អនុប្រធាននាយកដ្ឋានព្រហ្មទណ្ឌក្រសួង ដកកាំភ្លើងបាញ់ប្រហារពីរនាក់ប្តីប្រពន្ធ ត្រូវសមត្ថកិច្ចចាប់ខ្លួន

ភ្នំពេញ ៖ វាជារឿងនឹកស្មានមិនដល់ ខណៈពេលដែលមន្ត្រីនគរបាលម្នាក់ មានតួនាទីខ្ពង់ខ្ពស់បែរជាបើករថយន្តដេញបាញ់ជនរងគ្រោះពីរនាក់ប្តីប្រពន្ធទាំងយប់ កណ្តាលអធ្រាត្រ តែទីបំផុតគេចមិនរួចពីគុក។

ជនដៃដល់ដែលសមត្ថកិច្ចឃាត់ខ្លួនមានឈ្មោះដួង ណាគ្រី ភេទប្រុស អាយុ៤៧ឆ្នាំ មានឋានៈវរសេនីយ៍ទោមុខតំណែងអនុប្រធាននាយកដ្ឋានព្រហ្មទណ្ឌក្រសួងមហាផ្ទៃ និងមានទីលំនៅផ្ទះលេខ៩៤៣ ផ្លូវ៣៦០ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ។

យោងតាមប្រភពពីជនរងគ្រោះឈ្មោះភូរីស្ស ស្តូរ៉ាន់ ភេទប្រុស អាយុ៣៤ឆ្នាំ មុខងារជាអគ្គនាយកក្រុមហ៊ុនសន្តិសុខCPSនិងមានទីលំនៅភូមិកោះនរា សង្កាត់និរោធ ខណ្ឌច្បារអំពៅ បានឲ្យសមត្ថកិច្ចដឹងថា នៅម៉ោង១២និង០០នាទីយប់ ឈានចូលថ្ងៃទី២ ខែឧសភានេះ ខ្លួនបានជិះរថយន្តម៉ាកRANGE ROVER ពណ៌កណ្តុរប្រមេះពាក់ស្លាកលេខភ្នំពេញ2U 44 48 ដោយរួមដំណើរជាមួយភរិយាឈ្មោះតាំង សុខឡេង អាយុ៣១ឆ្នាំ ជាបុគ្គលិកនៅណាហ្ការវើល ចេញពីហូបអីនៅម្តុំផ្សារដើមគរដើម្បីត្រឡប់ទៅផ្ទះ។ លុះមកដល់មុខក្លឹបរ៉ុកភរិយារបស់ជនរងគ្រោះចេះតែសៀតពោះ រួចក៏ឈប់រថយន្តកាច់កៅអីបត់ឲ្យភរិយាសម្រាក។ ពេលឈប់រថយន្តបានបន្តិច ក៏ស្រាប់តែមានរថយន្តម៉ាកលុចស៊ីស៣៣០ ពណ៌សពាក់ស្លាកលេខសៀមរាប2B 51 53 បានមកឈប់ពីក្រោយ រួចស៊ីផ្លេយ៉ាងច្រើន។ ភ្លាមនោះជនរងគ្រោះចុះទៅសួរក៏ស្រាប់តែអ្នកនៅក្នុងរថយន្តដែលមានឈ្មោះដួង ណាគ្រី ជាអនុប្រធាននាយកដ្ឋានព្រហ្មទណ្ឌក្រសួងមហាផ្ទៃបានបោះពាក្យថា(អញចង់ចាប់ហ្អែង)។

ជនរងគ្រោះបានបន្តថា ពេលឮថាចាប់ខ្លួនដូច្នេះ ជនរងគ្រោះឆ្លើយតបថាខ្ញុំខុសអី ហើយបើចង់ចាប់ខ្ញុំទៅដល់កន្លែងនគរបាលសិន។ បន្ទាប់មកជនរងគ្រោះបានបើករថយន្តមកកាន់អធិការដ្ឋាននគរបាលខណ្ឌច្បារអំពៅ ព្រោះជនរងគ្រោះមានទីលំនៅក្នុងខណ្ឌច្បារអំពៅស្រាប់។ ប៉ុន្តែពេលចេញដំណើរមក រថយន្តលោកអនុប្រធាននាយកដ្ឋានព្រហ្មទណ្ឌក្រសួងមហាផ្ទៃបានបើកកៀររថយន្តជនរងគ្រោះរហូតមកក្បែរអធិការដ្ឋានខណ្ឌច្បារអំពៅ ស្រាប់តែរថយន្តលោកដួង ណាគ្រីបានមកឈប់ចំពីមុខធ្វើឲ្យជនរងគ្រោះរ៉ឺយែរថយន្ត។ ភ្លាមនោះលោកដួង ណាគ្រី បានដកកាំភ្លើងខ្លីម៉ាករ៉ឺឡូបាញ់សំដៅមករថយន្តជនរងគ្រោះបណ្តាលឲ្យបែកកញ្ចក់និងធ្វើឲ្យភរិយាជនរងគ្រោះភ័យពេកបានសន្លប់តែម្តង។ ពេលបាញ់ប្រហាររួចមក លោកដួង ណាគ្រី បានបើករថយន្តគេចចេញពីចំណុចកើតហេតុ តែក្រោយមកក៏ត្រឡប់មកវិញ ត្រូវនគរបាលខណ្ឌច្បារអំពៅឃាត់ខ្លួនយកមកសាកសួររួមទាំងអាវុធខ្លីដែលជនបង្កបានផ្ទុះអាវុធនិងមានសំបកការទុស្សចំនួន៥គ្រាប់ជាភស្តុតាងទៀតផង។

បើតាមការសាកសួរពីសមត្ថកិច្ចនគរបាលខណ្ឌច្បារអំពៅគឺជនសង្ស័យបានឆ្លើយដោះសាថាមូលហេតុដែលរូបគាត់ផ្ទុះអាវុធនោះគឺដោយសាររូបគេស្រវឹង។

គួរបញ្ជាក់ថា នៅព្រឹកថ្ងៃទី២ខែឧសភានេះ នគរបាលខណ្ឌច្បារអំពៅបានរួសរាន់បំពេញឯកសារដើម្បីបញ្ជូនជនសង្ស័យទៅកាន់តុលាការដើម្បីចាត់ការតាមផ្លូវច្បាប់។

ប្រជាពលរដ្ឋនៅច្បារអំពៅកំពុងរង់ចាំមើលថា ជនសង្ស័យខាងលើនឹងត្រូវជាប់គុក ឬយ៉ាងណាបើជនរងគ្រោះដាក់បណ្តឹងថាប៉ុនប៉ងមនុស្សឃាតទៅហើយនោះ៕