹងថា ជនរងគ្រោះឈ្មោះ ទីង ដេះ ភេទប្រុស អាយុ៣០ឆ្នាំ ជនជាតិទំពួន មុខរបរកសិករ (នៅលីវ) រស់នៅភូមិ/ឃុំកន្លែងកើតហេតុ។
មន្ត្រីនគរបាលបានបន្តថា មុនពេលកើតហេតុ ជនរងគ្រោះ បាននៅក្រោមផ្ទះ ពេលមេឃកំពុងធ្លាក់ភ្លៀង ដោយអង្គុយនៅលើម៉ូតូខាងក្រោមផ្ទះ ហើយយកដៃកាន់សសរផ្ទះដែលមានខ្សែភ្លើងតចូលមកពីក្រៅ ស្រាប់តែរន្ទះបានបាញ់ជនរងគ្រោះ បណ្តាលឲ្យស្លាប់ភ្លាមៗតែម្តង។
ក្រោយកើតហេតុសមត្ថកិច្ចមូលដ្ឋានចុះមកធ្វើកោសល្យវិច័យឃើញថា ជនរងគ្រោះមានឈាមចេញតាមច្រមុះនិងតាមត្រចៀក មានស្នាមជាំខ្នងខាងឆ្វេង ពិតជាករណីរន្ទះបាញ់ពិតប្រាកដមែន។
ជនរងគ្រោះមានឪពុកឈ្មោះ រចំ កេវ អាយុ៥៤ឆ្នាំ ជនជាតិទំពួន និងម្ដាយឈ្មោះ ទីង ម្លែង អាយុ៥៣ឆ្នាំ ជនជាតិទំពួន។
បន្ទាប់ពីបានធ្វើកោសល្យវិច័យរួចមក សមត្ថកិច្ចបានធ្វើលិខិតប្រគល់សពទៅឲ្យសាច់ញាតិដើម្បីធ្វើបុណ្យទៅតាមប្រពៃណីបងប្អូនជនជាតិដើមភាគតិច៕
Source: Kampuchea Thmey Daily
0 Comments