ខ្សែប្រយុទ្ធ​កូរ៉េខាងត្បូង Gi Sung Yeon របស់​ព្រះខ័ន​រាជ​ស្វាយរៀង រងរបួស​ជង្គង់​ត្រូវ​សម្រាក​ព្យាបាល​២​ទៅ​៣​សប្ដាហ៍

ខ្សែប្រយុទ្ធ​ជនជាតិ​កូរ៉េខាងត្បូង​កីឡាករ Gi Sung Yeon ដែល​បាន​ចូលរួម​ជាមួយ​ក្រុម​ព្រះខ័ន​រាជ​ស្វាយរៀង កាលពី​ដើមរដូវ​កាល​មកនេះ​ កំពុងតែ​ញាំញី​របួស​ជង្គង់ ក្រោយ​ជួយ​ក្រុម​ខ្លួន​ប្រកួត​ឈ្នះ​ក្រុម​អគ្គីសនី​កម្ពុជា កាលពី​ចុង​សប្ដាហ៍​មុន ខណៈ​របួស​នេះ​តម្រូវឱ្យ​រូបគេ​សម្រាក​ព្យាបាល​ខ្លួន​ក្នុង​រយៈពេល​ប៉ុន្មាន​សប្ដាហ៍​។

យោងតាម​ការបញ្ជាក់​នៅ​លើ​ហ្វេ​ស​ប៊ុ​ករ​បស់​ក្លិប​ព្រះខ័ន​រាជ​ស្វាយរៀង បាន​បញ្ជាក់ថា​ខ្សែប្រយុទ្ធ​សញ្ជាតិ​កូរ៉េខាងត្បូង Gi Sung នឹងត្រូវ​សម្រាក​ពីលើ​ទីលាន​ប្រមាណ ២ ទៅ​៣ សប្តាហ៍ ដោយសារ​បញ្ហា​របួស​ជង្គង់​ក្នុងជំនួប​ជាមួយ​ក្លិប អគ្គិសនី​កម្ពុជា កាលពី​សប្តាហ៍​ទី​៥​កន្លងទៅ​។​របួស​ជង្គង់​ខាងឆ្វេង (Left knee Meniscus tear 30% ) ទ្រនាប់​ជង្គង់ ខាងឆ្វេង មាន​សភាព​យឺត 30% ធ្វើអោយ​កីឡាករ​វ័យ​៣០​ឆ្នាំ​រូបនេះ​ខកខាន​កាលពី​ជំនួប​ស្មើគ្នា​១​ទល់​១ អង្គ​រថា​យ​ហ្គឺ​រ កាលពី​ថ្ងៃអាទិត្យ​សប្តាហ៍​មុននេះ​។​

​កីឡាករ Gisung Yeon កើត​នៅ​ថ្ងៃទី​១ ខែសីហា ឆ្នាំ​១៩៨៩ នៅ​ទីក្រុង Suwon នៃ​សាធារណរដ្ឋ​កូរ៉េខាងត្បូង​។ អាជីព​បាល់ទាត់​របស់​គេ​មានកំណើត​ចេញពី​សាលា Baekam High School នៅ​ទីក្រុង Yongin និង​បន្ត​ចេញទៅ​សកល​វិទ្យាល័យ Honam University ក្នុង​ទីក្រុង Gwangju មុន​ចេញ​ទៅលេង​នៅ​ក្លិប​Gyeongnam ដែលជា​សមាជិក​នៃ​លី​គ​កំពូល​កូរ៉េខាងត្បូង​។​

រូបគេ​បាន​ដើរចេញ​ប្រកប​អាជីព​នៅក្រៅ​ប្រទេស​ចាប់ពី​ឆ្នាំ​២០១១ មក​ដោយ​ធ្វើដំណើរ​មកកាន់​ប្រទេស​ថៃ ចូលរួម​ជាមួយ​ក្រុម​TTM Phichit, BEC Tero, PTT Rayong តែ​នៅ​ឆ្នាំ​២០១៥ គេ​បាន​ផ្លាស់​ទៅលេង​នៅ​ក្លឹប Yadanarbon ក្នុងប្រទេស​មី​យ៉ាន់​ម៉ា វិញ​ម្តង​។ ក្នុង​ពាក់កណ្តាល​រដូវ​កាល​ឆ្នាំ​២០១៦ គេ​បាន​ត្រឡប់មក​ចូលរួម​ជាមួយ​ក្រុម​Bangkok Christian College​នៅ​ប្រទេស​ថៃ​សាជាថ្មី​ម្តងទៀត​។ លុះដល់​ដើមឆ្នាំ​២០១៧ គេ​បានធ្វើ​ដំណើរ​មកកាន់​រាជធានី​ភ្នំពេញ ដោយ​ចូលរួម​ជាមួយ​ក្រុម​ភ្នំពេញ​ក្រោ​ន មួយ​រដូវ​កាល ហើយ​រដូវ​កាល​២០១៨ រូបគេ​បន្ត​ទៅលេង​នៅ​លី​គ​ម៉ាឡេស៊ី មុន​ត្រឡប់មក​កម្ពុជា​វិញ​នៅ​ឆ្នាំ​២០១៩​នេះ​៕ ​
​

Source: Kampuchea Thmey Daily