រតនគិរី ៖ បុរសម្នាក់ បានសម្រេចចិត្តធ្វើអត្តឃាតចង.កសម្លាប់ខ្លួនឯង ដោយបន្សល់ទុកកូនប្រុសស្រី២នាក់ឲ្យនៅកំព្រាឪពុក។
ហេតុការណ៍បង្កការភ្ញាក់ផ្អើលនេះ បានកើតឡើងកាលពីវេលាម៉ោង៦និង០៥នាទីល្ងាចថ្ងៃពុធ ១២រោច ខែចេត្រ ឆ្នាំកុរ សំរឹទ្ធិស័ក ព.ស២៥៦២ ត្រូវនឹងថ្ងៃទី១ ខែឧសភា ឆ្នាំ២០១៩ កន្លងទៅ ត្រង់ចំណុចភ្នំបេង ស្ថិតក្នុងភូមិ២ "វិឡាកាត់" សង្កាត់កាចាញ ក្រុងបានលុង ខេត្តរតនគីរី។
សមត្ថកិច្ច បានឲ្យដឹងថា សពឈ្មោះ សាប សាផុន ភេទប្រុស អាយុ២៨ឆ្នាំ ជនជាតិគ្រឹង មានមុខរបរធ្វើចម្ការ ហើយមានប្រពន្ធឈ្មោះ ម៉ូ សាក មានកូនក្នុងបន្ទុកចំនួន២នាក់ប្រុស១ស្រី១។
តាមការសាកសួរពីប្រពន្ធសពបានឲ្យដឹងថា មុនពេលកើតហេតុ នៅពេលល្ងាចគាត់បានដាក់ដាំបាយ ហើយក៏ចេញទៅបត់ជើងនៅក្នុងព្រៃខាងក្រោយ ដោយឲ្យប្ដីនៅមើលបាយនិងមើលកូន មួយសន្ទុះក្រោយមក ស្រាប់តែឮសូរសំឡេងកូនរបស់គាត់ស្រែកហៅគាត់ប្រាប់ថា ប្ដីគាត់បានចង.កសម្លាប់ខ្លួន។
ប្រពន្ធជនរងគ្រោះបានបន្តថា ពេលនោះគាត់បានរត់មកមើលឃើញប្ដីរបស់គាត់បានចង.កជាប់នឹងធ្នឹមខ្ទមចាំចម្ការ ជាមួយយកខ្សែនីឡុង ប្រវែង២ម៉ែត្រចង.ក ហើយឃើញដូច្នេះគាត់បានយកកាំបិតកាត់ផ្ដាច់ខ្សែទម្លាក់ចុះមកក្រោម ពេលនោះប្ដីគាត់បានដាច់ខ្យល់ស្លាប់បាត់ទៅហើយ។
ប្រពន្ធជនរងគ្រោះបានបញ្ជាក់ប្រាប់ទៀតថា កន្លងមក ប្ដីរបស់គាត់ធ្លាប់ បានចង.ក២ទៅ៣ដងរួចមកហើយដែរ ប៉ុន្តែបានបងប្អូនឃើញទាន់ ក៏ជួយសង្គ្រោះទាន់ពេលវេលា។ មូលហេតុនៃការចង.កនេះដែរ គឺប្ដីរបស់គាត់ធ្លាប់ប្រាប់គាត់ថា ដោយតូចចិត្ត នឹងបងប្អូនសាច់ញាតិ មិនដែលស្រលាញ់ និងរាប់អានគាត់នោះទេ ហើយគាត់ត្រូវតែបញ្ចប់ជីវិតតែម្ដង។
ក្រោយកើតហេតុ សមត្ថកិច្ចមូលដ្ឋានចុះមកធ្វើកោសល្យវិច័យ និងសន្និដ្ឋានថា សពពិតជាស្លាប់ដោយសារចង.ក សម្លាប់ខ្លួនឯងពិតប្រាកដមែន។
បច្ចុប្បន្នសព ត្រូវបានសមត្ថកិច្ចធ្វើលិខិតប្រគល់ជូនក្រុមគ្រួសារយកទៅធ្វើបុណ្យតាមប្រពៃណីផងដែរ៕
Source: Kampuchea Thmey Daily
0 Comments