រតនគិរី ៖ គ្រោះថ្នាក់ចរាចរណ៍មួយ បានកើតឡើងរវាងម៉ូតូ២គ្រឿង បុកគ្នាយ៉ាងពេញទំហឹង បណ្តាលឲ្យមនុស្ស៣នាក់ រងរបួសធ្ងន់ស្រាល ក្រោយមកបានស្លាប់ម្នាក់ ដោយសារអាការៈធ្ងន់ធ្ងរពេក។
ករណីគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៥និង៣០នាទីល្ងាច ថ្ងៃសៅរ៍ ១កើត ខែពិសាខ ឆ្នាំកុរ សំរឹទ្ធិស័ក ព.ស២៥៦២ ត្រូវនឹងថ្ងៃទី៤ ខែឧសភា ឆ្នាំ២០១៩ កន្លងទៅ តាមបណ្តោយផ្លូវជាតិលេខ៧៨ ទល់មុខស្ថានីយប្រេងឥន្ធនៈតេលា ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង។
បើតាមសាក្សីដែលឃើញហេតុការណ៍បាននិយាយថា មុនពេលកើតហេតុ ជនរងគ្រោះបានចាក់សាំងនៅក្បែរកន្លែងកើតហេតុ ចាក់សាំងរួចហើយក៏ជិះឆ្លងផ្លូវពីជើងទៅត្បូង។ ស្របពេលនោះដែរក៏មានម៉ូតូ១គ្រឿងជិះក្នុងល្បឿនយ៉ាងលឿន ក្នុងទិសដៅពីកើតទៅលិច ដល់ត្រង់ចំណុចកើតហេតុខាងលើក៏បានបុកម៉ូតូស្កូពីចំពាក់កណ្តាលម៉ូតូ បណ្តាលឲ្យក្មេងស្រីដួលបោកក្បាលនឹងផ្លូវថ្នល់ហូរឈាមពេញថ្នល់ ព្រោះមិនបានពាក់មួកសុវត្ថិភាព។
ចំណែកបុរសម្នាក់ទៀត បានរងរបួសធ្ងន់ ផ្លោងនៅចិញើមផ្លូវថ្នល់ ហើយមិនបានពាក់មួកសុវត្ថិភាពឡើយ។
មន្ត្រីនគរបាលចរាចរណ៍ខេត្តបានឲ្យដឹងថា ម៉ូតូម៉ាក ស្កូពី ពណ៌ក្រហម លាយស ពាក់ស្លាកលេខ រតនគិរី 1C-5143 អ្នកបើកបរឈ្មោះ ស៊ូ ណយ ភេទស្រី អាយុ២៩ឆ្នាំ ជនជាតិឡាវ មុខរបរកសិករ មានទីលំនៅភូមិទេសអន្លង់ សង្កាត់បឹងកន្សែង ក្រុងបានលុង ខេត្តរតនគិរី រងរបួសធ្ងន់ បានដឹកបញ្ជូនទៅមន្ទីរពេទ្យបង្អែកខេត្ត។ ដោយអាការៈធ្ងន់ធ្ងរពេកមិនអាចទុកបាន គ្រូពេទ្យបានពិភាក្សាជាមួយសាច់ញាតិជនរងគ្រោះក៏ដឹកទៅប្រទេសវៀតណាមដល់ពាក់កណ្តាលផ្លូវបានដាច់ខ្យល់ស្លាប់បាត់ទៅហើយ។ អ្នករួមដំណើរឈ្មោះ គើន ស៊ូសុខហេង ភេទប្រុស អាយុ១១ឆ្នាំ របួសស្រាល។
ចំណែកភាគីម្ខាងទៀត ជិះម៉ូតូម៉ាក វ៉េវឆ្លាម ពណ៌ ខ្មៅ គ្មានស្លាកលេខ ឈ្មោះ ឃុត ភេទប្រុស អាយុ២០ឆ្នាំ ជនជាតិទំពួន មុខរបរកសិករ រងរបួសធ្ងន់ សន្លប់ធំ មានទីលំនៅភូមិឡាប៉ូ សង្កាត់យក្ខឡោម ក្រុងបានលុង ខេត្តរតនគិរី បានដឹកបញ្ជូនទៅមន្ទីរពេទ្យបង្អែកខេត្ត។
បច្ចុប្បន្ន ម៉ូតូទាំងពីរគ្រឿង ត្រូវបានកម្លាំងជំនាញការិយាល័យចរាចរណ៍ខេត្តយកទៅរក្សាទុក ដើម្បីធ្វើការដោះស្រាយនៅពេលក្រោយ៕
Source: Kampuchea Thmey Daily
0 Comments